Илъэси 10 хъугъэу Хъуадэкъо Налбый ищытхъу аригъаIозэ Урысые Федерацием ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм щэлажьэ.
ЦIыфхэм якъэгъэнэжьын фэгъэзэгъэ мэшIогъэкIосэ къулыкъум хэтэу IэпыIэгъу зищыкIагъэхэм апэу алъэIэсы. 2017 —­ 2018-рэ илъэсхэм АдыгеимкIэ мэшIогъэ­кIосэ къулыкъум иIофышIэ анахь дэгъоу къыхагъэщыгъ. Къыблэ шъолъырымкIэ ящэнэрэ чIыпIэр къыдихыгъ.
2014-рэ илъэсым шышъхьэIум IофшIэныр ригъэжьэгъагъ, джыдэдэм хэгъэгу кIоцI къулыкъум икапитан. ИIофшIэгъу­хэм къызэраIорэмкIэ, цIыфхэм IэпыIэгъу афэхъунымкIэ зисэнэхьат фэшъыпкъэ цIыфхэм ащыщ Налбый, ащкIэ шъхьэ­кIэфэныгъэр къылэжьыгъ.
Налбый илIакъокIэ Пщыжъхьаблэ щыщ, зэшищрэ зы шыпхъурэ мэхъух. ЗэкIэми щыIэныгъэм лъэгъо зэфэшъхьафхэр щыхахыгъ. Ежь Мыекъопэ къэралыгъо технологическэ университетым ще­джагъ, нэужым 2017-рэ илъэсым Ивановскэ дэт мэшIогъэкIосэ Академием чIэхьажьи, Iоф ышIэзэ къыухыжьыгъ. Ащ учIэхьаным ыкIи ущеджэным пае шIэныгъэу уиIэм имызакъоу физическэ ухьазырыныгъэ дэгъу пIэкIэлъын фае. Ащ Налбый ­къы­гъэщтагъэп, спортым пыщагъэу щытыгъ. 2020-рэ илъэсым офицер званиер иIэу псэупIэу Джаджэм дэт мэшIогъэ­кIосэ къулыкъум икараул ипащэу Iоф ышIагъ. Нэужым АР-м и ГъэIорышIэпIэ шъхьаIэ мэшIогъэкIосэнымкIэ иотдел истаршэ инспекторыгъ, мы мафэхэм мэшIогъэкIосэ къулыкъум ипащэ игуа­дзэу Iоф ешIэ. Илъэс зэкIэлъыкIохэм иIэпэIэсэныгъэ хигъэхъуагъ, пащэм игуадзэу зэрагъэнэфагъэмкIэ цыхьэу къыфашIыгъэр къыгъэшъыпкъэжьыгъ, иIофшIэн хэшIыкIышхо фыриIэу егъэцакIэ.
— Ханскэм щыIэ мэшIогъэкIосэ къу­лыкъум Iоф щысшIэнэу езгъэжьэгъакIэу мыщ дэт чIадзыжьыгъэ мэкъумэщ хъыз­мэтшIапIэм машIор инэу къыщызэкIэнагъэу тыкIогъагъ. Шъыпкъэр пIощтмэ, щынагъэ сыгу зыпарэкIи къихьагъэп. МашIом сызыхахьэм къызгурыIуагъ ар згъэкIуасэ зыхъукIэ гухахъо зэрэхэзгъуа­тэрэр. СиIэпыIэгъу зыгорэм езгъэкIыным ренэу сыфэхьазырыгъ, ащ кIуачIэ къыситыщтыгъ. ЦIыфхэм, псэупIэхэм якъэгъэнэжьынкIэ Iофэу пшIэрэм уасэ къыфашIы хъумэ уегъэгушхо, гу кIуачIэ къыпхилъхьэзэ ыпэкIэ улъэкIуатэ, — еIо Налбый.
ИIофшIэн щынагъоу зэрэщытым, псэемыблэжьыныгъэ зэрэхэлъым емылъытыгъэу Налбый лIыхъужъэу зилъытэжьырэп. Къыхигъэщырэ закъор иIофшIэн шIу зэрилъэгъурэр ыкIи обществэмкIэ ащ мэхьанэшхо зэриIэр ары.
— Ренэу мэшIогъэкIосэным уфэхьазырын фае, — къеIуатэ Налбый. – МашIор къызэкIэнагъэу макъэ къызытагъэIукIэ тыдэкIыным пае зы такъикъ уахътэу тиIэр. Къэлэ кIоцIым машIор къызщыхъугъэ чIыпIэм такъикъи 10-кIэ тынэсын фае. Къалэм мэшIогъэкIосэ частэу 3 дэт, чIыпIэу машIор зыщыхъу­гъэм елъытыгъэу машинэхэр макIох. Псы арытэу, ренэу хьазырэу ахэр щытых. Мафэм дэкIыгъуи 10 — 15 фэдиз тиIэу къыхэкIы, анахьэу гъэмэфэ лъэхъа­ным уцхэм машIор къазыкIанэкIэ. КIымафэми унэжъхэр хьакумкIэ зэрагъэплъырэм къыхэкIэу машIор къащызэкIанэу бэрэ къыхэкIы.
Налбый къызэриIуагъэмкIэ, чэщ-зымафэм къулыкъур ыхьынэу зытехьэкIэ, республикэм ит мэшIогъэкIосэ къулыкъу­хэр къепхыгъэу яIофшIэн гъунэ лъе­фы, ищыкIагъэ хъумэ ежьыри ягъусэу машIор агъэкIосэнэу адакIо. КъулыкъушIэ нахьыжъэу Iоф зыдишIэхэрэм шъхьэ­кIэфэныгъэ афешIы, ахэм IэпэIэсэны­гъэу аIэкIэлъыр къызэрэзIэкIигъэ­хьащтым ренэу пылъ.
Ипшъэрылъхэр зэрифэшъуашэу зэригъэцакIэхэрэм къакIэлъыкIоу щытхъу тхылъхэр, Урысыем ошIэ-дэмышIэ Iоф­хэмкIэ и Министерствэ ибгъэхалъхьэ, медалэу «Граждан зыкъэухъумэжьыным ия 15-рэ илъэс» зыфиIорэр, нэмыкIхэри къыфагъэшъошагъэх.
Уахътэ зыщиIэм ыпкIэ хэмылъэу мэшIогъэкIосэ-къэгъэнэжьын спортымкIэ илъэси 10-м къыщегъэжьагъэу илъэс 15 зыныбжь кIэлэцIыкIухэр егъасэх. Мы илъэсым Къыблэ федеральнэ шъолъырым щыкIогъэ зэнэкъокъум Налбый ыгъасэхэрэр хэлажьэхи, апэрэ чIыпIэр къыдахыгъ. Урысыем ихэшыпыкIыгъэ командэ ахэр хагъэхьагъэх. ЦIыфхэм якъэгъэнэжьын фэгъэзэгъэ къулыкъум щылажьэхэрэм псауныгъэ пытэрэ щыIэкIэ-псэукIэ дэгъурэ яIэнэу, гъэхъэ­гъэшхохэр ашIынэу, шIоу щыIэр къадэхъу­нэу, мамырэу псэунхэу тафэлъаIо!
КIАРЭ Фатим.