Адыгэ Республикэм щыщ пианисткэ ныбжьыкIэу ЛIэхъусэжъ Динарэ гъэсэныгъэ гупчэу «Сириусым» игъэсэныгъэ программэу «ОрэдкъэIон искусствэр» зыфиIорэм хэлэжьагъ ыкIи апэрэ едзыгъом пхырыкIыгъ.

Мыекъуапэ искусствэхэмкIэ икIэлэцIыкIу еджапIэу N 1-м «Фортепиано» зыфиIорэ отделением Динарэ щеджэ, Сербина Зоя Василий ыпхъур ары икIэлэегъаджэр. Гъэсэныгъэ гупчэу «Сириусым» щызэхащэгъэ зэнэкъо­къум Урысыем ишъолъыр 18-мэ ыкIи СНГ-м къарыкIыгъэ нэбгырэ 26-рэ хэлэжьагъ. Москва, Санкт-Петербург, Московскэ, Кировскэ, Кемеровскэ, Орловскэ, Ульяновскэ, Сахалинскэ, Свердловскэ хэкухэм, Алтайскэ, Забайкальскэ, Пермскэ, Краснодарскэ крайхэм, Республикэхэу Саха (Якутием), Къырым, Темыр Осетием – Аланием, Удмуртскэ Республикэм, Адыгэ Республикэм ыкIи Казахстан сэнаущыгъэшхо зыхэлъ ныбжьыкIэхэр ащыщых.
Мафэ къэс, шэкIогъум и 1-м къыщыублагъэу и 23-м нэс, проектым хэлажьэхэрэр фортепианэм фэгъэхьыгъэ хэушъхьафыкIыгъэ классхэм ащырагъэджагъэх, джащ фэдэу сценическэ зекIуакIэр, актерскэ IэпэIэсэныгъэр, композициер, сольфеджиор, орэдым итарихъ арагъэкIугъэх. Ащ фэдэ егъэ­джэнхэм афэшъхьафэу ныбжьыкIэхэр экскурсие ащагъэх, шъхьадж ежь шIогъэшIэгъоным елъытыгъэу клубхэр къарагъэкIухьагъэх. «Сириусым» искусствэмкIэ ихэушъхьафыкIыгъэ гурыт музыкальнэ еджапIэ ипащэу, Московскэ къэралыгъо академическэ филармонием исолистэу, тIогъогогъо
П.И. Чайковскэм ыцIэ зыхьырэ Дунэе зэнэкъокъум илауреатэу В.Л. Руденкэм мастер-классхэр фортепианэмкIэ къы­тыгъэх. Санкт-Петербург къэралыгъо консерваториеу Н.А. Римский-Корсаковым ыцIэ зыхьырэм идоцентэу, Дунэе музыкальнэ фестивалэу «Сабыймэ ячIыгу» зыфиIорэм ихудожественнэ пащэу Е.В. Петровыр яIэшъхьэтетэу кIэлэцIыкIумэ композициер зэрагъэшIагъ.
Гъэсэныгъэ программэм иапэрэ едзыгъо икIэухым зыфэгъэзэгъэхэ лъэныкъохэмкIэ зэфэхьысыжь концерт къатыгъ. «Альфред Шнитке фэгъэ­хьыгъ» зыфиIорэ концертыр шэкIо­гъум и 16-м зэхащагъ, ащ ЛIэхъусэжъ Динарэ квартетым хэтэу ежьхэм яавторскэ произведение – квартетым пае поэмэу «Четыре злака» къыщашIыгъ. ШэкIогъум и 22-м зэхащэгъэ концертым адыгэ композиторэу А. Гъотым и «Романтическэ прелюдие» Динарэ щыригъэдэIугъэх.
«Сириусыр» – чIыпIэ шIагъу, анахь сэнаущыгъэшхо зыхэлъ кIэлэцIыкIухэу Урысыем щыпсэухэрэр щызэрэугъоих, ахэр наукэм, гъэсэныгъэм, культурэм, спортым ыкIи нэмыкI лъэныкъохэмкIэ ялэгъухэм къахэщых. Гупчэм десэу щакIухэрэм апкъ къикIэу гукъыдэчъ агъоты, зыдэлэжьэжьых, яшIэныгъэхэм ахагъахъо.
Адыгэ Республикэм ипианисткэ ныбжьыкIэ зэнэкъокъоу зыхэлэжьа­гъэр бэрэ ыгу зэрилъыщтым, иIэпэIэсэныгъэ хигъэхъонымкIэ IэпыIэгъушIу зэрэфэхъущтым уицыхьэ тебгъэлъы хъущт.
Сурэтыр: искусствэхэмкIэ
кIэлэцIыкIу еджапIэр.