Урысые Iофтхьабзэу «ШIоигъоныгъэ­хэм япцIыикъ чъыг» зыфиIорэр шэкIогъум и 15-м хэгъэгум щырагъэжьагъ. Ащ изэхэщакIор «Движение Первых» зыфиIорэр ары, ныбжьыкIэхэм яIоф­хэмкIэ Федеральнэ агентствэр ащ IэпыIэгъу къыфэхъу. Хабзэ зэрэхъугъэу, илъэс къэс Адыгеир ащ хэлажьэ. Iофтхьабзэм иофициальнэ сайтэу «елкажеланий.рф» зыфиIорэм 2024-рэ илъэсым шэкIогъум и 15-м къыщегъэ­жьагъэу тыгъэгъазэм и 20-м нэс лъэIу тхылъхэр агъэхьынхэ алъэкIыщт.
Илъэси 3-м къыщегъэжьагъэу ­илъэс 17-м нэс зыныбжь кIэлэцIыкIухэу зипсауныгъэкIэ щыкIагъэ зиIэхэм, ны-тыхэр зышъхьарымытыжьхэм, кIэлэцIыкIу ибэхэм, урыпсэункIэ ахъщэ анахь макIэу агъэнэфагъэм фэдиз хахъо зимыIэ унагъохэм, хэушъхьафыкIыгъэ дзэ операцием хэлажьэхэрэм яунагъохэм арысхэм илъэсыкIэ шIоигъоныгъэу яIэхэр къыраIотыкIын алъэкIыщт. Мыгъэ мы Iофтхьабзэм хэлэжьэшъущтых Белгородскэ, Курскэ, Брянскэ хэкухэм ащыпсэурэ унагъохэм арыс кIэлэцIыкIухэр, IашэкIэ зэрэзэпэуцужьыхэрэм къыхэкIэу зыщыпсэу­хэрэ чIыпIэр къэзыбгынэн фаеу хъугъэхэр.
Адыгеим щыкIорэ Iофтхьабзэм изэшIохын фэгъэзагъэр Движение Первых ишъолъыр къутам ары. Iофтхьабзэм хэлажьэхэрэм яшIоигъоныгъэхэр афэзыгъэцакIэхэрэр республикэм ихэбзэ къулыкъухэм ялIыкIохэр, гупыкI зиIэхэр, бизнесменхэр, общественнэ, сатыу организациехэр ары. Урысыем ицIыфхэу зыныбжь икъугъэхэм кIэлэцIыкIухэм яшIоигъоныгъэ афагъэцэкIэн алъэкIыщт.
ЩыIэныгъэм чIыпIэ къин ригъэуцогъэ кIэлэцIыкIухэм илъэсыкIэ гушIуагъо къафахьыным Iофтхьабзэр зэрэфытегъэпсыхьагъэр зэхэщакIохэм шъугу къагъэкIыжьы. ШIу зышIэ зышIоигъо нэбгырэ мин 88-м ехъумэ, къэралыгъо учреждениехэм, сатыу, нэмыкI организациехэм ялIыкIо мин 1,5-мэ кIэлэцIыкIу мин 213-рэ илъэсих хъугъэу агъэгушIох.