ИскусствэхэмкIэ республикэ еджапIэхэм якIэлэегъаджэхэм сурэтшIынымкIэ ыкIи Iэпэщысэхэм яшIынкIэ язэнэкъокъу хэлэжьэгъэ IофшIагъэхэм якъэгъэлъэгъон АР-м и Сурэт къэгъэлъэгъуапIэ щэкIо.

Шъолъырым и Къэралыгъо программэу «Культурэм хахъо егъэшIыгъэныр» зыфиIорэм къыдыхэлъытагъэу ар зэха­щагъ. Мыгъэ я 14-у Iофтхьабзэр рекIокIыгъ ыкIи осэшI купым хэтыгъэхэм къызэрэхагъэщы­гъэмкIэ, блэкIыгъэ илъэсым егъэ­пшагъэмэ, мызыгъэгурэр нахь гъэшIэгъоныгъ.
— Мыгъэрэ зэнэкъокъум хэлэжьа­гъэр нахь макIэми, лъэгъупхъэу хъугъэ. Iоф­шIагъэхэм узяплъыкIэ, респуб­ликэм кIэлэегъэджэ дэгъухэр зэриIэхэр зэхэошIэ. Ирина Бельдихинам исурэтхэр лъэшэу сыгу рихьыгъэх. АкварелькIэ шIыгъэ IофшIагъэу «Пхъэшъхьэ-мышъхьэхэр» зыфиIорэм дэгъу дэдэу дэлэжьагъ. Арышъ, джащ фэдэу ныбжьыкIэхэм щысэшIу шъуафэхъоу шъу­лэжьэнэу сышъуфэлъаIо, — къы­щиIуагъ къэгъэлъэгъоным икъызэIухын фэгъэхьыгъэ Iофтхьабзэм АР-м культурэмкIэ изаслуженнэ IофышIэу Фатима Сулеймановам.
Ащ дыригъэштагъ Урысыем культурэмкIэ изаслуженнэ Iоф­ы­шIэу, АР-м изаслуженнэ сурэтышIэу, АР-м и Сурэт къэгъэлъэгъуапIэ ипащэу Бырсыр Абдулахь.
— Анахь дэгъухэм якъыхэхынкIэ екIолIакIэр IэпэIэсэныгъэр ары. Сыдэу щытми, шъукIэлэегъадж, лIэужыкIэхэр шъогъасэх, арышъ, ар шъхьаIэ. Мыгъэрэ къэгъэлъэгъоныр ар къызхэщырэ IофшIагъэхэмкIэ баи, — къыIуагъ ащ.
ПстэумкIи IофшIэгъи 130-рэ къэгъэлъэгъоным хэлажьэ. Живописыр, Iэпэщысэхэр, лъэпкъ IэшIагъэхэр ыкIи графикэр ахэм къырагъэлъэгъукIы. ИскусствэхэмкIэ кIэлэцIыкIу еджапIэу Лъэцэрыкъо Кимэ ыцIэ зыхьырэм лъэпкъ IэпэщысэхэмкIэ икIэлэегъаджэу Абрэдж Гощэфыжь зэнэкъокъум хэушъхьафыкIы­гъэу зыфигъэхьазырыгъ. Гобеленэу «Тарихъ» зыфиIорэм илъэсныкъорэ дэлэжьагъ. Адыгеим ичIыгу хэушъэфэгъэ тарихъ пкъыгъохэр къизыгъэлъэгъукIырэ IофшIагъэр IэкIэ ыхъыгъ.
— Сэ сыдигъуи адыгэм итарихъ сшIогъэшIэгъон. СикIас археологиер. Бэхэр къагъотхэу къытфаIуатэ. Ау ахэр чIым етIэхэ зыхъукIэ, зэпырагъэзэрэ лъэхъаныр зыфэдэр сыдигъуи теубытагъэу ашIэрэп: пчъагъэу зэтелъхэу зэхэкIухьагъэх, зэщыкъуагъэ. Джар икъоу къызэрэдгурымыIорэр сиIофшIагъэ къыщысэгъэлъагъо. КъыхэкIы ычIэгъ дэдэ къыщыбгъотырэ тарихъ пкъыгъор зэрэшIыгъэм, зыхэшIыкIыгъэм, идэгъугъэ ыужыкIэ къэбгъотырэм шъхьа­дэкIэу. Джахэм урагъэгупшысэ сиIофшIагъэ, — къыддэгощагъ Абрэдж Гощэфыжь.
Графикэм ылъэныкъокIэ кIэлэегъаджэхэм язэнэкъокъу хэлэжьагъ искусствэхэмкIэ Кощхьаблэ икIэлэцIыкIу еджапIэу М. Хьагъэуджым ыцIэ зыхьырэм щылэжьэрэ Тутарыщ Малыч. Ятэжъэу Анцокъо шым тесэу ащ къышIыгъ.

— Сятэжъ, Тутарыщ Анцокъо, зэуиплIымэ ахэлэжьагъ: «дивизие Iэлым» хэтыгъ, граждан, Хэгъэгу заохэм ахэлэжьагъ. Шыу бэлахьыгъэу цIыфхэм яшIэжь къыхэнагъ. Ыныбжь хэкIотагъэу сэри ар къэсэшIэжьы. Арыти, сурэткIэ къизгъэлъэгъукIы сшIоигъуагъ, — къытфиIотагъ Тутарыщ Малыч.
Абрэдж Гощэфыжьрэ Тутарыщ Малычрэ яIофшIагъэхэм я 2-рэ шъуашэ зиIэ дипломхэр къалэжьыгъ. Джащ фэдэу зэнэкъокъум хэлэжьагъэхэм зэкIэми яфэшъошэ дипломхэр афагъэнэфагъэх.
ЖивописымкIэ ыкIи Iэпэщысэ шIынымкIэ искусствэхэмкIэ республикэ еджапIэхэм якIэлэегъаджэхэм язэнэкъокъу хэлэжьэгъэ IофшIагъэхэм якъэгъэ­лъэгъон мы тхьамафэм ыкIэ нэс кIощт. ШIоигъоныгъэ зиIэхэм ахэр зэрагъэлъэгъунхэ алъэ­кIыщт.
НэкIубгъор зыгъэхьазырыгъэр
Анцокъо Ирин.
Сурэтхэр авторым иех.