Адыгэ кIэлэегъэджэ колледжэу Андыр­хъое Хъусен ыцIэ зыхьырэм мы ма­фэхэм хьакIэщ щызэхащагъ.

Адыгэ къэралыгъо ансамблэу «Ислъамыем» иорэдыIохэу, Къэ­бэртэе-Бэлъкъарым иза­служеннэ артистэу, Адыгеим инароднэ артистэу Къумыкъу Щам­су­динрэ Адыгеим инароднэ артистэу Щымырзэ Казбекрэ Iофтхьабзэм къырагъэблэ­гъагъэх.
Адыгэхэм ижъырэ лъэхъаным щыублагъэу хьакIэщым мэхьанэшхо ратыщтыгъ. «Мэзми, мэзахэми «умакъэ Iоу уишъэф пIуатэ хъущтэп, зыщыпIотэщтыр хьакIэщыр ары», аIощтыгъэ на­хьыжъхэм. Апэрэ шIулъэгъур зыгу къыридзэгъэ кIэлэ ныбжьы­кIэм ишъэф, ыгу ихъыкIырэр иныбджэгъу хьакIэщым щыри­Iуатэщтыгъ. ХьакIэщым мыхъо-­мышIэ зышIагъэхэр щаумысыщтыгъэх, къэбархэр, пшысэхэр, таурыхъыжъхэр къыщаIуатэщтыгъэх, орэдхэр къыщаIощтыгъэ, къыщышъощтыгъэх. Мыщ жэрыIо народнэ творчествэм зыщиу­шъомбгъущтыгъ. Ар сыдигъуи къызэрэзэIуахырэри зэрэзэфа­шIыжьырэри хьакIэщ орэд.
КIэлэегъэджэ колледжым исту­дентхэм зэхащэгъэ хьакIэщым къырагъэблэгъэгъэ Къумыкъу Щамсудинрэ Щымырзэ Казбекрэ адыгэ орэдым ыкIи къашъом абзэ куоу зэхэзышIэрэ цIыфых, ахэм яухъумакIох, язе­хьакIох.
Адыгэ къэралыгъо ансамблэу «Ислъамыем» иорэдыIохэм ятворческэ гъогу Iофтхьабзэр зезыщэхэрэм къаIотагъ. НыбжьыкIэу къекIолIагъэхэм упчIэ гъэ­шIэгъонхэр хьакIэхэм араты­гъэх.
Лъэпкъ орэдхэр къаIоным къызэрыфэкIуагъэхэр хьакIэхэм къыраIотыкIыгъ.
— Адыгэ лъэпкъым ыпсэ те­шIыкIыгъэ мэкъэмэ дахэхэр къэпIон­хэр, ащ иискусствэ хэ­хъоныгъэ ебгъэшIыныр насы­пыгъ. Ти­лъэпкъкIэ адыгэ къа­шъом ыкIи орэдым мэхьанэшхо яI, ар тикультурэ игушъхьэлэжь баиныгъэ изы IахьышIу, адыгэм ыгу къигущыIыкIырэ шэн-хабз, — къыIуагъ Щамсудин.
Джа гъогу гъэшIэгъоным емы­зэщыжьэу Къумыкъу Щамсудин рэкIо. Илъэс 33-рэ хъугъэу «Ислъамыем» хэт. Музыкэм ишъэфхэр къызIэкIэхьэгъэ артистым орэдэу къыIорэ пэпчъ гукIэ зыхешIэ.
— Орэдыр сищыIэныгъэ пхырыщыгъ, чэщи мафи, зэпыуи зэпычи имыIэу музыкэм иду­нэе нэфыпс сыхэт. Поп, рок, лъэпкъ мэкъамэхэр зэкIэ сикIас. СицIыкIугъом фортепианэм сыфеджэнэу еджапIэм сы­чIа­гъэхьэгъагъ нахь мышIэми, ги­тарэм къезгъэIоныр сыдигъуи нахь сыгу рехьы. Музыкэр, цIы­фыр ыкIи гъашIэр зэкIэрыпчынхэ щымытэу пытэу зэпхыгъэх. Адыгэ орэдыр лъэгэпIэ иным дэтхьыемэ, ымакъэ гъашIэм щыIущт. Тэ непэ тыбзэ тырымыгущыIэмэ, тиорэд ымакъэ тымыгъэIумэ, кIодыжьыщт. Ар къытэмыхъу­лIэным фэшI зэкIэми тIэ зэкIэ­дзагъэу Iоф тшIэн фае, — еIо Казбек.
Ар «Ислъамыем» зыхэтыр илъэс 22-рэ хъугъэ. ОрэдыIор зэрэнасыпышIор, зэкIэ гу­хэлъэу зыдиIыгъыгъэхэр — сэнэхьат къыхэхыныр, ащ фэкIоныр, имурад ылэжьыныр, творчествэм игъогу хэхыгъэ лъэпкъ музыкэ искусствэр щыIэныгъэм щыпхырыщыгъэныр, адыгэ орэдыр къыIоным игъашIэ фигъэ­хьыгъ.
Мыщ фэдэ Iофтхьабзэхэм ямэхьанэ фэгъэхьыгъэу Къумыкъу Щамсудин къыIуагъ:
— ЛIэужыкIэм мыщ фэдэ зэхахьэхэр ищыкIагъ. Лъэпкъ культурэм ибаиныгъэ алъыд­гъэIэсын фае. Титарихъ къизыIотыкIырэ орэдхэм яхъишъэ къафэтIуатэмэ, ныбжьыкIэмэ язэхашIэ нахь зиIэтыщт. Ти­лъэпкъ тэ тымыгъэлъапIэмэ, нэ­мыкIхэм ашIоIофыщтэп.
МэфэкIым хэлажьэхэрэм ацIэ­кIэ колледжым ипащэ игуа­дзэу Бэла Рахматулинам хьа­кIэхэм шIухьафтын цIыкIухэр къаритыгъ. Мыщ фэдэ зэIукIэгъу-зэдэгущыIэгъухэм мэхьа­нэшхо зэряIэр ащ хигъэунэ­фыкIыгъ.
«Хэбзэ дахэу тэ тиIэр джащ фэд» зыфиIорэ орэдымкIэ хьа­кIэщыр зэфашIыжьыгъ.
Лъэпшъыкъо Фатим.