IэпыIэгъу афэхъугъэх
Адыгэ Республикэм и Къэралыгъо автоинспекцие ихэушъхьафыкIыгъэ взвод игъогу-патруль къулыкъу иинспекторхэу, полицием истаршэ лейтенантэу НэтIэо Аскэр ыкIи лейтенантэу Артем Потаповым Пэнэжьыкъуае пэгъунэгъоу къу­лыкъур ахьызэ, IэкIыбым къыщашIыгъэ автомобилыр апашъхьэ къыщыуцугъ.

Водителым къыдисыгъэ бзылъфыгъэр гуIэзэ къулыкъушIэхэм къячъэлIагъ ыкIи къариIуагъ илъэс 38-рэ зыныбжь ишъхьэгъусэу Краснодар щыщым ипсауныгъэ къызэрэзэщыкъуагъэр, ащ къыхэкIэу машинэр ыгъэIорышIэн зэримылъэкIырэр. Инспекторхэр автомобилым зекIуа­лIэхэм, водителым иIофхэр зэрэдэир алъэгъугъ.
Iофхэм язытет инспекторхэм япащэ щагъэгъозагъ, нэужым хъулъфыгъэр ыкIи ащ ишъхьэгъусэ патруль машинэм рагъэтIысхьэхи, Адыгэкъалэ дэт сымэджэщым ащагъэх. Ащ хъулъфы-­
гъэм псынкIэу медицинэ IэпыIэгъу щырагъэгъотыгъ. Ащ ыуж инспекторхэм яIофшIэн падзэжьыгъ, джащ фэдэу зэшъхьэгъусэхэм гъогум къытыранэгъэ машинэм лъыплъагъэх. А пчыхьэ дэдэм хъулъфыгъэр сымэджэщым къычIатхыкIыжьыгъ.
Краснодар щыщ зэшъхьэгъусэхэм полицием икъулыкъушIэхэр IэпыIэгъу зэрафэхъугъэхэм фэшI ярэзэныгъэ гущыIэхэмкIэ закъыфагъэзагъ, псауныгъэ яIэнэу, якъулыкъукIэ лъэгэпIэ инхэм анэсынхэу къафэлъэIуагъэх.

НыбжьыкIэхэм
алъыгъэIэсыгъэныр
Урысые Iофтхьабзэу «Хьадэгъур зыщащэрэр ошIэмэ, макъэ къэгъэIу!» зыфиIоу илъэс къэс зэхащэрэм иятIонэрэ уцугъо икIэуххэр зэфахьысыжьыгъэх.
Ащ пшъэрылъэу иIагъэр наркотикхэр хэбзэнчъэу къызэрэрагъэкIокIыхэрэм пэуцужьыгъэным общественностыр къы­хэгъэлэжьэгъэныр, наркотикым пыщэгъэ цIыфхэм ягъэхъужьынкIэ IэпыIэгъу афэхъугъэныр, ахэр щыIэныгъэм хэ­гъэгъозэжьыгъэнхэр ары.
Iофтхьабзэр окIофэ Адыгеим иполицейскэхэм цIыфхэм зафагъэзагъ наркотикхэр хэбзэнчъэу къызэрэрагъэ­кIокIыхэрэм, зэрагъэфедэхэрэм ыкIи ар зыхэлъ пкъыгъохэр зэрэIуагъэ­кIыхэрэм афэгъэхьыгъэ къэбархэм ащыгъуазэхэмэ, хэгъэгу кIоцI къулыкъу­хэм макъэ арагъэIунэу.
Наркоконтролым икъулыкъоу АР-м щыIэм Iофтхьабзэр зыщыкIогъэ уахътэм къыкIоцI республикэм щыпсэурэ нэбгырэ 46-мэ зыкъыфагъэзагъ.

