Адыгеим итарихъ-культурнэ чIышъхьашъо игъэкIэжьынкIэ мастерскойхэм япроект икъэгъэлъэгъон мы мафэхэм Адыгэ къэралыгъо университетым щыкIуагъ. Мыгъэ ар ятIонэрэу зэхащэ ыкIи ижъырэ адыгэ культурэр непэрэ мафэм щыпхырыщыгъэу ныбжьыкIэхэм алъагъэIэсы.

Лъэпкъ шэн-хабзэхэр, тарихъыр ныбжьыкIэхэм ягъэшIэгъэныр ары пшъэрылъ шъхьаIэу зэхэщакIохэм зыфагъэуцужьыгъэр. Проектым студент ыкIи кIэлэеджэкIуи 180-рэ хэлэжьагъ. Ащ изэхэщакIох тарихъымкIэ ыкIи культурэмкIэ кафедрэм идоцентэу Цэй Заремэрэ адыгэ филологиемкIэ кафедрэм идоцентэу Цэй Бэллэрэ.
Iофтхьабзэм къыдыхэлъытагъэу мэфищым гуманитар шIэныгъэхэмкIэ ыкIи культурэмкIэ Институтым Адыгэ къэралыгъо университетым адыгэ филологиемрэ культурэмрэкIэ ифакультет мастерскойхэр щызэхищагъэх. ДышъэидэнымкIэ, пIуаблэм, пхъэ­кIычым яшIынкIэ ыкIи адыгэ лъэпкъ Iэмэ-псымэ зэфэшъхьафхэм япхыгъэу ныбжьыкIэхэм яшIэныгъэхэм ахагъэ­хъуагъ, мастер-классхэр афызэхащагъэх.

Программэу «Приоритет» зыфиIорэм ипроектэу «Адыглэндым» къыдыхэлъы­тагъэу мыр зэхащагъ. Адыгабзэм ыкIи адыгэ культурэм язэгъэшIэн, якъызэтегъэнэжьын ар афэIорышIэ. «Адыг­лэндым» ишIуагъэкIэ республикэм адыгабзэм епхыгъэ ушэтынхэр щэкIох, фольклорнэ ыкIи шIэныгъэ лингвистическэ подкорпусхэм ягъэуцун дэлажьэх, адыгабзэр нэмыкI цIыфхэм IэкIыб къэралыгъуабзэу зэрагъэшIэнымкIэ шIыкIэхэр къаугупшысых, ащ нэмыкIыбэхэри зэшIуахых.
Адыгэ къэралыгъо университетым
ипресс-къулыкъу.