КIэлэцIыкIу ибэхэмрэ ны-тыхэр зышъхьарымытыжьхэмрэ зычIэсыщтхэ унакIэхэм яIункIыбзэхэр ятыжьыгъэнхэм фэгъэхьыгъэ Iофтхьабзэр Мыекъуапэ щыкIуагъ. Адыгеим и ЛIышъхьэу КъумпIыл Мурат унакIэхэм яIункIыбзэхэр аритыжьынхэу ыкIи афэгушIонэу ащ къэкIуагъ.

Мы Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Адыгеим ыцIэкIэ сенаторхэу Александр Наролинымрэ Хъопсэрыкъо Муратрэ, Адыгеим ипрокурорэу Игорь Шевченкэр, УФ-м и Следственнэ комитет иследственнэ гъэIорышIапIэу Адыгэ Респуб­ликэм щыIэм ипащэу Василий Лариныр, Мыекъуапэ имэрэу Геннадий Митрофановыр, пшъэдэкIыжь зыхьырэ министерствэ зэфэшъхьафхэм яIэшъхьэтетхэр.
ПсэупIакIэхэм фэтэрхэр къащаратыжьыгъ кIэлэцIыкIу ибэ ыкIи ны-тыхэр зышъхьарымытыжь нэбгырэ 30-мэ. Ащ нэмыкIэу зэхэтэкъоным нэсыгъэ унэхэм къачIащыжьыгъэхэми фэтэр 25-рэ къаратыгъ. Урысыем и ЛIыхъужъэу, генерал-лейтенантэу Цоков Олег Юрий ыкъом ыцIэкIэ щыт урамэу псэупIэ чIыпIэу «Лэгъонэкъэ лъапэр» зыфиIорэм иIэм бэмышIэу щашIыгъэ унэм ахэм апае зычIэсыщтхэ фэтэрхэр къафыхагъэкIыгъэх.
Мы псэупIэ кварталым апэрэ урамищыр иIэ хъугъэ, хэушъхьафыкIыгъэ дзэ операцием лIыхъужъныгъэ щызезыхьагъэхэу зыхэкIодэхэ нэужым Урысыем и ЛIыхъужъ цIэ лъапIэ зыфагъэшъошагъэхэм ацIэхэр ахэм ахьых. ЛIыхъужъхэм ащыщых тичIыпIэгъуитIу: полковникэу Торохов Роман Сергей ыкъор ыкIи майорэу Лемеш Вадим Вячеслав ыкъор, джащ фэдэу гвардием иполковникэу Жога Владимир Артем ыкъор.

Адыгеим и ЛIышъхьэ унакIэхэм ачIэхьажьыгъэхэм афэгушIуагъ, псауныгъэ пытэ, насып яIэнэу, гъэхъагъэхэр ашIынхэу афэлъэIуагъ. КъумпIыл Мурат къызэрэхигъэщыгъэмкIэ, зычIэсыщтхэ унэхэм яшIын дакIоу социальнэ инфраструктурэми яшъыпкъэу дэлажьэх. Мы унэ зэхэтхэм апэблагъэу щыт IэзапIэм Iоф ышIэу ригъэжьагъ, 2023-рэ илъэсым ар къызэIуахыгъагъ. Сабый 240-мэ атегъэпсыхьэгъэ кIэлэцIыкIу IыгъыпIэу илъэси 4-кIэ узэкIэIэбэжьымэ ашIыгъагъэми Iоф ешIэ. НепэкIэ ашIырэ еджапIэр нэбгырэ 1100-мэ атегъэпсыхьагъ. Мы чIыпIэм джыри фэтэрыбэу зэхэт унэ заулэ щагъэпсын мурад яI, цIыфхэр зыщытезэкIухьащтхэ чIыпIэхэр, социальнэ псэуалъэхэр, сатыушIыпIэхэр, транспортыр зыщагъэуцущтхэр, щыIакIэр нахь къэзгъэпсынкIэщт, нахь Iэрыфэгъу къэзышIыщт нэмыкI псэуалъэхэри ащ щашIыщтых.
«Демографием, ныхэм ыкIи кIэлэцIыкIухэм, сабыибэ зэрыс ыкIи унэгъо ныбжьыкIэхэм IэпыIэгъу ятыгъэным пае къэралыгъом мылъкушхо къыхегъэкIы. Урысыем и Президент унашъоу ышIырэр зэкIэ дэх имыIэу тиреспубликэ щагъэцакIэ. КIэлэцIыкIу ибэхэм зычIэсыщтхэ унэхэр ятыгъэнхэм ылъэныкъокIэ пшъэ­рылъэу тиIэр 2030-рэ илъэсым ехъулIэу къызэтынэкIыгъэ илъэсхэм зэтырихьэгъэ чэзыум гъунэ фэшIыгъэныр ары. Ащ игъорыгъозэ тыкъыфэкIо. Мы илъэсым кIэлэцIыкIу ибэхэм фэтэри 150-м ехъу аIэкIэдгъэхьагъ», — къыIуагъ АР-м и ЛIышъхьэ.
IункIыбзэхэр ятыжьыгъэнхэм фэгъэ­хьыгъэ Iофтхьабзэм ыуж АР-м и ЛIышъхьэ унакIэхэм ачIэхьажьыгъэхэм ащыщ­хэу Шъхьэлэхъо Азэматрэ Татьяна Володинамрэ хьэкIапIэ афэкIуагъ. ­КъумпIыл Мурат унэхэр къыплъыхьа­гъэх, бысымхэм гущыIэгъу афэхъугъ, яунэе унэ щыIэкIэ насыпышIо щаряIэнэу афэ­лъэIуагъ.
Шъугу къэдгъэкIыжьын: илъэсэу икIыгъэм Адыгеим кIэлэцIыкIу ибэхэм ыкIи ны-тыхэр зышъхьарымытыжьхэм ащыщ­хэм апае фэтэр 71-рэ къыщызIэкIагъэ­хьагъ, ахэм сомэ миллиони 177,5-рэ апэIухьагъ. 2024-рэ илъэсым а программэм пэIухьэрэ ахъщэр фэдитIу хьазыр­кIэ нахьыбэ ашIыгъ: сомэ миллион 360-рэ фэдиз ащ изэшIохын пэIуагъэ­хьагъ. Зэхэубытагъэу къэпIон хъумэ, илъэсым къыкIоцI кIэлэцIыкIу ибэу нэбгыри 150-мэ зычIэсыщтхэ унэхэр аратыгъэх, ахэм ащыщэу 103-р къалэу Мыекъуапэ щэпсэух.
ТхьамафэкIэ узэкIэIэбэжьмэ, къалэу Мыекъуапэ ипсэупIэ чIыпIэу «Яблоневый» зыфиIорэм кIэлэцIыкIу ибэхэм ыкIи ны-тыхэр зышъхьарымытыжьхэм фэтэр 34-мэ яIункIыбзэхэр щаратыжьыгъэх. Ащ нэмыкIэу мы илъэсым жъоныгъуакIэм республикэм икъэлэ шъхьаIэ щыщ кIэлэцIыкIу ибэ 39-мэ фэтэрхэр аратыгъэх. Тыгъуасэ псэупIэ чIыпIэу «Лэгъонэкъэ лъапэр» зыфиIорэм фэтэр 30 щаратыгъ. А фэтэрхэр зэкIэ псэупIэ чIыпIакIэхэм арытых, инженер ыкIи социальнэ инфраструктурэмкIэ зэтегъэ­псыхьагъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.