ФутболымкIэ Адыгэ Республикэм икIымэфэ чемпионат къыдыхэлъытэгъэ ешIэгъухэр мы мафэхэм командэхэм яIагъэх. Лигищми хагъэунэфыкIырэ чIыпIэхэр къащыдэзыхыгъэхэр шIэхэу къэнэфэщтых.

Апшъэрэ лигэм хэт командэхэм ешIэгъу зырыз къафэнагъ. Я 6-рэ турым апэу хагъэунэфыкIырэ чIыпIэ къыдэзыхыгъэр къыщынэфагъ, ар «МФОК Ошъутен». Мы командэр «Урожаим» IукIагъ ыкIи зэIукIэгъур 1:5-у шIуахьыгъ. Ащ къыхэкIыкIэ апэрэ чIыпIитIум афэбэнэн ылъэкIыщтэп. Ау «АГУ-р» 3:3-у «МКУ СОЦ-м» зэрэдешIагъэм ишIуагъэкIэ «МФОК Ошъутенэр» ящэнэрэ чIыпIэм щыт, аужырэ турым изэфэхьысыжьхэм ямылъытыгъэу, хагъэунэфыкIырэ чIыпIэ къыди­хыгъ. Я 7-рэ турым университет командэр чемпионатым пэрытныгъэ щызыIыгъхэм ащыщэу «Патриот-01 Улап» зыфиIорэм дешIэщт. «Урожаир» «МКУ СОЦ-м» IукIэщт. Арышъ, щылэ мазэм и 19-м командэхэм яешIэгъухэр гъэшIэгъоныщтых. Ахэм шъуяплъынэу зэхэщакIохэм шъурагъэблагъэ.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Патриот-01 Улап» — 13.
2. «Урожай» — 13.
3. «МФОК Ошъутен» — 10.
4. «АГУ» — 7.
5. «МКУ СОЦ» — 4.
6. «Картонтара-Шытхьал» — 3.
7. «СШОР-2008» — 1.
   Апэрэ лигэр пштэмэ, апэрэ чIыпIихыр зыIыгъ командэхэм текIоныгъэр къыдахыгъ. «Ошъутенэр» 8:0-у «Кавказ Адэмыем» текIуагъ. ЧIыпIэу зыдэщытыр нахьышIу зышIын зылъэкIыгъэ закъор «Спортмастерыр» ары, ар 6:4-у «СШОР-2009-м» текIуагъ. ЕшIэгъуиблым футболистхэм къэ­лапчъэм Iэгоо 45-рэ дадзагъ, зы зэIукIэгъум гурытымкIэ 6.
   ЕшIэгъухэм язэфэхьысыжьхэр: «Спортмастер» — «СШОР-2009» — 6:4, «Ошъутен» — «Кавказ Адэмый» — 8:0, «МФОК Ошъутен» — «Альянс» — 4:2, «Олимп» — «Космос» — 2:6, «Легион» — «Хьатыгъужъыкъуай» — 3:1, «Тульскэр» — «Дружина» — 4:0, «Спортмастер-2» — «Альянс» — 3:0.
   Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ошъутен» — 19.
2. «Тульскэр» — 16.
3. «Спортмастер-2» — 16.
4. «Космос» — 15.
5. «МФОК Ошъутен» — 14.
6. «Легион» — 13.
7. «Спортмастер» — 11.
8. «Хьатыгъужъыкъуай» — 10.
9. «Кавказ Адэмый» — 10.
10. «СШОР-2009» — 7.
11. «Альянс» — 4.
12. «Олимп» — 2.
13. «Дружина» — 2.
14. «Канониры» — 0.
    Нахьыжъхэр зыхэхьэрэ ветеранхэм ялигэ хэт командэхэм чемпионатыр аухынкIэ тури 3 къафэнагъ. Я 6-м «Штурмым» очкохэр щычIинагъэх, ар 3:3-у «Джокерым» дешIагъ. «ВНГ-р» «Делотехникэм» текIуагъ, пчъагъэр — 2:1. Джырэ уахътэм «ВНГ-м» ыкIи «Щагъдыим» очко пчъагъэу яIэр зэфэдиз.
    Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «ВНГ» — 10.
2. «Щагъдый» — 10.
3. «Штурм» — 8.
4. «Делотехника» — 7.
5. «Джокер» — 4.