Адыгэ Республикэм щыIакIэу илъыр нахьышIу шIыгъэным фэгъэзэгъэ Советым изэхэсыгъо КъумпIыл Мурат зэрищагъ. Стратегическэ иници­ативэхэмкIэ Агентствэм хэбзэ къулыкъухэм яIофшIэн уасэу фишIыгъэр, гъэсэныгъэ тедзэ ягъэгъотыгъэным ылъэныкъокIэ IофшIэныр зэхэщэгъэныр, шъолъыр социальнэ шапхъэхэм атегъэпсыхьагъэу къэуцурэ Iофыгъохэр зэшIохыгъэнхэр – а лъэныкъохэр ары Советым изэхэсыгъо зыщатегущыIагъэхэр.
Ащ хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м иминистрэхэм я Кабинет хэтхэр, Адыгеим и ЛIышъхьэрэ иминистрэхэм я Кабинетрэ я Администрацие, Адыгеим и Общественнэ палатэ, АР-м предпринимательствэм IэпыIэгъу етыгъэнымкIэ и Гупчэ, общественнэ организациехэм, шъолъырым иIофхэм ягъэзекIонкIэ Гупчэм япащэхэр.
Зэхэсыгъор къызэIуихызэ респуб­ликэм и ЛIышъхьэ къызэрэхигъэщыгъэмкIэ, Адыгеим щыIакIэу илъыр нахьышIу шIыгъэнымкIэ Советыр Агентствэм зэхигъэуцогъэ шъолъыр шапхъэхэм язы лъэныкъоу щыт. Мыщ проектхэу ыкIи Iофтхьабзэхэу цIыфхэм ящыIакIэ нахьышIу шIыгъэным фытегъэпсыхьагъэхэр щырахъухьэх.
«Урысыем и Президентэу Владимир Путиным къызэрэхигъэщыгъэмкIэ, «типрограммэхэм афэхъурэ кIэух шъхьаIэхэр къэзыгъэлъагъохэрэр тоннхэр, километрэхэр е ахэм апэIуагъэ­хьэгъэ ахъщэр зыфэдизыр арэп. Анахь шъхьаIэр щыIэныгъэм нахьышIум ылъэныкъокIэ зызэрихъокIырэм цIыфхэм уасэу фашIырэр ары», — къы­Iуагъ КъумпIыл Мурат.
Ащ нэужым республикэм и ЛIышъхьэ къыгъэнэфагъэх анахь мэхьанэ зиIэ лъэныкъохэу Агентствэм и Рейтинг икIэуххэм язэхэфын фэгъэхьыгъэхэр, къэуцурэ Iофыгъо заулэхэм язэшIохынкIэ игъоу алъэгъухэрэр, шъолъыр къэралыгъо политикэмкIэ анахь мэхьанэ зиIэ Iофтхьабзэхэу зехьэгъэн фаехэр.
АР-м и ЛIышъхьэрэ иминистрэхэм я Кабинетрэ я Администрацие ипащэ игуадзэу Хъоткъо Саниет шъолъырхэм ялъытыгъэ лъэныкъохэмкIэ щыIакIэм изытет цIыфхэр ыгъэразэу хъуным епхыгъэ лъэныкъохэм къащыуцугъ. Ахэм зыкIэ ащыщых къэралыгъо учреждениехэм алъыIэсынхэ алъэкIыныр, цIыфхэм яфэIо-фашIэхэр икъоу афэгъэцэкIэгъэнхэр, ахэр зэуалIэхэрэ IофышIэхэм агу къафызэIухыгъэныр, зыгъэгумэкIырэ лъэныкъохэу щыIэхэр икъоу къыхэгъэщыгъэнхэр ыкIи нэмыкI­хэр.
ЛъэныкъуипшI рейтнгым ­къыделъытэ: медицинэ фэIо-фашIэхэм ягъэцэкIэн, тыкъэзыуцухьэрэ дунаим икъэбзэныгъ, гъэсэныгъэр ыкIи хэхъоныгъэр, социальнэу цIыфхэр ухъумэгъэнхэр, IофшIэныр зэрэзэхэщагъэр, къэралыгъо фэIо-фашIэхэр зэрагъэцакIэхэрэр, цIыфхэр зыщыпсэухэрэ унэхэр ыкIи инфраструктурэр, щынэгъончъэныр, гъэпсэфыгъо уахътэр тэрэзэу зэхэщэгъэныр. КъызэрэхагъэщыгъэмкIэ, 2021-рэ илъэсым шъолъырхэм азыфагу щыкIогъэ зэнэкъо­къум цIыфхэм ящыIакIэ изытеткIэ ­Адыгеир я 19-рэ чIыпIэм щытыгъ, 2022-рэ илъэсым – я 23-рэ, 2023-рэ илъэсым — я 21-рэ чIыпIэр ыIыгъыгъ.
