Тэхъутэмыкъое районым щыпсэурэ кIэлэцIыкIухэу сэкъатныгъэ зиIэхэм мэфэкI Iофтхьабзэ мы мафэхэм афызэхащагъ. ШIушIэнымкIэ Адыгэ шъо­лъыр общественнэ организациеу «Доброе сердце» зыфиIорэр ащ кIэщакIо фэхъугъ. Илъэс пчъагъэ хъу­гъэу зипсауныгъэкIэ ауж къинэрэ сабыйхэм ыкIи ахэм яунагъохэм агу къыдащае.

МэфэкI зэхахьэм гъэшIэгъоныбэ ныбжьыкIэхэм къащяжэщтыгъ, зэнэкъокъу цIыкIухэр афызэхащагъэх ыкIи къагъэшъуагъэх. Аниматорхэр хьакIэхэм апэгъокIыгъэх, кIэлэцIыкIухэр зыфэе сурэт­хэр анэгухэм атырашIыхьагъэх.

Илъэс къэс зэхащэрэ шIушIэ Iофтхьабзэу «ШIоигъоныгъэхэм ячъыг» зыфиIорэм къыдыхэлъытагъэу шIухьафтынхэр кIэлэцIыкIухэм аратыгъэх. ПэшIорыгъэшъэу ахэр зыфаехэр ЛIыжъ ЩтыргъукIым фатхыгъагъ. ШIушIэ Iофтхьабзэм мыгъэ кIэлэцIыкIу 65-рэ хагъэ­лэжьагъ, ахэр агъэшIуагъэх. IэшIу-IушIу­хэр аратыгъэх. Муниципальнэ гъэпсыкIэ зиIэ Яблоновскэ къэлэ псэупIэм иадминистрацие ипащэу Iэтэжьэхьэ Заурдин мэфэкI Iофтхьабзэм изэхэщэн иIахьышIу хишIыхьагъ.
МэфэкI Iофтхьабзэм хэлэжьагъэхэм ямызакъоу, унэм къикIын амал зимыIэхэм адэжь ЛIыжъ ЩтыргъукIымрэ Ос Пшъашъэмрэ ащыIагъэх. Ахэм аратыщт шIухьафтынхэр Тэхъутэмыкъое районым ипащэу Шъао Аскэр ишIуагъэкIэ агъэхьазырыгъэх.