Сурэттех ныбжьыкIэу Виктория Сысоевам икъэгъэлъэгъон КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэ къыщызэIуахыгъ.

«Магия творчества» джары ащ зэреджагъэхэр. Викторие ихэушъхьафыкIыгъэ къэгъэлъэгъон сурэттехыгъэ 80 хэхьагъ. Ахэр жанрэ зэфэшъхьафхэм арылъых. Портретхэр, чIыопсым идэхагъэ къизыIотыкIырэр ащ иIофшIагъэхэм къябэкIы.
Зэхахьэр къызэIуихыгъ музеим ипащэ игуадзэу Фатима Сулеймановам.
— Виктория Сысоевар сэнаущыгъэшхо зыхэлъ ныбжьыкI. Исурэт пэпчъ щыIэныгъэм ихъу­гъэ-шIагъэхэм, дунай хьалэмэтым ухащэ. Сурэттехыным ылъэныкъо зэфэшъхьафхэр зыгъэфедэрэ IэпэIасэм гъогу маф есIомэ сшIоигъу, — къы­Iуагъ Фатима Сулеймановам.
Iофтхьабзэм икъызэIухын хэлэжьагъэх Адыгэ къэралыгъо университетым искусствэхэмкIэ иинститут ипащэу Тыгъужъ Фатимэ, Урысыем исурэттеххэм я Союз икъутамэу Адыгэ Республикэм щыIэм, Мыекъуапэ икъэлэ сурэттех клубэу «Лэгъо­накъэ» ипащэу Аркадий Кирнос ыкIи нэмыкIхэри.
Виктория Сысоевар АР-м искусствэхэмкIэ иколледж ще­джагъ, нэужым Адыгэ къэралыгъо университетым искусст­вэхэмкIэ иинститут ишIэныгъэ­хэм ащыхигъэхъуагъ. Апшъэрэ еджапIэм чIэсызэ сурэт тырихынэу ыублагъ, ежь-ежьырэу сурэттехыным ишъэфхэр зэригъэшIагъ, иIэпэIэсэныгъэ хигъэ­хъуагъ. Нэужым зэнэкъокъоу Адыгеим щызэхащэхэрэм защиушэтыгъ ыкIи сурэттехыныр IэкIэуIэшIуагъ.
Викторие Адыгэ къэралыгъо университетым иныбжьыкIэ гъэзет джырэ уахътэм сурэттехэу щэлажьэ. СурэтшIыным зыпылъ илъэси 10-м къыриубытэу шъолъыр, къэралыгъо ыкIи дунэе зэнэкъокъу 60-мэ ахэлэжьагъ. ТекIоныгъэ ыкIи хагъэунэфыкIырэ чIыпIэхэр мызэу, мытIоу къащихьыгъ.
2017-рэ илъэсым щыубла­гъэу Урысыем исурэттеххэм я Союз икъутамэу Адыгэ Республикэм щыIэм иклубэу «Лагъонакъэ» хэт.
«Лагъонакъэм» ипащэу Аркадий Кирнос сурэттех ныбжьыкIэм иIэшIагъэхэм къатегущы­Iагъ:
«СурэтшIынри сурэттехынри зэдэбгъэцэкIэныр IэшIэхэп. Ау Виктория Сысоевам лъэныкъуи­тIури къыдэхъу. Ащ иIофшIагъэ­хэр дахэу, узыIэпащэу гъэпсыгъэх. ЧIыопсым, тарихъым, псэушъхьэхэм, цIыфхэм ящыIакIэ, нэмыкIхэм яхьылIэгъэ сурэтхэр гъэшIэгъонэу гъэпсыгъэх. IэпэIасэм исурэт техыгъэ­хэр зыми фэдэхэп, нэмыкI IэшIагъэхэм ямышIыкIэу къахэзгъэщырэ нэшанэхэр иIэх».
— Викторие исурэтхэм дунаим идэхагъэ ахэолъэгъукIы, ахэм гукIэ узыIэпащэ. ЦIыфхэм язэхашIэ сурэтхэмкIэ къызэрыбгъэлъэгъон плъэкIыщтыр непэ къыушыхьатыгъ. Ежь нэгу ихыгъэу зэрыщытым фэдэу исурэт­хэри зэIухыгъэх, — къы­Iуагъ къэгъэлъэгъоным еплъы­гъэ Апыщ Фатимэ.
Iофтхьабзэр къагъэкIэрэкIагъ АКъУ-м истуденческэ къэшъокIо купэу «Нартым» (скрипкэр — апшъэрэ еджапIэм икIэлэегъа­джэу Александра Буцаевар), искусствэхэмкIэ Адыгэ респуб­ликэ колледжэу Тхьабысымэ Умар ыцIэ зыхьырэм иэстраднэ отделение истудентхэм.
Сурэттех ныбжьыкIэм икъэ­гъэлъэгъон тыгъэгъазэм и 16-м нэс зэIухыгъэщт. Искусствэр зышIогъэшIэгъонхэр ащ еплъын­хэу зэхэщакIохэм рагъэбла­гъэх.
Лъэпшъыкъо
Фатим.
Сурэтхэр авторым иех.