Къуаджэхэу ШэхэкIэйрэ Хьаджыкъорэ ащыщ артист ныбжьыкIэхэр театральнэ къэшIыгъохэм афэгъэхьыгъэ фестиваль-зэнэкъокъоу Шъачэ щызэхащэгъэм илауреат хъугъэх.

Фестивалэу «Си Хэгъэгу» зыцIэр лъэпкъхэм яныдэлъфыбзэкIэ гъэ къэс рагъэкIокIы, ащ Шъачэ икIэлэцIыкIу IыгъыпIэхэмрэ иеджапIэхэмрэ якIэлэеджакIохэр хэлажьэх.
Къалэм щыпсэурэ лъэпкъ зэфэшъхьафхэм шъхьэкIафэ афашIэу, ахэм ятарихъ, яшэн-­хабзэхэм ащыгъуазэхэу къыткIэхъухьэрэ лIэужхэр пIугъэнхэм мы гъэсэныгъэ проектыр фэIорышIэ. Апэрэ зэнэкъокъоу зэхащэгъагъэм шIогъэшхо къызэритыгъэм къыхэкIэу, ар илъэс къэс рагъэкIокIызэ ашIынэу рахъухьагъ. Пшъэрылъ шъхьа­Iэхэм адакIоу, фестивалым Iофыбэ егъэцакIэ, кIэлэцIыкIу творчествэм хэхъоныгъэ ышIыным, кIэлэеджакIохэм яныдэлъфыбзэ ыкIи театральнэ искусствэр шIу алъэгъуным, сэнаущыгъэ зыхэлъ ныбжьыкIэхэр къыхэгъэщыгъэнхэм фэIорышIэ.
– КIэлэцIыкIу творчествэм ифестиваль-зэнэкъокъоу «Си Хэгъэгу» зыфиIорэр Шъачэ гъэсэныгъэмкIэ игупчэ 2006-рэ илъэсым къыщегъэжьагъэу зэхещэ, – къыхигъэщыгъ муниципалитетым гъэсэныгъэм­рэ шIэныгъэмрэкIэ игъэIорышIапIэ ипащэу Ольга Медведевам. – КъыткIэхъухьэрэ лIэужхэм ежьхэм ялъэпкъ хабзэхэри нэмыкIхэм яехэри зэфэдэу шIу алъэгъунхэм фес­тивалыр фытегъэпсыхьагъ.
Зэнэкъокъум игала-концертэу къалэу Шъачэ дэт гимназиеу­ ­N 9-м щыкIуагъэм къэгъэлъэгъон 16 къыщашIыгъ, ахэр адыгабзэкIэ, ермэлыбзэкIэ ыкIи белорусыбзэкIэ кIуагъэх. Аныбжь елъытыгъэу хэлажьэхэрэр купищэу гощыгъагъэх ыкIи театральнэ къэгъэлъэгъонхэм адакIоу музыкант ныбжьыкIэмэ яIэпэIэсэныгъи уасэ фашIыгъ.
ЗэхэщакIохэм къызэрэхагъэ­щыгъэмкIэ, къалэм гъэсэныгъэм­кIэ иучреждениехэм ятворческэ купмэ театральнэ къэгъэлъэгъо­нэу къашIыгъэхэр ныдэлъфыбзэкIэ тхыгъэ литературнэ произведение псаухэм е пычыгъо­хэм атехыгъэхэу щытыгъэх, кIэкIэу пьесэм икупкI урысыбзэкIэ къаIотэжьыщтыгъ. Ахэм экспертмэ осэ тэрэз афашIыным фэшI анахьэу анаIэ зытырадзэгъэ лъэныкъохэр: къэгъэлъэгъоным идэгъугъ, актерхэм яIэпэIэсэныгъ, мэкъамэу кIалъхьагъэр, декорациер, гукъэкIымрэ художественнэ екIолакIэмрэ ыкIи спектаклэу къагъэлъагъо­рэм культурэу хэлъыр. КIэлэцIыкIухэр хъулъфыгъэ, бзылъфыгъэ ыкIи ятIонэрэ планым щыIэ роль анахь дэгъухэмкIэ къыхагъэщыгъэх. ЗэкIэми дип­ломхэр афагъэшъошагъэх.
Къэндзалмэ ялъэпкъ пшысэу «Пшъэшъищ зыфиIорэр» адыгабзэкIэ къэзыгъэлъэгъуагъэхэр Хьаджыкъо дэт еджапIэу N 94-м иартист ныбжьыкIэхэу КIакIыхъу Алин, Сажъо Сание, КIакIыхъу Саидэ, Милена Цадурян ыкIи Шъхьабэ Амелия. Ахэм япэщагъэх ныдэлъфыбзэмкIэ ыкIи литературэмкIэ кIэлэегъаджэхэу Гъуашъо Маринэрэ Нэпсэу Русетэрэ, кIэлэцIыкIухэм ящэнэрэ шъуашэ зиIэ дипломхэр къафагъэшъошагъэх. Сажъо Сание хэушъхьафыкIыгъэ тынэу «Бзылъфыгъэ роль анахь дэ­гъур» зыфиIорэмкIэ къыхагъэщыгъ.

Лъэныкъоу «Театральнэ творчествэр» зыфиIорэмкIэ диплом анахьыбэ къыдэзыхыгъэхэр ШэхэкIэй дэт гурыт еджапIэу ­N 90-м икуп ары. Адыгэ пшысэм техыгъэ къэгъэлъэгъоным хэлэжьагъэх Хъущт Алинэ, Влада Андреевар, Тимур Чикаидзе, Лые Ясминэ, Сабина Хваржевар, Сэкурэ Дамир, ЛIыф Джамбулат, Гъуашъо Амин, ЛIыф Саидэ, ЛIыф Бислъан ыкIи ТIэшъу Амирам. Ар зэкIэми анахь IэпэIасэу къыхагъэщыгъ ыкIи дипломэу апэрэ шъуашэ зиIэр къыфагъэшъошагъ. Урыс лъэпкъ пшысэу «ЧIырыкIу» зыцIэр зыгъэуцугъэхэр ыкIи къэзыгъэлъэ­гъуагъэхэр Гъуашъо Замир, ЛIыIужъу Руслъан, ЛIыф Казбек, ТIэхъу Милена, Къэбжь Асият, Гъыщ ТIахьир, Джамиля Абдулгапуровар ыкIи ЛIыф Марет. Мыхэм яIофшIагъэ осэшIу къыфашIыгъ, дипломэу ятIонэрэ шъуашэ зиIэр къалэжьыгъ. Ащ фэшъхьафэу мы еджапIэм илIыкIохэр лъэныкъуищкIэ къыхагъэ­щыгъэх.
Дипломэу «Бзылъфыгъэ роль анахь дэгъур» Влада Андреевам къыратыгъ, «Хъулъфыгъэ роль анахь дэгъур» – Тимур Чикаидзе ыкIи ЛIыф Казбек, «ЯтIонэрэ планым щыIэ роль анахь дэ­гъур» – ЛIыф Марет ыкIи ЛIыIужъу Руслъан.
Лъэныкъоу «Инструментальнэ творчествэр» зыфиIорэм щатекIуагъэр Гъуашъо Амина (музыкальнэ пащэр Хъущт Мариетта), дэгъу дэдэу адыгэ ­лъэпкъ орэдэу «Ислъамыер» къызэрэригъэIуагъэм фэшI.
Ныбэ Анзор.