Хэгъэгум и Президент кIэщакIо зыфэхъугъэ урысые Iофтхьабзэу «ШIоигъоныгъэхэм я ИлъэсыкIэ чъыг» зыфиIорэм Адыгеим и ЛIышъхьэ дыригъэштагъ.

ИлъэсыкIэр къызыщыблагъэрэм ехъу­лIэу мы Iофтхьабзэр зэхащэ кIэлэцIыкIухэмрэ ныбжьыкIэхэмрэ я Урысые общественнэ-къэралыгъо зэхахьэу «Движение Первых» зыфиIорэмрэ ныбжьыкIэхэм яIофхэмкIэ Федеральнэ агентствэмрэ. КъумпIыл Мурат кIэлэцIыкIухэм яшIоигъоныгъэхэу Кремлым щагъэуцугъэ ИлъэсыкIэ чъыгым пылъэгъэ джэгуалъэхэм арылъ открыткэхэм арытхэр ыгъэцэкIэщтых.
АР-м и Правительствэ зычIэт унэм шIоигъоныгъэхэм я ИлъэсыкIэ чъыгэу щагъэуцугъэм Адыгеим и ЛIышъхьэ ащ фэдэ открыткэхэр къыпихыгъэх. Джащ фэдэу мы Iофтхьабзэм хэлэжьагъэх Адыгеим ыцIэкIэ УФ-м исенаторхэу Хъопсэрыкъо Муратрэ Александр Наролинымрэ. Мыекъуапэ щыщ Рузанэ, Табачнэм дэс Миланэ, Херсон хэкум щыпсэурэ Артем бэшIагъэу зыкIэхъоп­сыхэрэр афагъэцэкIэщт. Рузанэ телефоныкIэ, Миланэ VR-нэгъунджэ, Артем кушъхьэфачъэ яIэ хъущт.

НэмыкI кIэлэцIыкIухэми яшIоигъоныгъэхэр афэгъэцэкIэгъэнхэм тегъэпсыхьагъэу Iофтхьабзэу «ШIоигъоныгъэхэм я ИлъэсыкIэ чъыг» зыфиIорэм къыхэлэжьэщтых республикэм идепутатхэр, хэбзэ къулыкъухэм ялIыкIохэр, гупыкI зиIэ цIыфхэр, республикэм иорганизациехэмрэ ипредприятиехэмрэ ялэжьэкIо купхэр. ШIу зышIэ зышIоигъо нэбгырэ миным ехъу илъэс къэс мыщ фэдэ Iоф­тхьабзэм хэлажьэ. Илъэси 6-м ­къыкIоцI кIэлэцIыкIу мин 210-мэ зыкIэхъоп­сыхэрэр афагъэцэкIагъ. Мы Iофтхьабзэм ишIуагъэкIэ сабый ибэхэм, зипсауны­гъэкIэ щыкIагъэ зиIэхэм, хэушъхьафыкIыгъэ дзэ операцием хэлажьэхэрэм, щыIэныгъэм чIыпIэ къин ригъэуцогъэ унагъохэм арыс кIэлэцIыкIухэм Iэпы­Iэгъу афэхъух.

«ИщыкIэгъэ дэдэу щыт, гукIэгъу зы­хэлъ мыщ фэдэ Iофтхьабзэм изэхэщэн хэбзэшIу тфэхъугъ. Ренэу ащ тыхэлажьэ, тикIэлэцIыкIухэр зыкIэхъоп­сыхэрэр зафэдгъэцэкIэшъукIэ тэгушIо. Ахэм афэтшIэн тлъэкIыщтым ар изы Iахь цIыкIу ныIэп. Тэ тызыфаер тикIэлэцIыкIухэм псауныгъэ пытэ яIэнэу, унэгъо зэгурыIожьхэм ащапIунхэу, нахьыжъхэм ягуфэбэныгъэрэ яшIулъэгъурэ ащымыкIэнхэу, яреспубликэ гупсэ зэрищыкIагъэхэр зэхашIэнэу ары», — къыIуагъ КъумпIыл Мурат.
Шъугу къэтэгъэкIыжьы АР-м и ЛIышъхьэу КъумпIыл Мурат кIэщакIо зэрэфэхъу­гъэм тетэу илъэсыкIэ шIушIэ Iофтхьабзэхэр мы мафэхэм зэрэзэхащэхэрэр. Республикэм ипэублэ еджапIэхэм ачIэс­хэм илъэсыкIэ шIухьафтынхэр афаугъоигъэх. Республикэм ипэублэ еджапIэхэм яа 1 – 4-рэ классхэм арысхэм шIухьафтын 26000-м ехъу афагъэхьазырыгъах, Херсон хэкум ис кIэлэцIыкIухэм IэшIу-IушIухэр зэрылъ Iалъмэкъ 10500-рэ аратыщт. Краснодар краимкIэ къалэу Шъачэ, ТIопсэ, Успенскэ районхэм арыт адыгэ къуаджэхэм яеджапIэхэм ачIэсхэми шIухьафтын 700 фэдиз афагъэхьазырыгъ.
Тыгъэгъазэм и 22-м къыщегъэжьа­гъэу и 29-м нэс Адыгеим и Театральнэ зэхахьэ, республикэ филармонием, кинотеатрэу «Joy Land» ащыкIощт илъэсыкIэ Iофтхьабзэхэм кIэлэцIыкIу мини 8-м ехъу ахэлэжьэщт. КIэлэцIыкIухэр пшысэхэу «Морозко», «Пиратский новый год», фильмэу «Баба-Яга спасает Новый год» зыфиIохэрэм яплъыщтых.