КIымэфэ лъэхъаным иапэрэ мазэу тыгъэгъазэр къехьэ. ИжъыкIэ ащ щтыргъукI раIощтыгъэ.

Адыгеим гидрометеорологиемкIэ и Гупчэ къызэрэщаIуагъэмкIэ, хабзэ зэрэхъугъэу, тыгъэгъазэм зыпкъитыныгъэ иIэщтэп, пщагъор къебэкIыщт ыкIи ощх-ос цIынэ зэхэлъыр щыIэщт.
Ау бэп ащ фэдэ мафэу къыхэкIыщтыр. Мэхьанэшхо зиIэ мафэу тыгъэгъазэм и 22-р илъэсымкIэ зэкIэмэ анахь кIаку ыкIи чэщыр анахь кIыхь.
— Илъэсыбэ хъугъэу уплъэкIунэу тшIыгъэхэм язэфэхьысыжьхэм къызэрагъэлъэгъуагъэмкIэ, АдыгеимкIэ ­1999-рэ илъэсым тыгъэгъэзэ мазэм фабэр градус 26-м нэсэу хъугъэ. Анахь чъыIэу градус 23-рэ зыщагъэунэфыгъагъэр 1964-рэ илъэсыр ары. Тыгъэгъазэм мэфэ чъыIэр градус 15 – 20-м нэсэу, ащ дакIоу фабэри градус 15 — 20-м ехъоу къыхэкIыщт, — къыIуагъ гидрометеорологиемкIэ ыкIи тыкъэзыуцухьэрэ дунаим имониторингкIэ Гупчэм ипащэу Александр Митровым.
ГурытымкIэ мы мазэм температурэр ыкIи ощх-осэу къехыщтыр шапхъэхэм анахь мэкIэщт. КъызыщыучъыIырэ уахътэм мылыр чъыгхэм ыкIи электрорыкIуа­пIэхэм апишIыхьащт.
Апэрэ мэфипшIыр. Чэщым фабэр градуси 2 — 3-м фэдизыщт, къыхэкIыщт чъыIэр градуси 6-м зыщынэсыщтхэри. Мафэм фабэу градуси 2 — 7 щыIэщт.
ЯтIонэрэ мэфипшIыр. Чэщхэр градуси 10-м нэсэу чъыIэщтых, мафэхэм фабэр градуси 5-м кIэхьащт.
Ящэнэрэ мэфипшIыр. Тыгъэгъазэм икIэухым ом изытет зэхъокIыщтэп, чэщым чъыIэу градус 4 – 9 щыIэщт, къы­хэкIыщт чъыIэр градуси 9 – 14-м зыщынэсыщтхэри. Мафэм градус 1 — 4-м анэсыщт.
Мазэм иапэрэ мэфипшIым бжыхьасэхэм макIэу ахэхъощт. Мэкъумэщ культурэхэм чъыIэр къягоощтэп. Тыгъэгъазэм псыхъохэм адэт псыр шапхъэхэм атетыщт, къызщигъэжъурэ уахътэм ыкIи лъэшэу къызещхырэм, къыдэкIоещт.
КIАРЭ Фатим.