Адыгэ Республикэм кIымэфэ футболымкIэ ичемпионат хагъэунэ­фыкIырэ чIыпIэхэр къыщыдэзыхыгъэхэр къэнэфагъэх.

Аужырэ турым ехъулIэу апэрэ лигэм хэт команди 4 тынхэм афэбанэщтыгъэх. Чемпионыр ащ ыпэкIэ къэнэфагъ, ар шъолъырым щыцIэрыIо Мыекъопэ «Ошъутенэр» ары. Мыщ хэт футболистхэм ухьазырыныгъэ дэгъу къа­гъэлъэгъуагъ ыкIи зэнэкъокъум апэрэ чIыпIэр къыщыдахыгъ. Зы зэIукIэгъу закъу очко зыщычIанагъэр, чемпионатым ипэублэ «Тульскэм» дыряIэгъэ ешIэгъум пчъагъэр зэфэдизэу аухыгъ. Мы командэм ятIонэрэ чIыпIэр къыфагъэшъошагъ. ТекIоныгъэр къы­дэзыхыгъэм ар очкоуи 6-кIэ ыуж къинагъ. ЯтIонэрэ хъуным пае Мыекъопэ районым илIыкIохэр спорт еджапIэм икомандэ къы­шIуахьын фэягъ ыкIи а пшъэ­ры­лъыр дэгъоу агъэцэкIагъ. Джэрз медальхэр къахьынхэм коман-
дищ фэбэнагъ, ахэм ащыщых «Легионымрэ» «Спортмастер-2» зыфиIорэмрэ. Мы командитIур аужырэ турым щызэIукIагъэх. Апэрэ таймыр 1:1-у аухыгъ. ЯтIонэрэр рагъэжьагъэу «спортмастеровцэхэр» ыпэ ишъыгъэх. Ау зэIукIэгъур аухынкIэ такъикъи 5 къэнагъэу «Легионым» пчъагъэр зэфэдиз ышIыгъ. Бжьэц Бислъан зэкIэлъыкIоу къэлапчъэм IэгоуитIу дидзагъ ыкIи «Легионым» текIоныгъэр къыфихьыгъ, пчъагъэр — 3:2.
Я 13-рэ турым изэфэхьысыжьхэр:
«Тульскэр» — «СШОР-2009» — 5:0, «Олимп» — «Ошъутен» — 5:6, «Легион» — «Спортмас­тер-2» — 3:2, «Хьатыгъужъыкъуай» — «Кавказ Адэмый» — 6:1, «МФОК Ошъутен» — «Спортмастер» — 2:5, «Космос» — «Альянс» — 4:1.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ошъутен» — 37.
2. «Тульскэр» — 31.
3. «Легион» — 29.
4. «Космос» — 28.
5. «Спортмастер-2» — 26.
6. «Спортмастер» — 20.
7. «Хьатыгъужъыкъуай» — 20.
8. «МФОК Ошъутен» — 20.
9. «Кавказ Адэмый» — 19.
10. «СШОР-2009» — 10.
11. «Альянс» — 8.
12. «Канониры» — 6.
13. «Олимп» — 6.
14. «Дружина» — 2.
    ХагъэунэфыкIырэ чIыпIэхэр къыдэзыхыгъэ командэхэм афэгушIуагъэх, джащ фэдэу лъэныкъо зэфэшъхьафхэмкIэ футболист анахь дэгъухэр къахагъэщыгъэх. «Ошъутенэм» хэт Мазлэ Арсен ешIэкIо анахь дэгъоу хагъэунэфыкIыгъ.