Петр I-м иунашъокIэ Урысыем прокуратурэ зыщагъэпсыгъэр щылэ мазэм и 12-м илъэс 303-рэ мэхъу.
Къэралыгъом щыIэкIэ тэрэз илъынымкIэ мы къулыкъум мэхьанэшхо иI. ЛIэшIэгъуищым ехъугъэу Урысыем и Прокуратурэ иIофышIэхэр хабзэм фэлажьэх, цIыфхэм яфитыныгъэхэр къаухъумэх, рэхьатныгъэр хэгъэгум илъыным фэIорышIэх.
Адыгеим и Прокуратурэ пэщэныгъэ дызэрахьагъ ыкIи непи чанэу Iоф ашIэ IэпэIэсэныгъэ зыIэкIэлъ, зисэнэхьат хэшIыкIышхо фызиIэ прокурорхэм. Къу­лыкъушIэхэм япшъэрылъхэр зэрифэшъуа­шэу агъэцэкIэнхэмкIэ, шIуагъэ къытэу IофшIэныр зэшIуахынымкIэ амалышIу­хэр яIэх. Прокурорхэм яIофшIэнкIэ анахь шъхьаIэр зекIокIэ-шIыкIэ тэрэз ахэлъыныр, ренэу яшIэныгъэхэм ахагъэхъоныр, япшъэрылъхэм язэшIохынкIэ шIыкIакIэу щыIэхэр къызфагъэфедэнхэр ары.
БлэкIыгъэ илъэсым АР-м и Прокуратурэ икъулыкъушIэхэр лъыплъэн IофшIэным ылъэныкъокIэ хэбзэгъэуцугъэм игъэцэкIэн чанэу дэлэжьагъэх, хабзэр ыкIи рэхьатныгъэр къаухъумагъэх.
Тикъэралыгъо ипащэ ыкIи Урысыем и Генеральнэ прокурор прокуратурэм ылъэныкъокIэ пшъэрылъхэр къагъэуцугъэх — бзэджашIэхэм ыкIи къолъхьэ тын-Iыхыным ябэныгъэнхэмкIэ хэбзэу­хъумэкIо къулыкъухэм зэдэштэныгъэ яIэ­ным мэхьанэшхо етыгъэныр, цIыфхэм ясоциальнэ ыкIи IофшIэн фитыныгъэхэр, предпринимательхэм яшIоигъоныгъэхэр къэухъумэгъэнхэр, джащ фэдэу хэбзэгъэуцугъэр амыукъоу лъэпкъ проектхэм ягъэцэкIэн анаIэ тырагъэтыныр.
Адыгэ Республикэм и Прокуратурэ иIофышIэхэм шъыпкъагъэ, гуетыныгъэ ыкIи IэпэIэсэныгъэ ин ахэлъэу япшъэ­рылъхэр зэрагъэцакIэрэм фэшI сафэраз.
Урысые Прокуратурэм и Мафэ фэшI сигуапэу сышъуфэгушIо! Анахьэу тиветеран лъапIэхэм шъхьэкIэфэныгъэ ин афэсэшIы. Прокуратурэм игъэпсын ыкIи ащ изэтегъэуцон ветеранхэм яIахьышхо хэлъ. ШIушIагъэу шъо шъуиIэм ихьатыр­кIэ непэ прокуратурэм IэпэIэсэныгъэ ин зыхэлъ ыкIи шъыпкъагъэр зигъогогъу прокурорхэр иIэх, ащ тырэгушхо.
ШъуигукIуачIэ къыщымыкIэу, псауныгъэ пытэ шъуиIэу, шъуиунагъохэм хъярыр къябэкIэу, шIоу щыIэр къыжъудэхъоу шъущыIэнэу шъуфэсэIо!
АР-м ипрокурорэу, юстициемкIэ я 2-рэ класс зиIэ къэралыгъо советникэу И. С. Шевченкэр.