Шъэумэн Хьазрэт ыцIэкIэ щыт шIушIэ фондым шIухьафтынэу автобуси 2-рэ хьылъэзещэ машинэрэ Адыгеим культурэмкIэ иучреждениехэм къаритыгъ.

ЦIыфхэр зэрэзэращэрэ автобуси 2-м щыщэу зыр Адыгэ Республикэм и Концерт зэхахьэ, ятIонэрэр АР-м и Театральнэ зэхахьэ аратыгъ. Театрэ оборудованиер, реквизитхэр, шъуашэхэр зэрэзэращэщт машинэр АР-м и Театральнэ зэхахьэ IукIагъ. АР-м и Концерт зэхахьэ икупи 8-мэ, А.С. Пушкиным ыцIэ зыхьырэ Урыс къэралыгъо драмтеатрэм, И.С. Цэим ыцIэ зыхьырэ Лъэпкъ театрэм ахэр къызфагъэфедэнхэ алъэкIыщт. Автобусхэр рызекIонхэм фагъэхьазырыгъахэх, зие хъугъэхэм ятамыгъэхэр атырашIыхьагъэх.
«Мы аужырэ илъэсхэм культу­рэм иучреждениеу джырэ шапхъэхэм адиштэхэрэр тиреспуб­ликэ щыдгъэ­псыгъэх, ахэм хэхъо­ныгъэ зэрядгъэшIыщтым ыуж тишъыпкъэу тит. Псэуа­лъэхэу агъэкIэжьыгъэхэм ыкIи агъэ­псыгъэхэм зигъо Iофтхьабзэхэр ащызэхащэнхэм, концертхэр, спектаклэхэр къащатынхэм мэхьанэшхо иI. Респуб­ликэм итворческэ, итеатральнэ куп пэрытхэр щынэгъончъэу автобусыкIэхэмкIэ Адыгеим икъалэхэм, ирайонхэм, нэмыкI чIыпIэхэм анэсынхэ, урысые, дунэе зэнэкъокъухэм ахэлэжьэнхэ, хэгъэгум ичIыпIэ зэфэшъхьафхэм за­къыщагъэлъэгъон алъэ­кIыщт», — къы­Iуагъ Адыгеим и ЛIышъхьэ.
Адыгеим и Президентыгъэу, гупыкIышхо зиIэ Шъэумэн Хьазрэт респуб­ликэм хэхъоныгъэ егъэшIыгъэным, социальнэ учреждениехэм IэпыIэгъу ягъэгъотыгъэным, республикэм ис лъэпкъ­хэм яшэн-хабзэхэмрэ якультурэрэ къэухъумэгъэнхэм атегъэпсыхьэгъэ проектхэм ягъэцэкIэн иIахьышхо зэрэхишIыхьэрэр КъумпIыл Мурат шъхьафэу къыхигъэщыгъ.
АР-м и ЛIышъхьэ ипресс- къулыкъу къытырэ къэбархэмкIэ ЛIышэ Саныет.