Тэхъутэмыкъое районым ит поселкэу Яблоновскэм иурамэу Титовым ыцIэ зыхьырэм фэтэрыбэу зэхэт унэу тетхэм ащыщэу 64-рэ,66-рэ ыкIи 68-рэ зиномерхэм ящагухэр джырэблагъэ агъэкIэжьыгъэх.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, ащкIэ «ПсэупIэмрэ къэлэ щыIакIэмрэ» зыфиIорэ лъэпкъ проектым ипхырыщын пае аштэгъэ федеральнэ проектэу Iэрыфэгъу къэлэ щыIакIэ гъэпсыгъэным фэгъэхьыгъэм къыдыхэлъытагъэу 2024-рэ илъэсымкIэ Адыгеим щагъэнэфэгъагъэхэм язэшIохын аухыгъ.
Щагухэм яавтомобиль ыкIи лъэсрыкIо гъогухэм, джэгупIэхэм асфальтэу е мыжъо зэхэгъэчъыхьагъэу ателъыгъэхэр лъэхъаным диштэрэ материалхэмкIэ зэблахъугъэх, тамыгъэхэр зыщищыкIагъэм щагъэуцугъэх е щагъэтхъыгъэх, спорт ыкIи джэгупIэ площадкэхэр ащашIыгъэх, тIысыпIэхэр, хэкIидзапIэхэр, къэзыгъэнэфыхэрэр ащагъэуцугъэх, къэгъагъэхэр, кондэ дахэхэр ащагъэтIысхьагъэх. Поселкэм иадминистрацие къызэрэщаIуагъэмкIэ, IофшIэнхэр игъом ыкIи шапхъэхэм адиштэу подрядчикым зэшIуихыгъэх.
ПстэумкIи общественнэ чIыпIитIурэ щагуитфырэ мы илъэсым поселкэу Яблоновскэм щагъэкIэжьыгъ. Ахэм сомэ миллион 38,5-рэ атефагъ.
Адыгеир пштэмэ, «ПсэупIэр ыкIи къэлэ щыIакIэр» зыфиIорэ лъэпкъ проектым къыдыхэлъытагъэу чIыпIэ 40 щызэтырагъэпсыхьажьыгъ. А пчъагъэм щыщэу 8-р - общественнэх, 32-р фэтэрыбэу зэхэт унэхэм ящагух. Ахэм зэкIэмкIи сомэ миллион 505,3-рэ апэIухьагъ.