Наркотикхэр хэбзэнчъэу агъэзекIуагъэу зы бзэджэшIагъэ ыкIи административнэ хэбзэукъоныгъи 6, административнэ хэукъоныгъэ 22-рэ агъэунэфыгъ. Бгъэфедэ мыхъущт наркотик зыхэлъ вещество грамм 500 къаIахыгъ.
Къулыкъум иIофшIэн нахь зыфэгъэзэгъагъэр пэшIорыгъэшъ Iофтхьабзэхэм язэхэщэн, джащ фэдэу ныбжьыкIэхэм лекцие къафеджэгъэныр. ХэбзэухъумэкIо къулыкъум иIофышIэхэм ныбжьыкIэхэр нахьыбэу зыщызэхэхьэхэрэ чIыпIэ 42-рэ ауплъэкIугъ, зэдэгущыIэгъухэр адашIыгъ.

БзэджэшIагъэ зэрахьагъэу шъущыгъуа­зэмэ
Полицием цIыфхэм ­закъыфегъазэ общественнэ чIыпIэхэм зэращызекIощтхэм, хъугъэ-шIагъэ къэхъугъэу алъэгъумэ макъэ зэрагъэIущт шIыкIэхэм, нэмыкI­хэми афэгъэхьыгъэу.
БзэджэшIагъэу ыкIи хъугъэ-шIагъэу гъогухэм, общественнэ чIыпIэхэм ащызэрахьэхэрэр нахьыбэрэмкIэ цIыфхэм янэрылъэгъух.
БзэджэшIагъэ ыкIи административнэ хэбзэукъоныгъэ зэрахьагъэу шъущыгъуа­зэмэ, бзэджашIэм итеплъэ гум ишъу­убыт. Полицием псынкIэу макъэ зэрежъу­гъэIущтым шъупылъ, телефон номерэу 02-м (102-м) шъутеу, хэбзэукъо­ныгъэм щыжъугъэгъуазэх.
ШъумыгуIэу, нахь игъэкIотыгъэу хъу­гъэ-шIагъэу шъузэрихьылIагъэр, уахътэр, такъикъэу зыщыхъугъэр полицием икъу­лыкъушIэхэм къафэшъуIуатэх.
Хъугъэ-шIагъэм ыпкъ къикIыкIэ зыгорэм шъобж тещагъэ хъумэ, ащ IэпыIэгъу шъуфэхъу. Полицием икъулыкъушIэхэр къэкIохэфэ шъуяж. Джащ фэдэу наркотикыр, Iашэр ыкIи къэорэ пкъыгъохэр къезыгъэкIокIыхэрэм якъэ­бар шъущыгъуазэмэ, полицием ителефон номерэу 02-м (102-м) шъутеу.

Полицием иIоф­ышIэхэм зызэрафэжъу­гъэзэн шъулъэкIыщ­тыр
ЦIыфхэм хэбзэнчъэу къадызекIуагъэхэмэ хэбзэухъумэкIо къулыкъухэм зафагъэзэн зэралъэкIыщтымкIэ АР-м хэ­гъэгу кIоцI IофхэмкIэ и Минис­терствэ макъэ арегъэIу.
Ахэм ащыщ письмэ шIыкIэр. Мыщ фэдэу ар тхыгъэн фае:

1.Письмэр зыфэптхырэ хэгъэгу кIоцI къулыкъум ыцIэ е зызфэбгъазэ пшIоигъо къулыкъушIэм ылъэкъуацIэ, ыцIэ, ятацIэ е иIэнатIэ. 2. Ежь цIыфым ылъэкъуацIэ, ыцIэ, ятацIэ. 3. Джэуапыр къыздагъэхьыжьыщт адресыр. 4. УиIэпэкIадзэ ыкIи зыщыптхыгъэ мафэр. 5. ИщыкIагъэ хъумэ, письмэм техыгъэр ибгъэгъусэн плъэкIыщт.
Даоу къаIэкIахьэхэрэр зэкIэ атхых. Нэужым ахэм захаплъэхэкIэ, уахътэу къафагъэуцугъэм къыриубытэу даор къэзытхыгъэм джэуапыр фагъэхьыжьы.
АР-м и МВД джыри зэ цIыфхэм закъыфегъазэ бзэджэшIагъэ зэрахьа­гъэу е хабзэр аукъуагъэу щыгъуазэхэмэ, полицием икъулыкъушIэхэм макъэ арагъэIунэу. Шъугу къэтэгъэкIыжьы, ОВД-м телефонымкIэ ыкIи Интернетым исайткIэ хэбзэухъумакIохэм зафэжъугъэзэн шъулъэкIыщт. Джащ фэдэу министерствэм иофициальнэ сайтэу «Для граждан» зыфиIорэм игъэкIотыгъэ къэ­барыр ижъугъотэщт.
АР-м хэгъэгу кIоцI IофхэмкIэ и Министерствэ ипресс-къулыкъу.

