Энергетикым и Мафэ илъэс 13 хъугъэу егъэмэфэкIы Нэшъулъэщэ Ахьмэд. 2011-рэ илъэсым IофшIэкIо къызэрыкIоу зыублэгъагъэр непэ «Россети Кубань» зыфиIорэм и Адыгэ къутамэ кВ 35-рэ ыкIи нахьыбэм дэлэжьэрэ подстанцием ипащэ игуадз.

ЕджапIэр къызеухым, сэнэ­хьатэу къыхихыщтым егупшысэзэ, ятэ игукъэкIкIэ электрикэм зыфигъэзэнэу мэхъу ыкIи Мые­къопэ политехническэ колле­джым чIэхьэ. «КъыдэгъэкIыжьынымкIэ ыкIи цIыфхэр зыщып­сэурэ унэхэм электропсэуа­лъэхэр ащызэтегъэуцогъэнхэм ыкIи гъэлэжьэгъэнхэм» зыфи­IорэмкIэ гъэсэныгъэ зэрегъэ­гъоты. Еджэныр къызэриухэу IофшIэныр еублэ.
— СицIыкIугъом къыщегъэ­жьагъэу электрикэр сшIогъэ­шIэгъоныщтыгъ. ЕтIанэ, еджапIэм щытиIэщтыгъэба предметэу «труд» зыфиIорэр, джащ электричествэмкIэ программэ го­рэхэм тыгу рихьэу тащыдэ­ла­жьэщтыгъ. Шъыпкъэ, апэм синыбджэгъухэм сырягъусэу гъучIгъажъэ сыхъу сшIои­гъуагъ, ау сятэ къысиIуагъэм седэIугъ ыкIи сырыкIэгъожьырэп, — еIо Нэшъулъэщэ Ахьмэд.
Сэнэхьатым уфеджагъэми, ар макIэ мэхъужьы IофшIэкIэ амал пIэкIэмылъ зыхъукIэ. Ащ­кIэ Ахьмэд IэпыIэгъушхо къы­фэ­хъугъ ублапIэм зитамэ ­ычIэгъ чIэзгъэуцуагъэу, Урысыем иза­служеннэ энергетикэу Виктор Куземиныр. Ащ игъусэу Iоф ышIэзэ шIэныгъабэ Ахьмэд ыгъотыгъ. Ари шIомакIэу ла­жьэ­зэ апшъэрэ гъэсэныгъэ зэ­ри­гъэгъотыжьыгъ. Урысыем и Къыблэ къэралыгъо политех­ническэ университетэу М. И. Платовым ыцIэ зыхьырэм чIэ­хьажьы ыкIи «Электроэнергетикэр ыкIи электротехникэр» зыфиIорэ сэнэхьатыр къызIэкIегъахьэ. Ащ фэдиз уахътэм IэпэIэсэныгъэу зэригъэгъоты­гъэмрэ пшъэдэкIыжь ин хэлъэу иIофшIэн зэрэфыщытымрэ Ахьмэд адырабэмэ къахигъэщыгъ ыкIи непэ ыIыгъ IэнатIэм къыфищагъ.
— ТиIофшIэн мэхьанэшхо иIэу сэлъытэ. ЦIыфэу нэфынэ зимыIэм есэтыжьыфэ сызэгоуты, сэгумэкIы. ЧъыIэм, шIункIым хэс. Ар къысэхьылъэкIы, арышъ, ащ фэдэ уахътэхэм псынкIэу, тэрэзэу Iоф тшIэным тыпылъ. КъыхэкIы чэщэу ошIэ-дэмышIагъэ къэхъумэ тыдэкIэу. ЦIыфхэр щыбгъэсыщтхэп ныIа. Мары кIымафэр тапэ илъышъ, ащ фэдэ горэ къэмыхъуным тыдэлажьэ, — еIо Ахьмэд.
Непэ Ахьмэд Iоф ышIэрэ къо­дыеп. Ежьыр зэгорэм кIэлэ ныбжьыкIэу сэнэхьатым къызэ­рэхэхьэгъагъэм фэдэу къафа­кIо­хэрэм ынаIэ атырегъэты. Ащ дакIоу исэ­­наущыгъи хегъахъо. Уахътэм ыуж зыкъыримыгъанэу лэжьэным дэгуIэ. Ащ фэдэ инэша­нэхэм яхьатыркIэ Iоф анахь шъхьаIэхэр къыфагъэ­нафэх. Ахэм ащыщ Урысыем ишъо­лъырыкIэхэм яэнергетик­хэм Iэ­пыIэгъу зэрафэхъурэр. БэмышIэу Донецкэ Народнэ Рес­публикэм ар щыIагъ.
— ТхьамэфитIо тыкъыщылэ­жьагъ. Пыим къаришIылIэгъэ огъухэм апкъ къикIэу Горлов-
кэм дэсхэм нэфынэ яIагъэп. ТыкъыщэIэфэ трансформато­риплI дгъэуцугъэ ыкIи цIыфхэм яунэхэр дгъэблэжьыгъэх, — къыддэгощагъ Ахьмэд.
Илъэс 20 ыныбжьэу къыз­хэ­хьэгъэ иIофшIэгъухэм Ахьмэд лъытэныгъэшхо къыфашIы. ИIоф­шIэн хэшIыкI ин зэрэфыриIэм имызакъоу ны-тыхэм зэрапIугъэм, шэнэу къыхалъхьагъэхэр агъэшIагъо. Анахь гъэшIэгъоныр, къом иIофшIакIэ лъыплъи, тэу Ахьмэд сэнэхьатыр къыфыхэзыхыгъагъэри электромонтерэу еджэжьыгъэу джы Iоф ешIэ.
Анцокъо Ирин.