Зэнэкъокъум изэфэхьысыжьхэр
«Культурэм и Унэ анахь дэгъу» зыфиIорэ зэнэкъокъоу Адыгэ Республикэм щыкIуагъэм культурэм иунэхэр ыкIи игупчэхэр хэлэжьагъэх. Анахь дэгъухэр осэшI купым къыхихыгъэх, текIоныгъэ къыдэзыхыгъэхэр агъэшIуагъэх.
Культурэм и Унэу ыкIи и Гупчэу 129-рэ Адыгеим щэлажьэ. Творческэ куп зэмылIэужыгъоу ахэм ащызэхэщагъэхэм ягъэхъагъэхэр ыкIи ясэнаущыгъэ къагъэлъэгъоным мыщ фэдэ зэнэкъокъухэр фэIорышIэх.
— Аужырэ илъэсхэм хэпшIыкIэу тикультурэ хэхъоныгъэхэр ешIых. Культурэм и Унэу къуаджэхэм адэтхэм лъэшэу анаIэ атырагъэты, азыныкъо нахьыбэр агъэцэкIэжьыгъ. Ахэм Iоф ащызышIэхэрэр ащ рыгушхонхэшъ, нахь дэгъоу лэжьэнхэм тегъэпсыхьагъ мыщ фэдэ зэнэкъокъур. Лъэшэу тащэгугъы нахьышIоу къыхагъэщыгъэхэм акIырыплъыхэзэ, тIэкIу ауж къинэхэрэри къакIэхьанхэу, — къыIуагъ АР-м культурэмкIэ иминистрэ игуадзэу Кушъу Светланэ.
Адыгеим ирайонхэр зэкIэ зэнэкъокъум хэлэжьагъэх, гъэхъагъэхэр къизыгъэлъэгъукIырэ видеохэр Iофтхьабзэм къырахьылIагъэх. Культурэм и Унэу Джэджэ районым итым апэрэ чIыпIэр ыубытыгъ, ятIонэрэ хъугъэ Шэуджэн районымкIэ Лъэпкъ культурэм и Гупчэ. Культурэм и Унэу Красногвардейскэ районым щылажьэрэм ящэнэрэ чIыпIэр фагъэшъошагъ. ХагъэунэфыкIыгъэ чIыпIэхэр зыхьыгъэхэр щытхъу тхылъхэмкIэ ыкIи ахъщэ шIухьафтынхэмкIэ агъэшIуагъэх.
— Сыд фэдэрэ зэнэкъокъуи тыхэлажьэ зыхъукIэ, сэнаущыгъэу тиIэр етэхьылIэ. Мыщ фэдэ зэнэкъокъум къекIуалIэрэ пэпчъ текIоныгъэм фэбанэ, хэлажьэхэрэм зыкIыныгъэ къахелъхьэ. Шэуджэн районым культурэмкIэ и Гупчэ илъэсым къыкIоцI IофшIэнышхо ышIагъ, ащ изэфэхьысыжь зэнэкъокъум къыщигъэлъэгъуагъ, — къыIуагъ Шэуджэн районым культурэмкIэ и ГъэIорышIапIэ ипащэу Къэрэбытэ Айдэмыр.
Культурэм и Унэу къуаджэхэм адэтхэр цIыф кIуапIэх. Ахэм гъэцэкIэжьынэу арашIылIагъэхэм, Iэмэ-псымакIэу ачIагъэуцуагъэхэм яшIуагъэкIэ ятIонэрэ щыIэныгъэ агъотыжьыгъэу, уахътэм диштэу мэлажьэх.
— Аужырэ илъэсхэм редгъэкIокIыгъэ зэнэкъокъухэм ялъытыгъэмэ, мыгъэ хэлажьэхэрэм нахь зыкъаIэтыгъ. Культурэм иунэхэм тагъэгушIуагъ, хэхъоныгъэшIухэр зэрашIыгъэр къагъэлъэгъуагъ. Ахэм ащылэжьэрэ ныбжьыкIэхэр бэ зэрэхъугъэри къыхэзгъэщы сшIоигъу. ГупшысакIэ ныбжьыкIэхэм къыздахьыгъ. Культурэм иунэхэм лъэбэкъукIэхэр ашIынхэу тафэлъаIо, — къыIуагъ лъэпкъ культурэмкIэ АР-м и Гупчэ иотдел ипащэу КIэмэщ Светланэ.
Лъэпшъыкъо
Фатим.
Сурэтыр: Анцокъо С.