«Культурэм и Унэ анахь дэгъу» зыфиIорэ зэнэкъокъум икIэух едзыгъо республикэм щэкIо.

Къалэхэм ыкIи районхэм культурэмкIэ яунэхэр, ордэунэхэр ыкIи лъэпкъ культурэм игупчэхэр ащ хэлажьэх.
ОсэшI купым хэтхэр ахэм яблагъэх, яIофшIакIэ зэрагъэлъэгъу. Мыекъуапэ дэт «Гигантым», культурэм иунэхэу псэупIэу Тульскэм, Красногвардейскэ ыкIи Джэджэ районхэм ащыIэхэм ахэр ащыIэгъахэх. Къи­хьащт тхьамафэм къэнагъэхэр къакIухьащтых. Зэфэ­хьысыжьхэр тыгъэгъазэм иапэрэ мафэхэм къэнэфэщтых. Культурэм и Унэ анахь дэгъоу къыхахыщтым зэфэхьысыжь мэфэкI Iофтхьабзэр щыкIощт.

Иваново еблэгъагъ

АР-м и Концерт зэхахьэ и Камернэ ­музыкальнэ театрэу Хьанэхъу Адам ыцIэ зыхьырэр къалэу Иваново щыIагъ.
Къалэм идраматическэ театрэ спектаклитф: инхэм апае къэгъэлъэгъонищрэ цIыкIухэм апае тIурэ къыщитыгъ. Ежь Иваново идраматическэ театри бэмышIэу республикэм щыIагъ, яспектаклэхэр цIыфхэм арагъэ­лъэгъугъ. Мыщ фэдэ зэдэлэжьэныгъэр федеральнэ программэу «Большие гастроли» зыфиIорэм къыды­хэлъытагъ. ТеатритIум Iоф зэдашIэныр агу рихьыгъэу къэкIорэ илъэсми ар лъагъэкIотэщт.

ДэкIыгъо къэгъэлъэгъонхэр лъегъэкIуатэх

АР-м лъэпкъ къашъомкIэ и Къэралыгъо академическэ ансамблэу «Налмэсым» иIоф­шIэгъу дэкIыгъо лъегъэкIуатэ.
Шъугу къэдгъэкIыжьын, мы мазэм Урал, Сыбыр, Башкирием ыкIи Татарстан ащ концертхэр къащетых. ЗэрэрахъухьагъэмкIэ, къэлэ 19-мэ концерт 20 къащитыщт, джырэкIэ ызыныкъо къызэранэкIыгъах.
Зы концертыр сыхьатрэ ныкъорэм телъытагъ. Адыгэ къашъом идэхагъэ къизыгъэлъэгъукIырэ къешIэгъу зэфэшъхьафхэр ащ къыхеубытэх. Лъэпкъ шъошэ дахэхэмкIэ зэщыфэпыкIыгъэ артист 60-мэ адыгэ культурэм идэхагъэ агъэлъагъо, аIэты, къяплъыхэрэми ахэр агу рехьых.
— Лъэшэу тыгу рихьыгъ концертыр, дахэ, кIуачIэ. Ащ творчествэ инэу хэлъыр! Тадэжь зэрэщычъыIэм емылъытыгъэу, ахэм фэбагъэу къытатыгъэр! Сынэпси къагъэкIуагъ, зысымышIэжьэуи сафэкууагъ, Iэгу сафытеуагъ. Тафэраз артистхэм, джыри шъукъакIу, — Нижневартовскэ щыщ бзылъфыгъэм концерт ужым изэхашIэхэр фэIажэхэрэп.
IофшIэгъу дэкIыгъор ансамблэм мы мазэм ыкIэм ыухыщт. ШэкIогъум и 28-м къалэу Нижнекамскэ аужырэ концертыр къыщатыщт.

«Къэзыгъэзэжьыгъэ цIэр»

Трахъо Лыу къызыхъугъэр илъэси 170-рэ зэрэхъурэм фэгъэхьыгъэ Iофтхьабзэ АР-м и Лъэпкъ музей ихьакIэщ щыкIуагъ.
Мыекъопэ медицинэ колледжым иеджакIохэр ащ рагъэблэгъагъэх. Трахъо Лыу ищыIэныгъэ гъогу, Iофэу ышIагъэр къафаIотагъэх.
Шъугу къэдгъэкIыжьын, Трахъо Лыу общественнэ IофышIэшхуагъ, къыдэгъэкIыжьынымкIэ сатыушI бэла­хьыгъ, шIушIэкIуагъ. Пхъэм икъыдэгъэкIын дэлажьэщтыгъ, чырбыщышI заводхэр иIагъэх, культурнэ-гъэсэныгъэ IофшIэным пылъыгъ. Я 20-рэ лIэшIэгъум иублэгъухэм зэхащэгъэгъэ Адыгэ шIушIэ зэхахьэм изэхэщакIохэм яз, итхьаматэ игуадзэщтыгъ.