АР-м иIэпэIасэхэм ыкIи лъэпкъ IэпэщысэшIыным пылъхэм я Ассо­циа­цие зэхищэгъэ Iофтхьабзэр КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэ щыкIуагъ.

IэпэIасэхэм яIофшIэн зэфэ­хьы­сыжьыгъэным, анахь дэ­гъухэр къыхэгъэщыгъэнхэм ар фэгъэхьыгъагъ.
Республикэм щызэлъашIэрэ IэпэIасэхэу Нэгъуцу Аслъан, Се­тэ Сафыет, Битэ Азэ, Гумэ Ларисэ, ТIэшъу Нурбый, Мыгу Рузанэ, Абрэдж Гощэфыжь, Хьакъунэ Эльзэ, Джарымэкъо Зурет, ХъокIо Рузанэ, Акъущ Фатимэ, Гостэкъо Руслъан, Хьа­мырзэ Саидэ, Блэгъожъ Зулифэ зэнэкъокъум хэлэжьагъэх.
ОсэшI купым хэхьагъэх: зэлъашIэрэ IэпэIасэу, сурэтышIэу ГъукIэ Замудин, шIэныгъэлэ­жьэу, искусcтвоведениемкIэ кандидатэу Къуекъо Маринэ, искусствоведениемкIэ кандидатэу, Мыекъопэ къэралыгъо технологическэ университетым идоцентэу КIэдэкIое Нэфсэт.
— Лъэпкъ искусствэм ибаиныгъэ къэзыгъэлъагъохэрэм яIэ­пэIэсэныгъэ шэпхъэ лъагэхэм адештэ. ХэдыкIыным, лъэпкъ Iэмэ-псымэхэр шIыгъэнхэм афэ­гъэхьыгъэ зэнэкъокъум хэлэ­жьагъэхэм яIэшIагъэхэр хьалэ­мэтых. Арэущтэу щытми, осэшI купым анахь IэпэIасэу ылъы­тагъэр Сетэ Сафыет, — къы­Iуагъ ГъукIэ Замудин.

Зэнэкъокъум хэлэжьагъэхэм дипломхэр аратыжьыгъэх.
— «2024-рэ илъэсым иIэпэ­Iас» зыфиIорэр илъэсым Iоф­шIагъэу тиIэхэм язэфэхьысыжь зэнэкъокъоу зэхэтщагъ. СиIоф­шIэн къызэрыхагъэщыгъэм сигъэгушIуагъ. Адыгэхэм якульту­рэ, яшэн-хабзэхэр къыткIэхъу­хьэрэ лIэужхэм ягъэшIэгъэнхэмкIэ мыщ фэдэ Iофтхьабзэхэм яшIогъэшхо къэкIо. Лъэпкъ искусствэр зэрагъашIэзэ, дунэе культурэм иIахь анахь гъэшIэгъоным зыфагъэнэIосэн амал ныбжьыкIэмэ яIэ мэхъу, — къы­Iуагъ текIоныгъэр къыдэзыхыгъэ Сетэ Сафыет.

Лъэпкъ IэшIагъэхэм шъэфыбэ ахэлъ. Пэсэрэ лъэхъаным ти­лъэпкъэгъухэм ашIыщтыгъэ пкъыгъохэу къытлъыIэсыжьы­гъэхэр агъэкIэжьых, хэхъоныгъэхэр афашIых. Тхыпхъэхэр, унагъом ищыкIэгъэ пкъыгъохэр дышъэ IуданэмкIэ нахь дахэ ашIых. Саем, жьыфым, пIуаб­лэм, фэшъхьафхэм Iоф ада­шIэныр ныбжьыкIэхэм ашIогъэ­шIэгъон. ЩыIэныгъэм зэхъокIыныгъэу хэхъухьэхэрэм, уахътэр зэрэлъыкIуатэрэм ялъытыгъэу IофшIэнхэм кIэу ахагъахьэрэр макIэп. Дышъэидэным упылъыным фэшI ижъырэ лъэпкъ Iэмэ-­псымэхэр лъэхъаным епхыгъэу зэрэбгъэфедэщтхэм, тхыпхъэ­хэм, нэмыкIхэм екIолIакIэу IэпэIасэхэм афашIырэр, зыцIэ къетIуагъэхэм афэдэу, лъэпкъ шIэжьым епхыгъэх.
— Непэрэ зэхахьэм хэлэжьэгъэ адыгэ бзылъфыгъэхэу зыIэ дышъэ пызхэрэм шъхьащэ афэ­сэшIы. ИжъыкIэ къыщыублагъэу бзылъфыгъэхэр акъылышIох, IэпэIасэх, лъэпкъ шъошэ дахэ-
хэр ашIых, хадыкIых. Адыгэ бзылъфыгъэр ары лъэпкъыр язы­гъэшIагъэр. Непэ къытефэ шъыпкъэу Сетэ Сафыет текIоныгъэр фагъэшъошагъ, — къы­Iуагъ Адыгэ Республикэм щы­зэлъашIэрэ IэпэIасэу Нэгъуцу Аслъан.
Лъэпкъ искусствэм зиушъомбгъуным АР-м культурэмкIэ и Министерствэрэ Адыгеим иIэпэIасэхэмрэ дэлажьэх, лIэужхэр зэзыпхырэ кIэныр агъэлъапIэ.