ИлъэсыкIэр къызщихьащтым ехъулIэу Адыгеим и ЛIышъхьэу КъумпIыл Мурат Урысые Iофтхьабзэу «ШIоигъоныгъэхэм я ИлъэсыкIэ чъыг» зыфиIорэм хэлажьи, къыпихыгъэхэм ялъытыгъэу кIэлэцIыкIухэм шIухьафтынхэр аIэкIагъэхьажьых.

Адыгеимрэ Херсон хэкумрэ ащыщ кIэлэцIыкIухэм яшIоигъоныгъэхэр зытетхэгъэ апэрэ открыткэхэр УФ-м и Къэралыгъо Совет изэхэсыгъо ыуж Кремлым чIагъэуцогъэ ИлъэсыкIэ чъыгым ащ къыпихыгъэх. Ащ нэужым республикэм и ЛIышъхьэ АР-м и Правительствэ зычIэт унэм щагъэуцугъэ чъыгми ащ фэдэ открыткэхэр къыпихыгъэх.
Адыгеим и ЛIышъхьэ псэупIэу Джа­джэм щыщ илъэс 12 зыныбжь Димэ зыкIэхъопсыщтыгъэ кушъхьэфа­чъэр, Мыекъуапэ щыщ илъэси 5 зыныбжь Миланэу нысхъа­пэ фэягъэм, псэупIэу Табачнэм дэс илъэс 11 зыныбжь Миланэ нэгъунджэ гъэшIэгъонэу зыкIэхъопсыщтыгъэр, Мыекъуапэ щыщ илъэс 14 зыныбжь Рузанэу телефон фэягъэм яшIоигъоныгъэхэр афигъэцэкIагъэх. Джащ фэдэу Херсон хэкуми шIухьафтынхэр афащэщтых: илъэси 3 зыныбжь Артемэу кушъхьэфачъэм кIэхъопсырэм ыкIи илъэси 10 зыныбжь Тимурэу конструкторым бэшIагъэу фэягъэм яшIоигъоныгъэхэр афигъэцэкIагъэх.
«ИлъэсыкIэм икъихьэгъум ехъулIэу хьалэмэт гъэшIэгъонхэр мэхъух, анахь лъэшэу зыкIэхъопсыхэрэр цIыфхэм къа­дэхъухэуи къыхэкIы. Адыгеим, къошныгъэ зыдытиIэ Херсон хэкум ыкIи тихэгъэгу ащыпсэурэ кIэлэцIыкIу пстэури насыпышIо хъунхэу тыфай. Пшысэ гъэшIэгъоным фэдэ мэфэкIым еджэным, творчествэм ыкIи спортым гъэхъэгъа­кIэхэр ащашIынхэм фигъэчэфынхэу, унэгъо мэфэкIкIэ алъытэрэм гушIогъуабэ къафихьынэу сафэлъаIо», — къы­Iуагъ КъумпIыл Мурат.
Мы Iофтхьабзэм хэлэжьагъэх сенаторхэр, Адыгеим ыцIэкIэ Урысые Федерацием и Къэралыгъо Думэ идепутат­хэр, АР-м и Къэралыгъо Совет — Хасэм идепутатхэр, республикэм иминистрэхэм я Кабинет хэтхэр, общественнэ IофышIэхэр, хабзэм ифедеральнэ ыкIи ишъолъыр къулыкъухэм яIэшъхьэтетхэр.
Шъугу къэтэгъэкIыжьы: УФ-м и Президентэу Владимир Путиныр 2018-рэ илъэсым кIэщакIо зыфэхъугъэ Урысые Iофтхьабзэу «ШIоигъоныгъэхэм я Илъэ­сыкIэ чъыг» зыфиIорэм тикъэралыгъо щыпсэурэ кIэлэцIыкIу мин 210-м ехъумэ яшIоигъоныгъэ афагъэцэкIэн амал къытыгъ. «Движение Первых» зыфиIорэмрэ Урысыем иныбжьыкIэхэмрэ пэщэныгъэ дызэрахьэзэ а IофшIэныр зэшIуахы. Мы Iофтхьабзэм къыхэлажьэх сэкъатныгъэ зиIэ кIэлэцIыкIухэр, кIэлэцIыкIу ибэхэр, гъот макIэ зиIэ унагъохэм ыкIи хэушъхьа­фыкIыгъэ дзэ операцием хэлажьэхэрэм яунагъохэм арыс кIэлэцIыкIухэр. Хабзэ зэрэхъугъэу, кIэлэцIыкIухэм яшIоигъоныгъэхэр зэрытхагъэхэр илъэсэу итым шэкIогъум и 15-м къыщегъэжьагъэу къихьащт илъэсым мэзаем и 28-м нэс сайтымкIэ аIэкIагъахьэх.
Джащ фэдэу ИлъэсыкIэм епхыгъэ Iофтхьэбзэ зэфэшъхьафыбэ Адыгеим зэрэщагъэцэкIагъэр къыхэгъэщыгъэн фае. КIэлэцIыкIу мин 25-рэ фэдиз Мые­къуапэрэ республикэм имуниципалитетхэмрэ ащыкIогъэ пшысэ къэгъэлъэгъон зэфэшъхьафхэм яплъыгъэх. Ахэм ащыщэу нэбгырэ мин 9 фэдизыр Адыгеим и Театральнэ ыкIи и Концерт зэхахьэхэм яшIушIэ Iофтхьабзэхэм ахэлэжьагъэх. Ахэр хэушъхьафыкIыгъэ дзэ операцием хэлажьэхэрэм яунагъохэм арыс кIэлэцIыкIухэр, еджэнымкIэ, творчествэмкIэ общественнэ IофшIэнымкIэ ыкIи спортымкIэ гъэхъэгъэшIухэр зышIыгъэхэр, зипсауныгъэкIэ пыч зиIэ ыкIи сабыибэ зэрыс, социальнэу мыухъумэгъэ унагъо­хэм къарыкIыгъэхэр ары. Ахэм анэмыкIэу Белгородскэ, Курскэ ыкIи Херсон хэкухэм къарыкIыжьыгъэ унагъохэм арыс кIэлэцIыкIухэри ащ фэдэ Iофтхьабзэхэм ахэлэжьагъэх.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.