Щылэ мазэм имэфипшIыр пыкIыгъ. ГидрометеорологиемкIэ ыкIи тыкъэзыуцухьэрэ дунаим имониторингкIэ Гупчэм ипащэу Александр Митровым тызэрэщигъэгъозагъэмкIэ, мы аужырэ илъэсипшIым щылэ мазэр анахь чъыIэу, градус 25,3-м кIахьэу, зыщагъэунэфыгъэр 2015-рэ илъэсыр, анахь фэбагъэр 2013-р ары, фабэр градус 18,7-м кIахьэщтыгъ.

Щылэ мазэм автомобиль гъогухэм мылыр атыришIыхьэу, цIэнлъагъоу ыкIи пщагъоу бэрэ къыхэкIы. Къыблэм къикIырэ жьым ощх къыхьын ылъэ­кIыщт.
ГурытымкIэ мазэм температурэу щыIэщтыр шапхъэм нахьыбэщт, ощх ыкIи ос цIынэу къыхьыщтыр шапхъэ­хэм ашIокIыщтэп ыкIи тIэкIу къе­хъущт. Къы­хэкIыщтых мафэхэр ошъуапщэу, гъогухэр цIэнлъагъоу. Джащ фэдэу фабэмрэ чъыIэмрэ чэзыу-чэзыоу къызэкIэлъыкIощтых. Къызыщыучъы­Iырэ уахътэм мылыр чъыгхэм ыкIи электрорыкIуапIэхэм апишIыхьащт.
Апэрэ мэфипшIым чэщым чъыIэр градуси 5-м нэсэу щыIагъ, къыгъэщтыгъ. Мафэм фабэр градуси 6 — 11-м кIэхьагъ.
ЯтIонэрэ мэфипшIыр. Чэщхэр чъы­Iэщтых градуси 2 — 7-м нэсэу, мафэхэм чъыIэр градуси 4-м кIэ­хьащт.
Ящэнэрэ мэфипшIым икIэухым чэщым чъыIэр градуси 4 — 9-м нэсыщт. КъыхэкIыщтых градуси 10 — 15-м нэсэу къызыщыучъыIыщтхэри. Мафэхэм фабэр градуси 6-м кIэ­хьащт.
Къушъхьэхэм осыр бэу къащесын ыкIи ос зэхэлъыр къецохъохын ылъэ­кIыщт.
Щылэ мазэм псыхъохэм адэт псыр шапхъэхэм атетыщт, мыл атыри­шIыхьащт, къызщигъэжъурэ уахътэм ыкIи лъэшэу къызещхырэм, псыр къыдэкIоен ылъэ­кIыщт.
Мы мазэм осэу къесыщтым елъытыгъэщт бжыхьасэхэм язытет зыфэдэщтыр. Ахэм чъыIэр къягоощтэп.
КIАРЭ Фатим.