Хэгъэгу зэошхом Те­кIоны­гъэр къызыщыдэтхыгъэр илъэс 80 зэрэхъурэр мы илъэсым хэдгъэунэфыкIыщт. УФ-м и Президентэу Владимир Путиным игъо зэрилъэгъугъэм тетэу 2025-р Хэгъэгум иухъу­макIо и Илъэсэу Урысыем щагъэнэфагъ.

«ТилIыхъужъхэм ыкIи непэ хэушъхьафыкIыгъэ дзэ операцием хэлажьэхэрэм, тятэжъхэу тарихъ лъэхъэнэ зэфэшъхьафхэм зи Хэгъэгушхо фэзэуагъэхэм, нацизмэр зэхэзыгъэтэкъуагъэхэм ялIыхъужъныгъэ зэрэтщымыгъупшэщтым ишыхьатэу 2025-р Хэгъэгум иухъумакIо и Илъэсэу агъэнэфагъ.
Хэгъэгу зэошхом иилъэсхэм тичIыпIэгъу нэбгырэ мин 80 заом Iухьагъ, зэолI 52-мэ Советскэ Союзым и ЛIыхъужъыцIэ къафаусыгъ. Непэ ахэм япхъорэлъф­хэмрэ къакIэлъыкIогъэ лIэужхэмрэ хэушъхьафыкIыгъэ дзэ операцием лIыхъужъныгъэ щызэрахьэзэ, япшъэ­рылъхэр дэх имыIэу агъэцакIэхэзэ, щысэшIу къагъэлъагъо.
Адыгеим икIыгъэ дзэ къулыкъушIэ мини 4-м ехъоу хэушъхьафыкIыгъэ дзэ операцием хэлажьэхэрэм къэ­ралыгъо тын лъапIэхэр къафагъэшъошагъэх, ахэм ащыщэу нэбгырэ 500-м — ЛIыхъужъныгъэм иорден, 4-мэ ядунай захъожьыгъэ нэужым Урысыем и ЛIыхъу­жъыцIэ къафагъэшъошагъ. ХэкIодэгъэ дзэкIолIхэр зэкIэ гукъэкIыжь дахэкIэ агу илъыщтых. Непэрэ лъэхъаным илIыхъужъхэри, блэкIыгъэ нэмыкI заохэм блэнагъэ ащызезыхьагъэхэри егъашIэм тщыгъупшэщтхэп. Ахэм ацIэхэр еджапIэхэм ыкIи урамхэм афаусыгъэх, мыжъо­б­гъухэри къафызэIуахыгъэх.
Iо хэлъэп, тидзэкIолIхэм, ахэм яунагъохэм IэпыIэгъу тафэхъу, тапэкIи тафэхъущт. Къэралыгъо фондэу «Хэгъэгум иухъумакIохэр» зыфиIорэм ишъолъыр къу­тамэ а IофшIэныр зэшIуехы. КъызызэIуахыгъэм къыщыублагъэу къэралыгъо фондым икъутамэ тхылъ мини 6,5-рэ фэдиз къыIэкIэхьагъ, ахэм япроцент 87-м япхыгъэ Iофтхьабзэхэр зэшIуахыгъахэх.
Пшъэрылъ шъхьаIэу къытпыщылъхэм ащыщых хэушъхьафыкIыгъэ дзэ операцием иветеранхэр ныбжьыкIэхэр яхэгъэгу шIу алъэгъоу, фэшъыпкъэхэу пIугъэнхэм фэгъэхьыгъэ Iофтхьабзэхэм ахэщэгъэнхэр. Хэтрэ ветерани лIыхъужъныгъэу зэрихьагъэм тарихъ шъхьаф пылъ. Ащ фэдэ тарихъ пэпчъ къыткIэхъу­хьэхэрэм цIыфыгъэ шэпхъэ дахэхэр ахэлъхэу, яхэ­гъэгу фэшъыпкъэхэу къэтэджынхэмкIэ мэхьанэшхо яIэу щыт.
Хэгъэгум иухъумакIоу тиIэ пстэуми инэу тафэраз. Псэемыблэжьхэу, я Хэгъэгушхо фэшъыпкъэхэу, зышъхьамысыжьхэу ахэр щытынхэм фэзыгъэсэгъэ, фэзыпIугъэ унагъохэм лъытэныгъэ ин къалэжьыгъ. Тарихъ шIэжьыр мыкIосэнымкIэ, къыткIэхъухьэхэрэр хэгъэгум къырыкIощтым фэгумэкIхэу, фэшъыпкъэхэу пIугъэнхэмкIэ зишIуагъэ къэзыгъэкIорэ пстэуми инэу тафэраз», — къащитхыгъ исоциальнэ нэкIубгъохэм АР-м и ЛIышъхьэу КъумпIыл Мурат.