Лъэпкъ IэпэщысэшIэныр лIэужхэм ащымыгъу­пшэныр, лIэшIэгъу пчъагъэмэ къапхырыкIыгъэ Iофыр лъыгъэ­кIотэгъэныр. Мыхэм апылъхэр зэрэщыIэхэм тилъэпкъ нэшанэхэр къаухъумэх, щыIэныгъакIэ арагъэгъоты.

Ахэм зэхащэрэ Iофтхьабзэ, къыха­гъэлажьэрэ нэбгырэ пэпчъ тихэбзэ шIагъохэр, ямышIыкIэ тиIэшIагъэхэр къыкъуанэх.
Джащ фэдэу Адыгэ Республикэм щызэлъашIэрэ IэпэIасэу Нэгъуцу Аслъан къызэIуихыгъэ лъэпкъ гупчэу «Нан» зыфиIорэм мы мафэхэм Мыекъопэ районым къикIыгъэ кIэлэеджакIохэр рагъэблэгъагъэх.
АР-м иIэпэIасэхэм ыкIи лъэпкъ IэпэщысэшIыным пылъхэм я Ассоциацие ­ащ кIэщакIо фэхъугъ ыкIи илъэсым изэфэхьысыжьхэм афэгъэхьыгъэ апэрэ къэгъэлъэгъонэу мыр щытыгъ.
Адыгеим иIэпэIасэхэу Нэгъуцу Аслъан, Джарымэкъо Зуриет, Гостэкъо Рус­лъан, Абрэдж Гощсимэ ныбжьыкIэхэм гущыIэгъу афэхъугъэх, яIэшIагъэхэм нэ­Iуасэ афашIыгъэх ыкIи мастер-классхэр къафагъэлъэгъуагъ. Дышъэидэм, гобеленым, пхъэкIычым яшIын, пхъэм узэрэдэлэжьэщтым япхыгъэ шъэфхэр ныбжьыкIэхэм зэрагъэшIагъэх, ежьхэми къадэхъумэ еплъыгъэх.
ДышъэидэмкIэ IэпэIасэу Джарымэкъо Зуриет пэублэ гущыIэ къышIызэ къыхигъэщыгъ IэпэIасэхэм яIэшIагъэхэм ныбжьыкIэхэр нэIуасэ фашIынхэр, ахэр мы Iофым хэщэгъэнхэр, адыгэ культурэм нахь хэшIыкI фыряIэныр пшъэрылъ шъхьа­Iэу зэряIагъэр.

