ГандболымкIэ Урысыем ипервенствэ ифинал едзыгъо щешIэнэу фитыныгъэ къыдихыгъ Адыгэ Республикэм икомандэу 2012-рэ илъэсым къэхъугъэ пшъашъэхэр зыхэтхэм.

Урысыем ипервенствэ иящэнэрэ едзыгъоу ар щытыгъ. Командэхэр купи 4-у гощыгъэх, ащ пэпчъ команди 6 хахьэ. Ахэр зэнэкъокъум ифинал уцугъо хэлэжьэнхэмкIэ путевкищмэ афэбэнагъэх. Шъугу къэдгъэ­кIыжьын, ар жъоныгъуакIэм и 19-м щегъэжьагъэу и 29-м нэс Мыекъуа­пэ щыкIощт.
Адыгеир къэзыгъэлъагъохэрэр спорт еджапIэу С.М. Джэнчатэм ыцIэ зыхьырэм зыщызыгъасэхэрэр ары. Ахэм Самарскэ хэкум — 20:13-у, Ставрополь — 29:7-у, Санкт-Петербург – 20:18-у къашIуахьыгъ. Ау Москва (17:24) ыкIи Краснодар (13:15) якомандэхэр къатекIуагъэх.
Зичэзыу едзыгъом изэфэхьысыжьхэмкIэ, тренер-кIэлэегъаджэу Валерий Гончар ыгъэсэрэ пшъашъэхэм ящэнэрэ чIыпIэр къыдахыгъ ыкIи ащ ишIуагъэкIэ финал едзыгъом щешIэнхэу фитыныгъэ къыдахыгъ. Командэм иешIэкIо анахь дэгъоу къыхахыгъ Виктория Баховар. ЯтIонэрэ чIыпIэр Краснодар игандболисткэхэм афагъэшъошагъ, Москва илIыкIохэм текIоныгъэр къыдахыгъ.