«Агробиотехнопарк» зыфиIорэ инновационнэ гупчэу Адыгеим щашIыщтым ылъапсэ уахътэм икапсулэ зэрэщагъэтIылъыгъэр республикэм имэкъумэщ хъызмэт ихъугъэ-шIэгъэ инэу икIырэ 2024-рэ илъэсым къыхэхъухьагъ.

Ар министерствэу мы лъэныкъом фэгъэзагъэм къыщыхагъэщыгъ. Инвестиционнэ проектышхом ипхырыщын зэрэрагъажьэрэм фэгъэхьыгъэ Iофтхьабзэм УФ-м мэкъу-мэщымкIэ иминистрэу Оксана Лут хэлэжьагъ.
Гупчэу ашIыщтым ылъапсэ иапэрэ мыжъо загъэтIылъым, шIэныгъэлэжьхэмрэ агробиотехнопаркым ирезидентхэмрэ афэгъэхьыгъэ хъохъухэр зытетхэгъэ «уахътэм икапсулэ» чIалъхьагъ. АР-м мэкъу-мэщымкIэ и Министерствэ къызэрэщытаIуагъэмкIэ, ар 2030-рэ илъэсым къызэIуахыщт.
Проектым къыдыхэлъытагъэу, къэ­кIырэ лъэпкъ зэфэшъхьафэу щыIэхэр тэрэзэу гъэунэфыгъэнхэм, янэшанэхэр зыфэдэхэр ыкIи нэмыкIхэм зэратекIыхэрэр ушэтыгъэнхэм фытегъэп­сыхьэгъэ генетическэ лабораторие гъэ­шIэгъон агъэпсыщт. Ащ нэмыкIэу, чылэпхъэ лъэпкъэу осэ ин зиIэхэр щаIыгъынхэу технологие пэрытхэм адиштэу шIыгъэ гъэтIылъыпIэ, «фитотроннэкIэ» заджэхэрэ комплексэу ­илъэс псаум къэкIыхэрэм апылъынхэ, ахэм ящыкIэгъэ фабэр, нэфынэр, нэмыкIхэр агъэIорышIэнхэ амал къэзытырэр агъэ­уцущтых.
Научнэ-ушэтыпIэ лабораториеу ашIырэм шIэныгъэлэжь куп 30-м нахь мымакIэу а зы уахътэм Iоф щашIэн алъэ­кIыщт, «гъэпсынкIэгъэ селекциекIэ» заджэхэрэ шIыкIэр къызфагъэфедэзэ, мэкъумэщ культурэ лъэпкъыкIэхэр ахэм къыхахыщтых.
Резидент 25-мэ зэзэгъыныгъэхэр адашIыгъэх. Ахэм технологие пэрытхэм якъыхэхын ыкIи ягъэфедэн пылъ шIэныгъэлэжьхэр, лэжьыгъэ лъэпкъыкIэхэм апылъхэр ахэтых. Апшъэрэ мэкъумэщ еджапIэхэм ачIэсхэми шIэныгъэу зэрагъэгъотыгъэр мыщ щаушэтын алъэкIыщт.
IофшIэнхэр 2025-рэ илъэсым аухынхэу ары зэрагъэнэфагъэр. ШIэныгъэ ушэтынхэр ащ къыкIэлъыкIорэ 2026-рэ илъэсым икъихьэгъум рагъэжьэщтых.
Джыри зы инвестиционнэ проект илъэсэу икIырэм ихъугъэ-шIэгъэ инхэм ащыщэу министерствэм къыщыхагъэ­щыгъ. Ар пынджым зыщыпылъыщтхэ заводэу Красногвардейскэ районым ит къуаджэу Джамбэчые щашIырэр ары. Чэщ-зымафэм IуахыжьыгъэкIэ пындж цIынэ тонни 150-рэ щагъэкъэбзэным ар фытегъэпсыхьэгъэщт.
Проектым «инвестиционнэ» зыфаIорэ чIыфэу банкым къыIахыгъэр пэIуагъахьэ, ишIын ыкIэм рафылIагъ. Заводым ­Адыгеим къыщагъэкIыгъэ пынджым имызакъоу, нэмыкI шъолъырхэм къаращыгъэри щагъэкъэбзэщт. IофшIэпIэ чIыпIэ 26-рэ къытыщтэу ары инвесторым къызэриIорэр.
ХЪУТ Нэфсэт.