Апэрэу зэхащагъ
Урысые шIэныгъэм и Мафэ ыкIи Хэгъэгу зэошхом ТекIоныгъэ къызщыдахыгъэр илъэс 80 зэрэхъурэм фэгъэхьыгъэ Урысые диктантэу «Наука во имя Победы» зыфиIорэр мы мафэхэм зэхащагъ. Ар апэрэу мыгъэ рагъэкIокIыгъ.
Адыгеим диктантыр Адыгэ къэралыгъо университетым ыкIи Мыекъопэ къэралыгъо технологическэ университетым ащатхыгъ. НыбжьыкIэхэм яхэгъэгу шIу алъэгъуныр, тарихъыр ашIэныр ары пшъэрылъ шъхьаIэу зэхэщакIохэм зыфагъэуцужьыгъэр.
Диктантым иупчIэхэм онлайн шIыкIэм тетэу къафеджагъэх Москва къэралыгъо университетэу М. В. Ломоносовым ыцIэ зыхьырэм иректорэу Виктор Садовничэр, лъэпкъ ушэтын гупчэу «Курчатовский институт» зыфиIорэм ипрезидентэу Михаил Ковальчук, Урысые Федерацием и Президент ипремие илауреатэу Ирина Тимофеевар.
ЗэкIэмкIи студентхэм упчIэ 25-мэ яджэуапхэр къаратыжьыгъ. Советскэ шIэныгъэлэжьхэм ягъэхъагъэхэм, ТекIоныгъэшхор къыдахынымкIэ зишIуагъэ къэкIогъэ лъэныкъохэм ыкIи нэмыкIхэм ахэр афэгъэхьыгъагъэх. Зызэраушэтыгъэм изэфэхьысыжьхэр электроннэ почтэу атхыгъэм къэкIожьыщтых.