Адыгэ Республикэм и Сурэт къэгъэлъэгъуапIэ шэкIогъум и 12-м Мамый Асхьад иIофшIагъэхэм якъэгъэлъэгъон къыщызэIуахыгъ. Къызыхъугъэ мафэм ар тырагъэфагъ. Непэ ар къытхэмытыжьми, игупшысэхэр къызыщыриIотыкIырэ сурэтхэу купкI ин зиIэхэр къэнагъэх.

ЛIакъомкIэ анахьыжъэу, шIэныгъэлэжьэу, тхакIоу Мамый Руслъан ипэублэ гущыIэ Асхьад фэгъэхьыгъэ гукъэкIыжьхэр къыIотагъэх. Исурэтхэм уяплъы зыхъукIэ, къызыщыхъугъэхэ, псычIэгъ хъугъэ Шыхьанчэрыехьаблэ ичIыпIэ дахэхэм джыри ахэтхэу къазэрашIошIырэр къыхигъэщыгъ. Иунагъо, икъуаджэ зэригъэдэхэщтхэм ар сыдигъуи зэрэпылъыгъэр, ятэу Къадырбэч щысэ зытепхын цIыфэу зэрэщытыгъэр, къоджэ­дэсхэм зэряупчIэжьэгъугъэр къыIуагъ. ИшIэжь агъэлъапIэу, исурэтхэм япхыгъэ къэгъэлъэгъон къызэрэзэIуахыгъэм пае лIакъом ыцIэкIэ зэхэщакIохэм зэрафэразэм къыкIигъэтхъыгъ.
Мамый Асхьад 1949-рэ илъэсым къуа­джэу Шыхьанчэрыехьаблэ къыщыхъугъ. ИцIыкIугъом къыщегъэжьагъэу лъэныкъо зэфэшъхьафхэмкIэ сэнаущыгъэ ин хэ­лъыгъ, шыкIэпщынэм къыригъаIощтыгъ, сурэт ышIыщтыгъ.

Адыгэ Республикэм и Сурэт къэгъэ­лъэгъуапIэ ипащэу Бырсыр Абдулахь къызэриIуагъэмкIэ, Мамый Асхьад дэгъоу ышIэщтыгъ, ищыIэныгъэ гъогу мэкъумэщ сэнэхьатым рипхыгъагъ нахь мышIэми, живописым ыгукIэ фэщагъэу щытыгъ.
— Адыгэ лъэпкъым къыкIугъэ гъогур, къиныгъоу къызэпичыгъэхэр, псычIэгъ хъугъэ къуаджэхэм ащыпсэущтыгъэ цIыфхэм агу ихъыкIыщтыгъэр исурэтхэм къащигъэлъэгъон ылъэкIыгъ. Зыфэдэ къэмыхъугъэ, купкI ин зиIэ сурэтых ахэр. Илъэс пчъагъэ тешIагъэми, цIыфхэм апэкIэкIыгъэр непэ къытигъэлъэгъужьын ылъэкIыгъ. ЗэкIэмкIи сурэт 23-рэ къекIуа­лIэхэрэм зэрагъэлъэгъун алъэкIыщт,— къыIуагъ Бырсыр Абдулахь.
ИцIыкIугъом къыщегъэжьагъэу иныбджэгъугъэ Къэбэртэе Аскэрбый нэужым гущыIэ ратыгъ. Асхьад ицIыф гъэпсыкIэкIэ зыфэдагъэр, сурэтшIынымкIэ исэнаущыгъэ гурыт еджапIэм къызэрэщежьэгъагъэр, я 6-рэ классым исхэу исурэт районымкIэ анахь дэгъоу зэралъы­тэгъагъэр ащ къыIотагъ.

— 1993-рэ илъэсхэм адэжь исурэтхэр ыIыгъхэу садэжь къакIуи тызэдяплъы­гъагъ, зэхъокIыныгъэ мыинхэр фэтшIыжьыгъагъэх. Икъуаджэ шIу зэрилъэгъурэр къыушыхьатэу иапэрэ IофшIагъэ­хэр тыкъызщыхъугъэ къуаджэм фэгъэ­хьыгъагъэх, анахь чIыпIэ дахэу иIагъэхэр исурэтхэм къащигъэлъэгъуагъ. Ахэм ащыщ «Прощай, Псекупс», «В верховьях Псекупса», «Прощай, Кармалино» зыфиIохэрэр. Ыныбжь хэкIотагъэ зэхъум, сурэтшIыным нахь зыритыгъагъ, сурэтышIхэм я Союз хэтыгъ. Тыкъызщыхъугъэ къуаджэм ыцIэ чыжьэу зэригъэIу­гъэм тырэгушхо, — къыIуагъ Аскэрбый.
Мамый Асхьад лIэуж дахэ ­къыгъэнагъ, икIалэхэу Оскар, Валерэ, Эдуард щыIэныгъэ гъогум тыригъэхьагъэх. Икъо­рэлъфэу Султан ятэжъ исэнаущыгъэ къыхэхьагъ, сурэтшIыныр лъэшэу икIас.
ДЕЛЭКЪО
Анет.
Сурэтхэр авторым иех.