УФ-м и Президентэу Владимир Путиным Правительствэм хэтхэм тыгъуасэ зэхэсыгъо адыриIагъ. Анахьэу зытегущыIагъэхэр лъэпкъ проектыкIэхэу Урысыем къэблэгъэрэ илъэс заулэм хэхъоныгъэ езыгъэшIыщтхэм ятIупщын.
Ахэр щыIэныгъэм ылъэныкъо пстэуми пIоми хъунэу афэгъэхьыгъэх ыкIи зытегъэпсыхьагъэхэр къэралыгъом, шъолъыр пэпчъ щыIэныгъэ амалэу илъыр нахьышIу шIыгъэныр ары.
«Ащ игъорыгъоу тыкъыфэкIо: псэупIакIэхэм ятIупщынкIэ, гъогухэм яшIынкIэ ыкIи ягъэцэкIэжьынкIэ, общественнэ чIыпIэхэм язэтегъэпсыхьанкIэ шэпхъэшIухэм танэсыгъ. Джащ фэдэу кIэлэцIыкIу ибэхэм псэупIэ ягъэгъотыгъэным хэдгъэхъуагъ, зэхэоным ищынагъо зиIэ псэупIэхэм цIыфхэр къачIэтэщыжьых, коммунальнэ фэIо-фашIэхэр зэраIэкIэ­хьэ­рэ рыкIуапIэхэр тэгъэкIэжьых, со­циаль­нэ инфраструктурэм хахъохэр фэтэшIых.
Мы IофшIэныр лъэпкъ проектыкIэхэм яшIуагъэкIэ лъыдгъэкIотэщт. ЗэшIотхы­гъэр дгъэпытэным ахэр зэрэфэIорышIэхэрэм имызакъоу, гъэхъагъэу тиIэхэм зядгъэ­ушъомбгъуным иамали къытатыщт.
Лъэпкъ проектхэу «ЩыIэныгъэм пэе инфрастуктурэр», «Экологическэ шIуа­гъэр», «ШIуагъэ къэзытырэ транспорт системэр» зыфиIохэрэ лъэпкъ проектхэмкIэ пшъэрылъышхохэр щытых. Экономикэ хэхъоныгъэм джащ фэдэу фэIорышIэщтых проектхэу «ШIуагъэ къэзытырэ ыкIи зэнэкъокъуныгъэ зыхэлъ экономикэр», «Экономика данных», «Гъомылэпхъэ щынэгъончъэнымкIэ технологическэ амалхэр» зыфиIохэрэр ыкIи нэмыкIхэр. Экономикэм ылъэныкъокIэ Iоф зышIэщтхэм ягъэхьазырын проектэу «Кадры» зыфиIорэм къыдыхэлъытэгъэщт. Лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэ лъэпкъ проектым къыткIэхъухьэхэрэм нахь амалыбэ къаритыщт.
Лъэпкъ проектэу «Унагъор» зыфиIорэм нахь гъэлъэшыгъэу анаIэ тырагъэтынэу Владимир Путиным унашъо къышIыгъ. Ны-тыхэмрэ сабыйхэмрэ IэпыIэгъу ягъэ­гъотыгъэныр ащ къыдыхэлъытагъ. Респуб­ликэм мы Iофыгъом тыщыдэлэжьагъ, мы илъэсми щылъытэгъэкIуатэ.
Джыри зы пшъэрылъ – 2030-рэ илъэ­сым ехъулIэу цIыфхэм къагъашIэрэр илъэс 78-м нэс, 2036-м ехъулIэу – илъэс 81-м нэс лъыгъэкIотэгъэныр. АщкIэ IэпыIэгъущтыр лъэпкъ проектыкIэу «ЩыIэныгъэ кIыхьэр ыкIи чаныр». Псауныгъэм икъэухъумэнкIэ программэхэр ащ къыдыхэлъытагъэх.
ЗэкIэ проектхэм ягъэцэкIэн тыфэхьазыр. Iофыбэ тапэ илъ – шъолъыр ыкIи муниципальнэ мэхьанэ яIэу. Лъэпкъ проектыкIэхэм ягъэцэкIэнкIэ Президентым къыгъэуцугъэ пшъэрылъхэр шIуагъэ къытэу щыIэныгъэм щыпхырыщыгъэнхэм пае федеральнэ гупчэм Iоф дэтшIэщт.
ЛъэгэпIакIэхэм танэсыным пае цIыф­хэм яIэпыIэгъу тыщыгугъызэ пшъэрылъ инхэр зыфэтэгъэуцужьых! Зэхэсыгъом Президентым къызэрэщиIуагъэу, «лъэпкъ проектхэм язэфэхьысыжь уасэ зэрэфашIыщтыр цIыфхэм ящыIэныгъэ къызэрэщылъэгъощтхэр ары», – къащит­хыгъ социальнэ хъытыухэм АР-м и ЛIышъхьэу КъумпIыл Мурат.