2025-рэ илъэсым гъэтхапэм и 1-м къыщегъэжьагъэу цIыфым кредитнэ ыкIи микрофинанс организациехэм чIыфэ (займ) къаIихынымкIэ ежь-ежьырэу пэрыохъу зыфигъэуцужьын ылъэкIыщт.

Ар гъэцэкIагъэ зэрэхъущт шIыкIэр 2024-рэ илъэсым мэзаем и 26-м къыдэкIыгъэ федеральнэ хэбзэгъэуцугъэу N 31-м къыщыдэлъытагъ.
Къихьащт илъэсым гъэтхапэм и 1-м къыщегъэжьагъэу цIыфым ежь-ежьырэу пэрыохъу зэрэзыфигъэуцужьырэр къэ­ралыгъо фэIо-фашIэхэм япортал ригъэ­хьан ылъэкIыщт, лъэныкъуабэ къызэлъы­зыубытырэ гупчэхэми 2025-рэ илъэсым Iоныгъом и 1-м щегъэжьагъэу ар агъэцакIэ хъущт.
Пэрыохъур ор-орэу зытепхыжьын плъэкIыщт, а фэIо-фашIэм ыпкIэ лъыптын ищыкIагъэп.