Хэбзэ ахъщэ ытыгъугъ
УФ-м и Следственнэ комитет иследственнэ ГъэIорышIапIэу АР-м щыIэм Мыекъопэ районымкIэ иследственнэ отдел поселкэу Каменномостскэм дэт почтэм ипащэу Iоф зышIэщтыгъэм къыфызэIуа­хыгъэ уголовнэ Iофым хэп­лъагъ. УФ-м и Уголовнэ кодекс истатьяу 160-м къызэригъэ­нафэу, бэ хъурэ хэбзэ ахъщэр къызэрэзIэкIигъэхьагъэм фэшI бзылъфыгъэр агъэмысэ.
ЗэрагъэунэфыгъэмкIэ, 2023-рэ илъэ­сым мэзаем къыщегъэжьагъэу 2024-рэ илъэсым гъэтхапэм нэс почтэм икъутамэ ипащэу Iоф зышIэщтыгъэм хэбзэнчъэу кассэм ахъщэ ритыгъукIыгъ ыкIи ежь зэрэфаем фэдэу къызфигъэфедагъ. ЫпшъэкIэ зигугъу къэтшIыгъэ уахътэм къыриубытэу сомэ 1063286-рэ къызIэкIигъэхьагъ, ащ къыхэкIэу Iахьзэхэлъ обществэу «Урысыем и Почтэ» зэрар рихыгъ.
Урысыем хэгъэгу кIоцI IофхэмкIэ и Министерствэ экономикэ щынэгъончъэ­нымкIэ иподразделение ыкIи къолъхьэ тын-Iыхыным пэшIуекIогъэнымкIэ Мые­къопэ районым иотдел къаугъоигъэ материалхэмкIэ уголовнэ Iоф къызэIуа­хыгъ.
ИнэIуасэ ыукIыгъ
УФ-м и Следственнэ комитет иследственнэ ГъэIорышIапIэу АР-м щыIэм Мые­къопэ районымкIэ иследственнэ отдел укIыгъэ Iоф зэрэзэрахьагъэм фэшI уголовнэ Iоф къызэIуихыгъ.
Следствием зэригъэунэфыгъэмкIэ, 2024-рэ илъэсым шэкIогъум и 4-м ехъулI­эу станицэу Севастопольскэм дэт унэ горэм ибысымрэ инэIосэ хъулъфыгъэмрэ щызэдешъохэзэ, азыфагу зэгурымыIоныгъэ къитэджагъ. Ащ къыхэкIэу инэIосэ хъулъфыгъэм обзэгъумкIэ утын пчъагъэхэр бысымым тырищагъ. Шъобжэу тещагъэхэм къахэкIэу а чIыпIэм хъулъфыгъэм идунай щихъожьыгъ. БзэджашIэм зигъэбылъыжьыгъ.
2024-рэ илъэсым шэкIогъум и 8-м лажьэ зиIэр къаубытыгъ.
Уголовнэ Iофэу къызэIуахыгъэмкIэ следовательхэм ыкIи криминалистхэм следственнэ зэхэфынхэр рагъэкIокIых.
УФ-м и Следственнэ комитет
иследственнэ ГъэIорышIапIэу
АР-м щыIэм
ипресс-къулыкъу.
Зыгъэхьазэрыгъэр КIарэ Фатим.