Мы мафэр зэрэ Урысые фэдэу республикэми сыдигъуи зэрифэшъуашэу щыхагъэунэфыкIы. Мыщ фэгъэхьыгъэ Iофтхьабзэхэр Адыгеим иапшъэрэ еджапIэхэм ащызэхащэх, ныбжьыкIэхэм шIэныгъэм имэхьанэ алъагъэIэсыным дэлажьэх.

Адыгэ къэралыгъо университетым мэзаем и 7-м къыщегъэжьагъэу и 14-м нэс Iофтхьэбзэ зэфэшъхьафхэр щы­кIощтых. МэфэкI шIыкIэм тетэу тыгъуа­сэ ахэр аублагъ.
Хабзэ зэрэхъугъэу, анахь мэхьанэ зиIэу агъэнэфагъэр интерактивэу «Наукоград» зыфиIорэр ары. Адыгеим ыкIи Краснодар краим ащеджэрэ кIэлэеджэкIо 700 фэдиз ащ хэлэжьагъ. НыбжьыкIэхэм апае университетым ифакультетхэм зэ­кIэми тематическэ площадкэхэр агъэ­псыгъэх. Апшъэрэ еджапIэм инаучнэ лабораториехэр къакIухьагъэх, шIэныгъэм илъэныкъо зэфэшъхьафхэм нэIуасэ афэхъугъэх.
НыбжьыкIэ пэпчъ шIэныгъэлэжьым иIофшIэн зыфэдэр ылъэгъун амал иIагъ, «Наукоград» зыфиIорэм ишIуагъэкIэ наукэм кIэлэеджакIохэр нахь пэблагъэ мэхъух, шIэныгъэлэжьхэм яIофшIагъэхэр щыIэныгъэм зэрэщагъэфедэхэрэр нэры­лъэгъу къафэхъу. Iофтхьабзэм къыдыхэ­лъытагъэу кIэлэеджакIохэр апшъэрэ еджапIэм имузей, илабораториехэм ащагъэх, шIэныгъэлэжьхэм нэIуасэ афэхъугъэх, мастер-классхэр, квестхэр ыкIи интеллектуальнэ джэгукIэ зэфэшъхьафхэр афызэхащагъэх, ушэтынхэр ашIогъэшIэгъонэу ежь-ежьырэу ашIы­-гъэх.
Апшъэрэ еджапIэм шIэныгъэм фэгъэ­хьыгъэ нэмыкI Iофтхьабзэхэри щызэхащэщтых. Студентхэр, ушэтынхэм адэлэжьэрэ ныбжьыкIэхэр рагъэблэгъэщтых, зэIухыгъэ Iофтхьабзэхэр афызэхащэщт. Программэр гъэшIэгъоныщт, ныбжьыкIэхэм апае я XXII-рэ Урысые шIэныгъэ конференциеу «ШIэныгъ. Гъэ­сэныгъ. НыбжьыкI» зыфиIорэр зэха­щэ, ушэтэкIо ныбжьыкIэм иеджапIэ агъэ­псыщт. Тхьамафэм къыкIоцI Адыгэ къэ­ралыгъо университетым шIэныгъэм фэгъэхьыгъэ Iофтхьэбзэ 60-м ехъу зэ­ха­щэнэу агъэ­нафэ.