Адыгеим имуниципальнэ образованиехэм якIэлэеджэкIуи 10-мэ Урысые Федерацием ипаспортхэр ятыжьыгъэнхэм фэгъэхьыгъэ Iофтхьабзэ республикэм и Правительствэ зычIэт унэм щыкIуагъ. Урысые программэу «Тэ – Урысыем тырицIыф» зыфиIорэм къыдыхэлъытагъэу къэралыгъом и Конституцие и Мафэ а Iофтхьабзэр рекIокIыгъ.

КъумпIыл Мурат Iофтхьабзэм къе­кIолIагъэхэм шIуфэс къарихызэ къызэрэхигъэщыгъэмкIэ, паспортыр – цIыфыр къэзыушыхьатырэ тхылъ къодыеу щытэп, ныбжьым зэрэхахъорэм, пшъэдэкIыжьым зыкъызэриIэтырэм, амалыкIэхэм зэрафакIохэрэм ятамыгъэу ар щыт.
«ШъуищыIэныгъэкIэ пшъэдэкIыжь зыхэлъ чэзыукIэр шъоублэ, мэхьанэшхо зиIэ унашъохэр шъуштэнхэу, сэнэхьатэу къыхэшъухыщтым шъуегупшысэнэу, унагъохэр жъугъэпсынхэу, тиобществэ ихэхъоныгъэ шъуиIахь хэшъушIыхьанэу къышъупыщылъ, — къыIуагъ КъумпIыл Мурат.
Республикэм и ЛIышъхьэ анахьэу анаIэ зытыраригъэдзагъэр паспортхэр къазыратыхэкIэ, хэгъэгум иныбжьыкIэхэм къэралыгъом и Конституцие къыдилъытэрэ фитыныгъэхэмрэ шъхьафитыныгъэхэмрэ яIэ зэрэхъущтхэм имызакъоу, ащ щыгъэпытэжьыгъэ пшъэ­рылъхэри агъэцэкIэнхэ фаеу зэрэхъущ­тыр ары.
Тыгъуасэ Адыгеим и ЛIышъхьэ паспортхэр аритыжьыгъэх Борсэ Мурат, Гъыщ Мэрджанэт, СтIашъу Тимур, Виктория Егоровам, Даур Расул, Милана Однолетко, Александр Гусевым, КIэрмыт Аминэ, Ярослав Холстининым, Хьэжъмако Мэдинэ. Ахэм зэкIэми еджэнымкIэ, творчествэмкIэ, общественнэ Iоф­шIэнымкIэ ыкIи спортымкIэ гъэхъэгъэшIухэр ашIыгъэх.
Адыгеим и ЛIышъхьэ кIэлэеджакIохэм афэлъэIуагъ ашIэрэм джыри нахь хагъэ­хъоным фэблэнхэу, гухэлъэу ашIырэм фэкIонхэу, республикэмрэ хэгъэгумрэ яхэхъоныгъэ афэукIочIыщт яIахь хашIыхьанэу.
«Ти Президентэу Владимир Путиным къызэрэхигъэщыгъэмкIэ, «шъуисэнаущыгъэрэ шъуигъэхъагъэхэмрэ яфэмэ-бжьымэ Урысыем ихэхъоныгъэ ­тырихьащт». Президентым пшъэрылъ къыгъэ­уцугъ ныбжьыкIэхэм сэнэхьатыр къыхахынымкIэ, гъэхъагъэхэр ашIынхэмкIэ амалыкIэхэр шъолъырхэм ащызэхащэнхэу. Непэ хэхъоныгъэ шъушIынымкIэ, шъуигухэлъхэр пхырышъущынхэмкIэ амалхэр нахьыбэу къызэрэшъуIэкIэхьащтхэм пае тфэлъэкIыщтыр зэкIэ ­Адыгеим щызэшIотэхы», — къыIуагъ КъумпIыл Мурат.
Адыгеим и ЛIышъхьэ Урысыем иныбжьыкIэхэм республикэмрэ хэгъэгумрэ апае текIоныгъакIэхэмрэ гъэхъэгъа­кIэхэмрэ ашIынхэу зафэлъэIо нэужым паспортхэр къазэраратыгъэхэм ыкIи Урысыем и Конституцие и Мафэ афэшI афэгушIуагъ.
Джащ фэдэу ныбжьыкIэхэм афэгушIуа­гъэх АР-м и Къэралыгъо Совет – Хасэм и Тхьаматэу Владимир Нарожнэр, гъэ­сэныгъэмрэ шIэныгъэмрэкIэ министрэм иапэрэ гуадзэу Пэрэныкъо Сусанэ, ныбжьыкIэ IофхэмкIэ Комитетым итхьаматэу Максим Галушкиныр, «Движение Первых» зыфиIорэм ишъолъыр къутамэ исовет итхьаматэу Ованес Шакарьянц. КIэлэеджакIохэм янэ-ятэхэм республикэм и ЛIышъхьэ кIэлэцIыкIухэм уахътэ къызэрафыхигъэкIыгъэм пае зэрэфэразэхэр къаIуагъ.
ЗэдэгущыIэгъум илъэхъан анаIэ ­къызэратыригъэтыгъэм пае КъумпIыл Мурат зэрэфэразэхэр кIэлэеджакIохэм къаIуагъ ыкIи «Движение Первых» зыфиIорэм Iофэу щашIэрэм, гъэхъагъэу, гухэлъэу яIэхэм афэгъэхьыгъэу къыфаIотагъ. Республикэм и ЛIышъхьэ Iоф зыщишIэрэ кабинетыр ахэм къаригъэлъэгъугъ, ащ нэужым АР-м и ЛIышъхьэ и Координационнэ Гупчэ иIофшIэн нэIуасэ фишIыгъэх. Мы мэфэ дэдэм кIэлэеджакIохэм янэ-ятэхэр ягъусэхэу АР-м и Лъэпкъ музей икъэгъэлъэгъонхэу Урысыем и Конституцие и Мафэ, Адыгэ Республикэм итарихъ, иуцун афэгъэ­хьыгъэхэр зэрагъэлъэгъугъэх.
АР-м и ЛIышъхьэ
ипресс-къулыкъу