Шахмат псынкIэхэмкIэ турнир къуаджэу Кощхьаблэ ифизкультурнэ комплексэу
М.Н. Чыржьыным ыцIэ зыхьырэм щыкIуагъ.

Кощхьэблэ районым иадминистрацие финансхэмкIэ игъэIорышIапIэ ипэщагъэу, игъонэмысэу 2000-рэ илъэсым тыгъэгъазэм и 2-м зидунай зыхъожьыгъэ Болэкъо Рэщыд ишIэжь фэгъэхьыгъэ зэнэкъокъум спортсмен 40 хэлэжьагъ. Ахэр Адыгэ Республикэм имуниципальнэ образованиехэм, Краснодар ыкIи Ставрополь крайхэм къарыкIыгъэх.
Турнирыр швейцарскэ шIыкIэм тетэу рагъэкIокIыгъ, тури 9 къыдыхэлъытэгъагъ. Ставрополь краим испортсменэу Станислав Пашановым очко 7,5-рэ ригъэ­къугъ ыкIи текIоныгъэр къыди-­
х­ыгъ. Зэнэкъокъум аужырэ ешIэгъоу ащ щыриIагъэр хагъэ­унэфыкIырэ чIыпIэм фэбэнэрэ чIыпIэ шахматистэу ГъукIэлI Долэтбый къышIуихьыгъ. ЯтIонэрэ хъугъэ Краснодар краим ишахматистэу Дмитрий Репниковыр. Ящэнэрэ чIыпIэр фагъэшъошагъ очкоуи 6,5-рэ изыгъэкъугъэ Мые­къуапэ илIыкIоу Даниил Козленкэм. Шахматисти 5-мэ очко 6,5-рэ зырыз яIагъ, ау къэгъэлъэ­г­ъон тедзэхэмкIэ Репниковымрэ Козленкэмрэ хагъэунэфыкIырэ чIыпIэхэр къыдахыгъэх.

Адыгеим гъогогъу пчъагъэрэ ичемпионкэу Мария Пивоваровам я 5-рэ чIыпIэр къыхьыгъ. Хагъэ­унэфыкIырэ чIыпIэхэр къыдэзыхыгъэхэм кубокхэр, медальхэр, дипломхэр ыкIи ахъщэ шIухьафтынхэр афагъэшъошагъэх. Турнирым изэхэщэн ыкIи ахъщэ шIухьафтынхэр гъэнэфэгъэнхэм кIэщакIо фэхъугъэх Болэкъо Рэщыд иныбджэгъухэмрэ Кощхьэблэ къоджэ псэупIэм иадминистрациерэ.