Мэзаем и 1-м, чэщ-зымафэм къыкIоцI, Адыгеим гъогогъуи 4-рэ машIом зыкъыщиштагъэу агъэунэфыгъ. Анахь инэу ар къызщызэкIэблагъэр станицэу Дахъом дэт хьакIэщыр ары.

УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгеим щыIэм ипресс-къулыкъу къызэритыгъэмкIэ, мэшIогъэкIосэ-къэгъэ­нэжьэкIо подразделением икъулыкъу­шIэхэм а уахътэм къыриубытэу дэкIыгъуи 4 яIагъ. Сотовэ телефонхэр зыщащэрэ тучанэу Мыекъуапэ дэтым машIор къыкIэнагъ. Квадрат метри 10-у машIом зэлъиубытыгъэр псынкIэу къэгъэнэжьа­кIохэм акIуачIэкIэ агъэкIосагъ. Зэрагъэ­унэфыгъэмкIэ, машIор мебелым къыкIэнагъэу ары.
Джащ фэдэу СНТ-у «Сад» зыфиIорэм дэтыгъэ квадрат метри 10 хъущтыгъэ псэолъэшI «вагончикыр» стыгъэ. Адыгэкъалэ дэт псэупIэм машIор къыкIэ­нагъ. Ащ игъэкIосэжьын техникитIу ыкIи нэбгыри 7 хэлэжьагъ.
Станицэу Дахъом дэт хьакIэщ зэхэтым пхъэм хэшIыкIыгъэ хьамамэу квадрат метри 100 хъоу хэтым машIор къыкIэнагъ. УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгеим щыIэм икъэгъэнэжьакIохэм акIуачIэкIэ машIор агъэкIосагъ, зыпари хэкIодагъэп ыкIи шъобж атещагъэ хъугъэп.