Мыщ фэдэ шъхьэ зиIэ къэгъэлъэгъон Адыгэ Республикэм и Сурэт къэгъэлъэ­гъуапIэ къыщызэIуахыгъ. Урысыем исурэтышIхэм я Союз икъутамэу Адыгеим щыIэр ащ кIэщакIо фэхъугъ.
ТекIоныгъэшхом икъыдэхын зиIахьышIу хэзылъхьэгъэ цIыфхэм ыкIи хэушъхьафыкIыгъэ дзэ операцием илIыхъужъхэм афэгъэхьыгъэ сурэт 60 къэгъэлъэгъоным хэхьагъ. Ахэр Урысыем ыкIи АР-м исурэтышIхэм яIофшIагъэх.
Адыгэ Республикэм исурэтышIхэм я Союз итхьаматэу Елена Абакумовам зэхахьэр къызэIуихыгъ.
— Тикъэралыгъо икъэухъумэн зиIахьышхо хэлъ цIыфхэм ящытхъу ины. Ахэм лIыхъужъныгъэу зэрахьагъэр тихэгъэгу итарихъ егъэшIэрэу къы­хэнэжьыщт, — къыIуагъ ­Елена Абакумовам.
ХэушъхьафыкIыгъэ дзэ операцием хэкIодагъэхэм яунагъохэр зэIукIэм къы­рагъэблэгъагъэх. ЛIы­хъужъхэм афэгъэхьыгъэ усэхэм сурэтышI ныбжьыкIэхэр къяджагъэх.
Заом иветеранхэм, илIыхъу­жъ­­хэм ыкIи хэкIодагъэхэм ягугъу къашIыгъ.
Адыгеим исурэтышIхэм я Союз хэтэу, искусствоведениемкIэ кандидатэу Надежда Тертышник, искусcтвоведениемкIэ кандидатэу Къуекъо Мариет лIы­хъужъмэ афэгъэхьыгъэ десэхэр къекIолIагъэхэм къафаIотагъ.

Советскэ Союзым и ЛIы­хъужъэу Андырхъое Хъусен игъэхъагъэхэм, иусэхэм, джащ фэдэу Жэнэ Къырымызэ итворчествэ къатегущыIагъэх. УсэкIо-дзэкIолIхэм яусэхэм студентхэр къяджагъэх.
Ти Родинэ изыкIыныгъэ, ти­лъэпкъхэм язэкъошныгъэ имэхьанэ зэхахьэм пхырыщыгъэу щытыгъ.
ХэушъхьафыкIыгъэ дзэ операцием илIыхъужъэу илъэс 23-рэ нахь къэзымыгъэшIэгъэ Виктор Чижиковым ищыIэныгъэ гъогу къыраIотыкIыгъ. ИцIыкIу­гъом щыублагъэу дзэ сэнэхьатым кIэхъопсыщтыгъэ ныбжьыкIэр «Давыдов Брод» щыкIогъэ зэпэуцужьым щыхэкIодагъ. Виктор зыщеджэгъэ еджапIэм «Парта Героя» зыфиIорэр къыщыфызэIуахыгъ.
— Хэгъэгур къэухъумэгъэным зигъа­шIэ езыпхыгъэхэм, лIыхъужъныгъэ зезыхьэгъэ пстэуми шъхьащэ афэтэшIы. Ахэр зыпIугъэ ныхэм тхьашъуегъэпсэу ясIомэ сшIоигъу. ХэушъхьафыкIыгъэ дзэ операцием хэлэжьэрэ тидзэкIолIхэу лIыхъужъныгъэр зишапхъэхэм щытхъур адэжь, тафэраз. КъыткIэхъухьэрэ лIэужхэм щысэшIу афэхъунхэр зэрэтиIэхэм тырэгушхо. Ахэм ацIэхэр тарихъым хэтхагъэх ыкIи егъашIи тщыгъу­п­­шэщтхэп, — къыIуагъ Адыгеим ­ибзылъфыгъэхэм я Союз итхьамэтэ гуадзэу Натхъо Разыет.
Лъэпшъыкъо Фатим.
Сурэтхэр авторым иех.