Теннис цIыкIумкIэ Краснодар краим изэIухыгъэ зэнэкъокъоу «Надежды Кубани» зыфиIорэм ия 4-рэ тур Адыгеим испортсменхэр хэлажьэх.

Славянск-на-Кубани щызэхащэгъэ турнирым Краснодар ыкIи Ставрополь крайхэм, Белгородскэ, Воронежскэ, Липецкэ, Ростовскэ хэкухэм, Къырым ыкIи Адыгеим ялIыкIохэм зыщаушэты.
Зыныбжь илъэс 12-м нэмысыгъэхэм язэнэкъокъу аухыгъ. Бзаго Дамир, Кирилл Панькиныр, Ирина Славновар ыкIи Бзаго Даринэ ащ хэлэжьагъэх. Ахэм хагъэунэфыкIырэ чIыпIэхэр къыдахыгъэхэп, ау къэгъэлъэгъон дэгъухэр яIэх.
Зыныбжь илъэс 14-м ыкIи 16-м шIомыкIыгъэхэм язэнэкъокъухэр рагъэжьэщтых. Адыгеим илIыкIохэм гъэхъэгъэшIухэр ашIынхэу афэтэIо.