Илъэсым изэфэхьысыжьхэр
2024-рэ илъэсыр ыкIэм фэкIуагъ. Сыда спортым ылъэныкъокIэ ащ тызэригъэгушIуагъэр?
Илъэсым ипэублэ самбэмкIэ Урысыем ипервенствэ тиныбжьыкIэхэм дышъэ медалитIу къыщахьыгъ. Теуцожь районым испортсменхэу Тыгъужъ Тимуррэ Хьакъуй Амиррэ тагъэгушIуагъ. Тигимнасткэ нэбгыри 7 спортым имастер хъугъэх: Анна Алексеевар, Дарья Ларионовар, Милана Матевосян, Василиса Гарбузовар, Карина Сильченкэр ыкIи Арина Щербаневар. Унэе зэнэкъокъухэм хагъэунэфыкIырэ чIыпIэ къащыдихыгъ ыкIи спортым имастер хъунымкIэ шапхъэхэр ригъэкъугъ Милена Капковам. Мыщ фэдэ гъэхъэгъэшIум типшъашъэхэр илъэси 10 фэкIуагъэх. Ахэр зыгъасэхэрэр тренер-кIэлэегъаджэхэу Яна Цехановичрэ Яна Кострэ.
Мэхьанэшхо зиIэ спорт Iофтхьабзэхэм ащыщ хъугъэ дзюдомкIэ хъулъфыгъэ клубнэ командэхэм язэнэкъокъоу Мыекъуапэ щыкIуагъэр. Урысыем ишъолъырхэм ямызакъоу, IэкIыб къэралыгъохэм къарыкIыгъэхэри мыщ хэлэжьагъэх. Дивизионэу «Кавказым» хэтхэр ары Адыгеим щызэрэугъоигъэхэр, олимпийскэ чемпионэу Мудрэнэ Бислъан и Кубок икъыдэхын команди 8 фэбэнагъ. Зэнэкъокъум иапэрэ едзыгъо ишIухьафтын фонд сомэ миллиони 5,6-м кIэхьагъ.
Футболыр пштэмэ, Красногвардейскэ районым икомандэ апэрэу Адыгеим ичемпионатрэ АР-м и Кубок икъыдэхынрэ афэгъэхьыгъэ зэнэкъокъухэм ащытекIуагъ. Мыекъопэ «Зэкъошныгъэм» ыкIи Суперлигэм щешIэрэ «АГУ-Адыифым» ятренер шъхьаIэхэр зэблахъугъэх.
Илъэсым къыкIоцI муниципальнэ, шъолъыр ыкIи къэралыгъо мэхьанэ зиIэ Iофтхьабзэхэр Адыгеим щызэхащагъэх. ГущыIэм пае, теннис цIыкIумкIэ турнири 4 республикэм щырагъэкIокIыгъ, ахэм нэбгырэ 1000-м ехъу ахэлэжьагъ. Лъэс зекIонымкIэ зэнэкъокъум илъэныкъоу «Муниципальнэ командэхэр» зыфиIорэм «Мыекъуапэ 01-м» ятIонэрэ чIыпIэр къыщыдихыгъ.
Илъэсэу икIырэм спортым епхыгъэ материал 450-м ехъу тигъэзет къыхиутыгъ, къихьащтми а пчъагъэм нахь мэкIэщтэп. МэфэкIэу къэблагъэрэмкIэ спортыр зыгу рихьыхэрэм тафэгушIо, яунагъохэм псауныгъэ, мамырныгъэ ыкIи зэгурыIоныгъэ арылъэу псэунхэу афэтэIо.