Социальнэ лъэныкъомкIэ IофшIэныр зэхэщагъэ зэрэхъурэм фэгъэхьыгъэу къаIотагъ министрэхэу псауныгъэм икъэ­ухъумэн, культурэм ыкIи социальнэ хэхъоныгъэм яIофыгъохэм афэгъэзагъэ­хэм. Шъолъыр социальнэ шапхъэхэм атегъэпсыхьагъэу а лъэныкъомкIэ Iоф­шIэнхэр гъэцэкIагъэ мэхъух.
Гъэсэныгъэ зыщарагъэгъотырэ организациехэм яIофшIэн фэгъэхьыгъэу игъэкIотыгъэу къыIотагъ АР-м гъэсэныгъэмрэ шIэныгъэмрэкIэ иминистрэу Евгений Лебедевым. Ащ щысэу къыгъэ­лъэгъуагъэх Мыекъопэ лицееу N 19-р, Тэхъутэмыкъое районым ит гурыт ­еджапIэу N 5-р, Кощхьэблэ районымкIэ гурыт еджапIэу N 1-р. Ахэм пIуныгъэ IофшIэныр дэгъоу ащызэхащэн алъэ­кIыгъ. НэмыкI учреждениехэу гъэсэныгъэм епхыгъэхэми ахэм яIофшIакIэ ащагъэфедэщт.
Ащ нэмыкIэу министрэр къызыщыуцугъэр гъэсэныгъэ тедзэ ягъэгъотыгъэнымкIэ Iофхэм язытет ары. Республикэм ащкIэ гъэсэныгъэм, культурэм ыкIи спортым яучреждение 67-рэ ит. Ахэм илъэс 18-м нэмысыгъэ кIэлэцIыкIухэм япроцент 83-рэ къызэлъаубыты. Гъэсэныгъэ тедзэ зэрагъэгъотымэ ашIоигъоу ащ фэдэ учреждениехэм зафэзыгъа­зэхэрэр зэрэхъущтыгъэр проценти ­2,39-рэ, джы проценти 2,72-м нэсыгъ. Мыхэм лабораторнэ Iэмэ-псымэхэр, цифрэ технологиехэм япхыгъэ инфраструктурэр ащагъэфедэ.
Республикэм и ЛIышъхьэ зэхэсыгъом икIэухым анахьэу къыхигъэщыгъэр цIыфхэр зыгъэгумэкIырэ Iофыгъохэм язэшIохынкIэ къулыкъухэм яIофшIэн къэкIопIэ, хэкIыпIэ гъэнэфагъэхэр къагъотынхэр ары.
«Хэбзэ къулыкъухэм акIуачIэ амал зэриIэкIэ нахь лъэшэу а Iофыгъом изэшIохын рахьылIэн фае. ЫшъхьагъыкIэ къаIощтым шъуемыжэу, зигугъу къэтшIыгъэ Агентствэм иамалхэр жъугъэфедэх. Организацием анахь дэгъоу IофшIэныр зыщызэхэщэгъэ шъолъырхэм ялъытыгъэу IофшIэкIэшIу IэкIэлъ хъугъэ. Бэрэ къыхэкIы ахъщэ тедзэ щымыIэми, зэхэщэн IофтхьабзэхэмкIэ Iофыгъуабэ зэшIопхын плъэкIынэу. ИщыкIэгъэ за­къор а къэкIуапIэхэу щыIэхэр плъэгъунхэр ыкIи икъоу бгъэфедэнхэр ары», — къы­Iуагъ КъумпIыл Мурат.
Зэхэсыгъом джащ фэдэу щаухэсыгъ АР-м щыIакIэу илъыр нахьышIу шIыгъэ­нымкIэ Советым 2025-рэ илъэсым Iофэу ышIэщтыр.
АР-м и ЛIышъхьэ ипресс-къулыкъу