СызэрэпсаумкIэ макъэ шъосэгъэIу. Тызэрэпсэун фаем тетэу сыщыI. Частым къулыкъу щызыхьыхэрэм лъытэныгъэ къысфашIы. Адыгэхэр ахэм бэу ахэтых: КIуашъэ Махьмуд Ибрахьимэ ыкъор, Джэнчэтэ Нурбый Къадырбэч ыкъор, Еджэрыкъуае щыщэу Брафтэ Джанбэч Хьаджыбэчыр ыкъор, Блащэпсынэ щыщэу Вэрэкъо Ауес Исмахьилэ ыкъор. Мыхэр зэкIэ кIэлакIэх (1923-рэ илъэсых), дэгъоу тызэрэзэхэтыр гъэнэфагъэ… Джы къасIомэ сшIоигъор ары: Iоныгъом и 16-м, 1943-рэ илъэсым сшынахьыкIэ кIасэу, згъасэу, сигъусэ зэпытэу сиIэгъэ Исмахьилэ лIыхъужъныгъэ зэрихьэзэ фэхыгъэ. ДзэкIолIэу игъусагъэм ащ ихьадэ зыдэщылъ чIыпIэр къытфиIотагъ. Анахь зэпэуцуныгъэ ин зыщыкIощтыгъэ чIыпIэхэм ар ащыщыгъ. Ащ емылъытыгъэу, сишъэогъухэр сигъусэхэу а чIыпIэм тыкъекIугъ. Чэщ мэзэхэ шIуцIэм сшынахьыкIэ ихьадэ къэдгъотэжьыгъ. Пчэдыжьым, Iоныгъом и 17-м, 1943-рэ илъэсым къутырэу Краснэм игурыт еджапIэ ищагу зэрифэшъуашэм тетэу ар щыдгъэтIылъыжьыгъ. А чIыпIэр къэтшIыхьагъ. «Хэгъэгу зэошхом иорденэу а I-рэ шъуашэ зиIэр» Исмахьилэ къызэрэфагъэшъошагъэм фэгъэхьыгъэ унашъор непэ къысIэкIэхьагъ. Ащ ыпэкIэ Быракъ Плъыжьым иорден къыфагъэшъошагъэу щытыгъ. ЛIэныгъэм фэгъэхьыгъэ къэбарыр – къэбар гухэкI. Ау зыщышъумыгъэгъупш заор зэрэкIорэр, кIочIэ шIуцIэу тызыгъэкIоды зышIоигъом тебэны. ЦIыф хэмыкIуадэу ащ тытекIошъущтэп. Сянэ ар дэгъоу гурыжъугъаIу. КIуашъэ Махьмудэрэ Джэнчэтэ Нурбыйрэ сшынахьыкIэ ычIыпIэу къызготых. Ар гущыIэ къодыеу щытэп… Пстэуми сэри, дзэкIолIэу сигъусэхэми тисэлам яшъухыжь. ЩыIэкIэшIу шъогъот. Мы къэстхыгъэмрэ игъусэ сурэтымрэ шъумыгъэкIодынхэу сышъолъэIу.