ФутболымкIэ Адыгэ Рес­публикэм икIымэфэ чемпионат мы зыгъэпсэ­фыгъо мафэхэм рагъэ­жьэщт.

Апэрэ турым къыдыхэлъыта­гъэу командэхэм ешIэгъу 13 яIэщт.
ЗэкIэмкIи командэ 27-мэ зау­шэтыщт. Ахэм ащыщэу 7-р —апшъэрэ лигэм, 14-р — апэрэ лигэм, 6-р — ветеранхэм ялигэ хэлэжьэщтых.
Ветеранхэм ялигэ хэт командэхэу «Дорожникымрэ» «Щагъдыимрэ» яешIэгъу тыгъэгъазэм и 7-м пчэдыжьым сыхьатыр 10-м рагъэжьэщт. Ащ ыуж «Штурмыр» — «Джокерым», «ВНГ-р» — «Делотехникэм» адешIэщтых.
«МФОК-у Ошъутенэмрэ» «Олим­пымрэ» язэIукIэгъукIэ апэ­рэ лигэм щешIэхэрэм язэнэкъокъу рагъэжьэщт. Ар тыгъэгъа­зэм и 7-м пчыхьэм сыхьатыр 7-м аублэщт. Адрэ ешIэгъухэр тыгъэ­гъазэм и 8-м щыIэщтых. Мы ма­фэм ешIэщтых: «Ошъутен» — «Легион», «Канониры» — «Хьатыгъужъыкъуай», «Кавказ Адэмый» — «Космос», «Спортмас­тер-2» — «Тульскэр», «СШОР-9» — «Дружина», «Альянс» — «Спортмастер».

Ау футболыр зыгу рихьыхэрэр анахьэу зылъыплъэщтхэр апшъэрэ лигэм щешIэхэрэм язэIукIэгъухэр ары. Мыекъуапэ, Шытхьалэ, Джэджэ, Мыекъопэ ыкIи Красногвардейскэ районхэм якоманди 7 зэнэкъокъущтых. Апэрэ турым къыдыхэлъытагъэу зэIукIэщтых Мыекъопэ районыр къэзыгъэлъэгъорэ «Урожаимрэ» Шы­тхьалэ икомандэу «Картонта­рэмрэ».
Джащ фэдэу мы мафэм зэIу­кIэщтых: «МКУ СОЦ» — «Пат­риот 01», «МФОК Ошъутен» — «СШОР 2008».
Чемпионатым ишIухьафтын фонд сомэ мин 225-рэ мэхъу. ЗэIукIэгъухэм афэгъэхьыгъэ тхыгъэхэр тигъэзет къыхиутыщтых. Анахь лъэшхэр атерэкIох!