Я III-рэ республикэ форумэу «Госпаблики. Вектор развития диалога власти и общества» зыфиIорэр Мыекъуапэ щыкIуагъ.

Iофтхьабзэм хэлэжьагъэх АР-м и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, АР-м цифрэ, къэбарлъыгъэIэс, телекоммуникационнэ технологиехэмкIэ иминистрэу Шыу Заурбэч, Адыгеим и Лъэпкъ банк ипащэу Сергей Самойленкэр, АР-м шъолъыр гъэIорышIэнымкIэ и Гупчэ ипащэу Къоджэшъэо Казбек, автоном мысатыу организациеу «Диалог Регионы» иэкспертхэр, автоном мысатыу организациеу «АР-м иконтент-гупчэ» иIофышIэхэр.
Адыгеим и ЛIышъхьэу ­КъумпIыл Мурат ыцIэкIэ ­Владимир Свеженец форумым хэлажьэхэрэм шIуфэс къари­хыгъ. «Къэралыгъо пабликхэр» зыфиIорэ системэм хэхъоныгъэ егъэшIыгъэнымкIэ гъэхъэгъэ дэгъухэр зэрашIыгъэхэм фэшI ар Iофтхьабзэм хэлажьэхэрэм къафэгушIуагъ.
— Шъолъыр гъэIорышIэнымкIэ Гупчэм хэбзэ къулыкъухэм­рэ цIыфхэмрэ зэрипхынхэ ылъэкIыгъ. Муниципалитетхэмрэ къулыкъухэмрэ цIыфхэм закъы­зэрафагъазэрэ тхылъхэм нахь куоу Iоф адашIэ хъугъэ. Ащ ыпкъ къикIыкIэ цIыфхэм ящыIэкIэ-псэукIэ зыкъегъэIэтыгъэным, общественнэ чIыпIэхэм, инфраструктурэм язегъэушъомбгъун япхыгъэ Iофыгъуабэхэр нахь псынкIэу зэшIуахыхэ хъугъэ, — къыIуагъ Владимир Свеженец.

Джащ фэдэу Къоджэшъэо Казбеки Iофтхьабзэм хэлажьэхэрэм закъыфигъэзагъ. Гупчэм ипащэ зэрэхигъэунэфыкIы­гъэмкIэ, непэ къулыкъухэмрэ муниципалитетхэмрэ къэралыгъо пабликхэр IэубытыпIэ къызыфашIыхэзэ, занкIэу цIыфхэм Iоф адашIэ.
— Республикэм иорганизацие 662-мэ социальнэ хъытыухэу «ВКонтакте», «Одноклассники», мессенджерэу «Телеграмым» къэралыгъо пабликхэр ащыряIэх. Ахэм нэбгырэ мини 129,3-рэ акIэтхагъ. Мы аужырэ тхьамафэм нэбгырэ мини 184,6-рэ ахэм яджагъ, — къыIуагъ Къо­джэшъэо Казбек.
Iофтхьабзэм икIэух республикэм икъэралыгъо паблик анахь дэгъухэм яадминистраторхэм тынхэр афагъэшъошагъэх.