— Адыгэхэм якультурэ, яшэн-хабзэхэр къыткIэхъухьэрэ лIэужхэм ягъэшIэгъэнымкIэ мыщ фэдэ Iофтхьабзэхэм яшIогъэшхо къэкIо. Непэ адыгэ культурэм иIахь анахь гъэшIэгъонхэм ащыщ нэIуасэ шъуфэхъущт. Неущырэ мафэр шъоры зэлъытыгъэр, культурэр лъыжъугъэкIо­тэнэу тыкъышъущэгугъы, — ныбжьыкIэ­хэм IэпэIасэм зафигъэзагъ.
Илъэсым къыкIоцI адыгэ культурэм ихэгъэхъон, икъызэтегъэнэн япхыгъэ Iофтхьабзэу зэхащагъэхэм язэфэхьысыжь нэужым къышIыгъ. Дунэе къэгъэ­лъэгъон-форумэу «Урысыер» зыфиIоу ВДНХ-м щыкIуагъэм АР-м иIэпэIасэхэм ыкIи лъэпкъ IэпэщысэшIыным пылъхэм я Ассоциацие чанэу хэлэжьагъ. Фестивалэу «Дышъэ блэрыр» рагъэкIокIыгъ, ащ ыпэкIэ район гупчэхэм арыт культурэм иунэхэр къакIухьагъэх, кIэлэцIыкIу IэпэIасэхэр къыхагъэщыгъэх. Ащ нэмыкIэу Iофтхьэбзэ инэу «Ремесло, ставшее искусством» зыфиIорэр зэхащагъ. Ассоциацием къыдихыгъэ грантым ишIуагъэкIэ Лъэпкъ музеим чIэлъ пкъы­гъохэм афэдэхэр ашIыгъэх ыкIи ахэр республикэм ирайон зэфэшъхьафхэм къащагъэлъэгъуагъэх, мастер-классхэр зэхащагъэх. Джащ фэдэу ПсышIуапэ щы­Iагъэх, илъэсым ыкIэм нэс джыри Iофтхьэбзэ зэфэшъхьафыбэ зэхащэн мурад зэряIэр Зуриет къыIуагъ.
Адыгэ Республикэм искусствэмкIэ иеджапIэ икIэлэегъаджэу Абрэдж Го­щэфыжь гобеленхэм яшIын шъэфэу хэ­лъыр кIэлэеджакIохэм къафиIотагъ. Адыгэ тхыпхъэм, гобеленым мэхьанэу яIэр агуригъэIуагъ. НыбжьыкIэхэм ягуа­пэу ежьхэми ашIыгъ, мы лъэныкъомкIэ ишIэныгъэхэм ахэзыгъэхъон мурад зи­Iэхэр къахэкIымэ ягуапэ зэрэхъущтыр къыхигъэщыгъ.
КIалэхэр анахьэу зэкIолIагъэхэр ­пхъэм хэшIыкIыгъэ Iэмэ-псымэхэр зытелъыгъэ Iанэр ары. Гостэкъо Руслъан мыщ фэдэ пкъыгъохэр пшIынхэм шъэфэу хэлъыр къафиIотагъ, нэрылъэгъу афишIыгъ.
— Гъэсэныгъэ тедзэ ныбжьыкIэхэм ягъэгъотыгъэным къыдыхэлъытагъэу еджа­пIэм адыгабзэм ыкIи адыгэ культу­рэм афэгъэхьыгъэ кружокым Iоф ще­­шIэ, — еIо гъэсэныгъэ гупчэу N 10-м пIу­ныгъэ IофымкIэ пащэм игуадзэу Гъу­кIэлI Эммэ. — Непэ шIоигъоныгъэ зиIэ кIэлэеджакIохэу я 7 — 11-рэ классхэм ащеджэхэрэр ары къэсщагъэхэр, ахэр нэбгырэ 18 мэхъух. Адыгэ лъэпкъым икультурэ, итарихъ ныбжьыкIэхэм ашIэныр, уасэ фашIыныр ары тызыдэла­жьэрэр. Кружокым изэхэщэн къыдыхэлъытагъэу Iофтхьэбзэ зэфэшъхьафхэм ныбжьыкIэхэр ахэсэгъэлажьэх, музейхэм сэщэх. Ащ ишIуагъэкIэ адыгэ культурэм нэмыкI цIыф лъэпкъхэм къахэкIыгъэхэри нэIуасэ фэхъух, шъхьэкIафэ фашIы, лъэпкъ зэгурыIоныгъэм ар ылъапс.

Лъэпкъ IэшIагъэхэм шъэфыбэ зэра­хэлъыр, пэсэрэ лъэхъаным щыIэгъэ пкъыгъохэм яшIын къызэрэзыIэкIагъэ­хьажьырэр, ахэр уухъумэнхэ зэрэфаер Нэгъуцу Аслъан кIэухым къыIуагъ. Ныб­жьыкIэхэм ялъэпкъ культурэ зэрэбаим, зэрэдахэм щыгъуазэ хъунхэмкIэ, нэ­мыкI лъэпкъхэм ар арагъэшIэнымкIэ мыщ фэдэ Iофтхьабзэхэм мэхьанэшхо зэряIэр къыхигъэщыгъ. Амалэу щыIэмкIэ тапэкIи ныбжьыкIэхэм ахэр зэрафызэхащэщтхэр къыIуагъ.
ДЕЛЭКЪО Анет.