Мыекъопэ къэралыгъо технологическэ университетым и Дзэ егъэджэн гупчэ зызэхащагъэр илъэс зэрэхъурэм епхыгъэ мэфэкI Iофтхьабзэ тыгъуасэ зэхащагъ. Ащ къыдыхэлъытагъэу курсант зэрэхъугъэхэр къэзыушыхьатрэ тхылъхэр ныбжьыкIэхэм аратыжьыгъэх.

МэфэкI Iофтхьабзэм хэлэжьагъ Мые­къопэ къэлэ администрацием ипащэу Геннадий Митрофановыр, полковникэу, ракетыдзэхэмрэ я 58-рэ дзэм иартиллериерэ япэщагъэу, Адыгэ Республикэм иветеранхэм я Совет итхьаматэу Къоджэ Аслъан, МКъТУ-м иректорэу Къуижъ Саидэ, апшъэрэ еджапIэм идеканхэр, икIэлэегъаджэхэр, курсантхэм янэ-ятэ­хэр.
Апшъэрэ еджапIэм истуденти 100 фэдиз апэрэ курсант хъугъэх. «Планер­хэмрэ цIыф имысэу быбырэ пкъыгъо­хэмрэ ямеханик» ыкIи «ЦIыф имысэу быбырэ пкъыгъом иоператор» зыфиIо­хэрэмкIэ сэнэхьатхэр яIэу ныбжьыкIэхэр ащ къычIэкIыщтых.

Дзэ егъэджэн гупчэм ипащэу Нурлан Самадьяновым къызэриIуагъэмкIэ, илъэ­ситIум къыкIоцI егъэджэнхэр зэхащэщтых. Iоныгъо мазэм IофшIэныр ауб­лагъ.
— Мыщ фэдэ Дзэ егъэджэн гупчэ республикэм зэрэщагъэ­псыгъэм мэхьанэшхо иI. Илъэсым къыкIоцI тызэрыгушхонхэр къыддэхъугъ. Анахьэу егъэ­джэн-лабораторнэ лъэпсэ дэгъу зэрэти1эр, еджэпIэ классхэр, Iашэр зычIэлъыщт чIыпIэр зэрэзэте­гъэ­псыхьагъэр къыхэзгъэщы сш1оигъу. ЕджапIэм джащ фэдэу тир хэт, ащ компьютер­хэр, оргтехникэр, проекторхэр, симуляторхэр, интерактивнэ пкъыгъохэр, пилот зэрымыс быбырэ аппаратхэр ыкIи нэмыкIыбэр ачIэплъэгъощт. Практическэ IофшIэнхэм афытегъэпсы­хьэгъэ Iэмэ-псымэхэр зэкIэ тиIэх. АР-м и ЛIышъхьэу КъумпIыл Мурат ынаIэ къызэрэттетымк1э лъэшэу тыфэраз. УФ-м и УIэшыгъэ КIуачIэхэм язапас ныбжьыкIэхэр зэрэхэтыщтым имызакъоу, шIэныгъэу зэрагъэгъотырэм ишIогъэшхо къэ­кIощт, чIыпIэ зэфэшъхьафхэм ар ащагъэфедэн алъэкIыщт, — къы­Iуагъ Нурлан Самадьяновым.
Курсантхэр хэушъхьафыкIыгъэу компьютерхэм акIэрысхэу, виртуальнэ нэгъунджэхэр акIэлъхэу пилот зэрымыс быбырэ аппаратхэр зэрэбгъэIорышIэщтхэр зэрагъашIэ, полигоным ахэр ащэх, дзэ къулыкъум епхыгъэ лъэныкъохэм афагъасэх. Джащ фэдэу цIыф зэрымыс быбырэ аппаратхэр зэрэзэхэпхыщтхэр, зэрэзэхэплъхьащтхэр, зэрэбгъэфедэщтхэр зэрагъашIэ. Ащ нэмыкIэу, дрон зэфэшъхьафхэм язэхэлъыкIэ курсантхэм арагъэлъэгъущт, нэужым ар агъэфедэн алъэкIыным фагъэсэщтых.

Дзэ егъэджэн гупчэр непэрэ лъэхъа­ным ищыкIэгъэ шъыпкъэу зэрэщытыр къэгущыIэгъэ хьакIэхэм къыхагъэщыгъ.
— Гупчэр зызэхэтщагъэр илъэс мэхъу, а уахътэм къыкIоцI гъэ­хъэгъэшIухэр тшIыгъэ, зэдэлэжьэныгъакIэхэр щыIэ хъугъэ.
УФ-м и УIэшыгъэ КIуачIэхэм яшIэныгъэ-гъэсэныгъэ гупчэхэм зэпхыныгъэ адытиIэу Iоф адэтэшIэ. КIэлэегъаджэхэм запасым щыIэ офицерхэр ахэтых. НыбжьыкIэхэм яхэгъэгу шIу алъэгъоу гъэсэгъэнхэр ары типшъэрылъыр. Урысые наукэм и Мафэ ехъулIэу Iофтхьабзэр зэрэзэхэтщагъэм мэхьанэшхо иI, сыда пIомэ шIэныгъэм ылъэныкъокIэ гупчэм Iофышхо зэ­шIуехы, — къыIуагъ апшъэрэ еджа­пIэм ипащэ.

Мыекъопэ къэралыгъо технологическэ университетым ия 4-рэ курс щеджэрэ Хъуажъ Ахьмэд къызэрэтиIуагъэмкIэ, Дзэ егъэджэн гупчэм зэрэчIэфагъэм рэгушхо. Хъулъфыгъэ пэпчъ дзэм епхыгъэ пстэури ышIэн фаеу ащ елъытэ. Таможеннэ IофымкIэ сэнэхьатэу зэригъэгъотырэм игъусэу дзэм ылъэныкъокIи ухьазырыныгъэ зэриIэщтым ишIуагъэ къэкIощтэу елъытэ. Ятэ ищысэтехыпIэу дзэкъулыкъушIэ хъунэу фай.
ДЕЛЭКЪО Анет.
Сурэтхэр: Iэшъынэ Аслъан.