Адыгеим ит апшъэрэ еджапIэхэм шIэныгъэм ылъэ­ны­­къокIэ IофшIэнышхо зэшIуахы, лъэныкъо зэфэ­шъхьаф­хэмкIэ шIэныгъэлэжьхэр, докторхэр, кандидатхэр, аспирантхэр бэу яIэх, ныбжьыкIэхэр ащ хащэх.

Мыекъопэ къэралыгъо технологическэ университетым экологиемкIэ ыкIи тыкъэзыуцухьэрэ дунаим икъэухъумэнкIэ икафедрэ идоцентэу Любовь Вавиловам мэфэкIым ипэгъокIэу гущыIэгъу тыфэ­хъугъ, научнэ проект пчъагъэ студентхэр игъусэхэу ащ ыгъэхьазырыгъ, илъэс 26-рэ хъугъэ ныбжьыкIэхэм Iоф задишIэрэр.
— Тыкъэзыуцухьэрэ дунаир къэ­ухъумэгъэным фэшI лъэныкъо зэфэшъхьафхэмкIэ научнэ проект­хэр тэгъэхьазырых, ахэр щыIэныгъэм щыпхырыщыжьыгъэнхэр типшъэрылъ шъхьаI. Анахьэу тынаIэ зытетхэм ащыщ мэкъумэщ пыдзафэхэр шIуагъэ пылъэу гъэфедэжьы­гъэнхэр. ИлъэситIу хъугъэу пынджым къыпыкIырэ пыдзафэхэм япхыгъэ ушэтынхэр тэшIых. Студентхэм научнэ IофшIэнхэр агъэпсынымкIэ амал дэгъухэр щыIэх, ящыкIэгъэ Iэмэ-псымэхэр тиIэх, лабораториехэр зэте­гъэпсыхьагъэх, — еIо тигущы­Iэгъу.
Мыекъопэ къэралыгъо технологическэ университетым истудентхэр наукэм хэщэгъэнхэм пае Iофыгъуабэ щызэшIуа­хы, IэпыIэгъу зэфэшъхьафхэр къыдэзылъытэрэ грантхэр аратых. НыбжьыкIэхэм агъэхьазырыгъэ научнэ проектхэр щыIэныгъэм щыпхыращынхэмкIэ ащ ишIогъэшхо къэкIо. Джащ фэдэу шIэныгъэлэжь ныбжьыкIэхэр нахьыбэу къэралыгъом иIэнхэм фэшI федеральнэ про­граммэу щыIэхэм студентхэр ахагъэлажьэх.

Любовь Вавиловам истудентхэм ащыщ ыгъэхьазырыгъэ проектыр Урысыем инаучнэ-технологическэ про­ект анахь дэ­гъуи 100-м ащыщ хъугъэ ыкIи къыфа­гъэшъошэгъэ грантым ишIуа­гъэкIэ IофшIэным пи­дзэ­жьыгъ. Студентхэр чанэу конференцие зэфэшъхьаф­хэм ахэлажьэх. Анахь пшъэ­рылъ шъхьаIэу зыфагъэуцужьырэр тыкъэзыуцухьэрэ дунаир мыушIоигъэныр, пыдзафэхэр шIуагъэ пылъэу гъэфедэжьыгъэнхэр ары. Джащ фэдэу шъолъырымкIэ мэхьанэ ин зиIэ аквакультурэхэр нахьыбэ шIыгъэнхэм, ащ епхыгъэ ушэтынхэм студентхэр ахагъэлажьэх.
— Тистудентхэм гупшысэ гъэшIэгъонхэр яIэх. ЧIыопсыр къэу­хъумэгъэным фэгъэхьыгъэ Iоф­шIэн зэфэ­шъхьафхэм ахэр япхыгъэх. Хэу­шъхьафыкIыгъэ Iэмэ-псымэхэр зыдэлъ Iалъмэ­къхэр тIыгъхэу республикэм ичIыпIэ зэфэ­шъхьафхэм тэкIо, ушэтынхэр тэшIых. Непэрэ мафэм ехъулIэу тишъолъыр иэкологие фэгъэхьыгъэ IофшIэни 8 студентхэм агъэцакIэ, научнэ ушэтынхэр ашIых. ЗэшIуахырэ Iофыгъохэм ащыщ Шъхьэгуащэ ипс ифизикэ-химическэ зэхэлъ зыфэдэр, ом изытет елъыты­гъэу ар зэрэзэхъокIырэр гъэунэфыгъэныр. Джащ фэдэу ощх къы­зещхыкIэ, канализациехэм язытет, псыр нахьыбэу зэрыуцохэрэр къакIухьэхэзэ зэрагъа­шIэ, ахэм афэгъэхьыгъэ Iоф­шIэнхэр агъэхьазырых, — еIо тигу­щыIэгъу.

Ежь Любовь Вавиловар илъэс пчъагъэ хъугъэу, шIогъэшIэгъонэу къэкIы­хэрэм ябиохимие ыкIи яфизиологие еушэты. НэмыкI шъолъырхэм къащыкIыхэрэм ащыщэу Адыгеим ичIыопс нахь къекIухэрэр егъэунэфы. Ахэм ащыщ адыгэ щаир, хъурмэр, нэмыкIхэри. Тишъолъыр къыщыкIыхэрэм зэрахагъэ­хъощтым пылъых.
Сурэтхэр авторым иех.