ФутболымкIэ Адыгэ Республикэм икIымэфэ чемпионат къыдыхэлъытэгъэ ешIэгъухэр мы зыгъэпсэфыгъо мафэхэм рагъэжьагъэх.

Ветеранхэм ялигэ команди 5 хэт, ахэм туритIу къызэранэ­кIыгъ. Ушъхьагъу зэфэшъхьафхэмкIэ мызыгъэгум зэнэкъокъум хэлажьэхэрэп «Звезда», «Дорожник» ыкIи «Мотодром» зыфиIохэрэр. Апэрэ чIыпIэм фэбэнэщтых командэхэу «Штурм», «ВНГ», «Щагъдый», мыхэм текIоныгъэхэмкIэ турнирыр ­аублагъ. ЯтIонэрэ турым лъэпкъ гвардием идзэхэм якомандэ «Делотехникэм» IукIагъ ыкIи 3:0-у къы­шIуихьыгъ. «Штурмыр» «Джокерым» нахь лъэшыгъ, пчъагъэр — 2:0.
Апэрэ лигэм командэ 14 щешIэ. Ахэм яIэгъэ зэIукIэгъухэм язэфэхьысыжьхэр: ­«МФОК ­Ошъутен» — «Легион» — 3:1, «Ошъутен» — «Легион» — 4:3, «Канониры» — «Хьатыгъужъы­къуай» — 1:4, «Кавказ Адэмый» — «Космос» — 2:3, «Спортмас­тер-2» — «Тульскэр» — 0:1.

Хабзэ зэрэхъугъэу, апшъэрэ лигэм щешIэрэ командэхэм язэIукIэгъухэр анахь гъэшIэгъоных. Мыщ команди 7-мэ зыщаушэты. Апэрэ турым къыдыхэлъы­тагъэу зэнэкъокъум апэрэу хэлэжьэрэ «Патриот 01 Улапэр» «МКУ СОЦ» зыфиIорэм дешIагъ ыкIи 4:0-у къышIуихьыгъ. Лигэм анахь щыцIэрыIо командэу «Урожаир» «Картонтара-Шытхьалэм» IукIагъ ыкIи 5:1-у текIоныгъэр къыдихыгъ. «МФОК Ошъутен­эмрэ» «СШОР-2008» зыфиIорэмрэ язэIукIэгъу 2:2-у аухыгъ. Командэу «АГУ-р» мы мафэм джэгугъэп.