АР-м и ЛIышъхьэу КъумпIыл Мурат кIэщакIо зэрэфэхъугъэм тетэу илъэсыкIэ шIушIэ Iофтхьабзэхэр Адыгеим щырагъэ­жьагъэх.

Республикэм ипэублэ еджапIэхэм ачIэсхэм илъэсыкIэ шIухьафтынхэу афагъэхьазырыгъэ­хэр муниципалитетхэм аIэкIагъэхьащтых.
Адыгеим иеджапIэхэм яа 1 — 4-рэ классхэм арысхэм Адыгэ Республикэм ыцIэкIэ шIухьафтын 26000-м ехъу афагъэхьазырыгъ. Херсон хэкумкIэ Геническэ районым щыпсэу­рэ кIэлэцIыкIухэми IэшIу-IушIухэр зэрылъ Iалъмэкъ 10500-рэ афарагъэщэщт. Краснодар краимкIэ Шъачэ, ТIопсэ ыкIи Успенскэ район­хэм арыт адыгэ къуаджэхэм якIэлэеджакIохэми шIухьафтын 700 фэдиз афагъэхьазырыгъ.
Республикэм и ЛIышъхьэ къазыщыфэгушIорэ открыткэрэ IэшIу-IушIухэмрэ зэрылъ илъэсыкIэ Iалъмэкъхэр кIэлэцIыкIухэм аратыщтых. КъумпIыл Мурат Адыгеим щыпсэурэ кIэлэцIыкIухэм афэлъэIуагъ псауныгъэ пытэ яIэнэу, насыпышIонхэу, еджэным гъэхъагъэхэр щашIынэу, текIоныгъакIэхэм афэкIонхэу. АР-м и ЛIышъхьэ ишIушIэ Iофтхьабзэхэм къадыхэ­лъытагъэу тыгъэгъазэм и 22-м къыщегъэжьагъэу и 29-м нэс АР-м и Театральнэ зэхахьэ, АР-м и Къэралыгъо филармоние, кинотеатрэу «Jоу Lаnd» ащыкIощт илъэсыкIэ Iофтхьабзэхэм кIэлэцIыкIу мини 8-м ехъу къарагъэблэ­гъагъ. КIэлэцIыкIухэр пшысэхэу «Морозко», «Пиратский новый год», фильмэу «Баба-Яга спасает Новый год» зыфиIохэрэм яплъыщтых.
Iофтхьабзэу «ШIоигъоныгъэхэм япцIыикъ чъыг» зыфиIорэр джыри республикэм зэрэщылъыкIуатэрэр Адыгеим и ЛIышъхьэ агу къыгъэкIыжьыгъ. Ащ фэдэ Iофтхьабзэм ишIуа­гъэкIэ чIыпIэ къин ифэгъэ кIэлэцIыкIу минмэ зыкIэхъопсыхэрэр къадэхъугъ.
«ИлъэсыкIэ шIушIэ Iофтхьабзэхэм язэхэщэн тэркIэ хэбзэшIу хъугъэ. ЦIыфхэр нахьыбэу ащ илъэс къэс къызэрэхэлажьэхэрэм, чIыпIэ къин ифэгъэ кIэлэцIыкIухэр, хэушъхьафыкIыгъэ дзэ операцием хэлажьэхэрэм ыкIи иветеранхэм яунагъохэм арыс кIэлэцIыкIухэр зыкIэхъопсыхэрэр къадэхъунхэм ахэр зэригъэгумэкIыхэрэм мэхьанэшхо яI. КIэлэцIыкIухэмкIэ къихьащт илъэсыр гушIуагъохэмкIэ, къэбар дэгъухэмкIэ, шIухьафтын гъэшIэгъонхэмкIэ, гукъэкIыжь дахэхэмкIэ баиным фэшI ткIуачIэ къыхьырэр зэкIэ тшIэщт», — къы­Iуагъ КъумпIыл Мурат.