2025-рэ илъэс бюджетым ыкIи 2026 — 2027-мкIэ агъэнэфагъэ­хэм афэгъэхьыгъэ хэбзэгъэуцугъэм ипроект апэрэ еджэгъумкIэ ща­штагъ АР-м и Къэра­лыгъо Совет — Хасэм я XL-рэ зэхэсыгъоу шэ­кIогъум и 19-м иIагъэм.

Iофтхьабзэм хэлэжьагъэх АР-м иминистрэхэм я Ка­бинет хэтхэр, федеральнэ ыкIи республикэ къулыкъухэм ялIы­кIохэр, народнэ депутатхэм ясоветхэм япащэхэр, нэмыкIхэр. Зэхэсыгъор зэрищагъ Парламентым и Тхьаматэу Владимир Нарожнэм.
АР-м и ЛIышъхьэ къыхилъхьэгъэ законопроектэу къи­хьащт илъэс бюджетым, ащ къыкIэлъыкIорэ илъэситIумкIэ агъэнэфагъэхэм афэгъэхьыгъэм къытегущыIагъ АР-м и Правительствэ и Тхьаматэ игуадзэу, финансхэмкIэ министрэу Виктор Орловыр. 2025-рэ илъэс бюджетым хахъохэмкIэ иIахь сомэ миллиард 32,1-рэ, хъарджхэмкIэ миллиард 34,3-рэ хъущтых. Сомэ миллиарди 2,2-рэ щыкIагъэ фэхъущт.
АР-м и УплъэкIокIо-лъы­тэкIо палатэ проектым зы­хаплъэм, лъэныкъо зэфэ­шъ­хьафхэм къахэкIыгъэу со­мэ миллиони 100-кIэ бюджетым ихахъохэр нахьыбэ шIыгъэнхэ амал щыIэу ыгъэунэфыгъ. А пчъагъэри хэтэу 2025-рэ илъэс бюджетым ихахъохэр сомэ миллиард 32,2-рэ, хъарджхэр миллиард 32,4-рэ хъугъэх, щыкIагъэхэр сомэ миллиарди 2,2-у къэнэжьыгъэх.
Нэужым шIокI зимыIэ
медицинэ страхованиемкIэ АР-м и ЧIыпIэ фонд 2025-рэ илъэсымкIэ ибюджет ыкIи 2026 — 2027-мкIэ агъэнэ­фагъэхэм афэгъэхьыгъэ хэ­бзэгъэуцугъэм ипроектэу апэ­рэ еджэгъум къыфагъэ­хьазырыгъэм хэплъагъэх. Ащ къытегущыIагъ Фондым ипащэу Хъут Светланэ. 2025-рэ илъэс бюджетым хахъохэмкIи хъарджхэмкIи иIахьхэр зэфэдизых, сомэ миллиарди 9,8-рэ зэрэхъухэрэр.
ПроектитIуми депутатхэм адырагъэштагъ, апэрэ еджэгъумкIэ аштагъэх. Джы ахэр ятIонэрэ еджэгъум фагъэхьазырыщтых.
АР-м ихэбзэгъэуцугъэу зэхэсыгъом щаштагъэхэм ащыщ хэбзэIахьхэм ятынкIэ къызэрыкIоу гъэпсыгъэ автоматизированнэ системэ гъэфедэгъэным фэгъэ­хьыгъэр. Мы шIыкIэр аушэтынэу къэралыгъом къырихьыжьагъ. 2022-рэ илъэсым ибэдзэогъу мазэ къыщыублагъэу Москва, Московскэ ыкIи Калужскэ хэкухэм, Татарстан ащыпхыращы. 2025-рэ илъэсым ищылэ мазэ и 1-м къыщегъэжьагъэу тиреспубликэ ипредпринимательхэм ащыщхэми агъэфедэн алъэкIынэу хъугъэ.
ХэбзэIахь режимыкIэм организациеу е унэе хъызмэтшIапIэу нэбгыри 5 нахьыбэ зыщымылажьэхэрэр ыкIи илъэсым зихахъохэр сомэ миллион 60-м шIомыкIыхэрэр ары къыхиубытэхэрэр. Ахэм декларациеу, нэмыкI отчет зэфэшъхьафыбэу нахьыпэкIэ атыщтыгъэр, УФ-м и Социальнэ фонд фагъэхьыхэрэри зэрахэтхэу, нахь макIэ хъущт.
Муниципальнэ образованиехэм ыкIи ахэм ягъунапкъэхэм афэгъэхьыгъэ рес­публикэ хэбзэгъэуцугъэми зэхъокIыныгъэхэр фашIыгъэх. Джэджэ, Мыекъопэ, Теуцожь ыкIи Тэхъутэмыкъое районхэр ары ар зынэсыхэрэр. НахьыпэкIэ районым игугъу тэшIымэ, гущыIэм пае, «муниципальнэ образованиеу «Теуцожь районыр» тIощтыгъ. Джы «Адыгэ Рес­публикэм и Теуцожь муниципальнэ рай­он» хъугъэ.
2024-рэ илъэсэу тызхэтым имэзибгъу республикэ бюджетыр гъэцэкIагъэ зэрэ­хъугъэми зэхэсыгъом щытегущыIагъэх. ХахъохэмкIэ ащ иIахь а уахътэм сомэ миллиард 33,1-рэ, хъарджхэр миллиард 32,7-рэ зэрэхъугъэхэр. Бюджетым щыкIагъэ фэхъугъэп, сомэ миллион 380,7-кIэ хахъохэр нахьыбэ хъугъэх.
Джащ фэдэу Ярославскэ хэку Думэм къыгъэхьазырыгъэ джэпсалъэу сэкъатныгъэ зиIэхэм яхьэ-зещакIохэм яфэIо-фашIэхэм ягъэцэкIэн пае ахъщэу илъэс къэс афатIупщырэм хэгъэхъогъэным фэгъэхьыгъэм, нэмыкI шъолъырхэм яхэ­бзэихъухьэ органхэр кIэщакIо зыфэхъу­гъэхэм, федеральнэ проектхэм еплъыкIэу афыряIэхэм тидепутатхэр атегущыIа­гъэх, зэкIэми адырагъэштагъ.
ХЪУТ Нэфсэт.