НыбжьыкIэ гупчэу «Адыгеим иныбжьыкIэхэр» зыфиIорэр зычIэтыщт унэм изэтегъэпсыхьан Мыекъуапэ зэрэщыкIорэр Адыгеим и ЛIышъхьэу КъумпIыл Мурат зэригъэлъэгъугъ. Ащ игъусагъ АР-м иминистрэхэм я Кабинет и Тхьаматэ игуадзэу Хъоткъо Хъызыр.

Лъэпкъ проектэу «Гъэсэныгъэм» къыдыхэлъытагъэу Урысыем и Президент пшъэрылъ зэрафишIыгъэм тетэу ныбжьыкIэ политикэу «Шъолъы­рыр ныбжьыкIэхэм апай» зыфиIорэм ихэхъоныгъэ ипрограммэхэм я Урысые зэнэкъокъу текIоныгъэр къыщыдихыгъ ныбжьыкIэ гупчэм игъэпсынкIэ проектым. Ар гъэцэкIагъэ хъуным пае федеральнэ бюджетым сомэ миллион 75,6-рэ хъурэ субсидиер ­къыхагъэкIыгъ. Мы илъэсым ыкIэм ехъулIэу унэм изэтегъэпсыхьан аухын мурад яI.
АР-м ныбжьыкIэ IофхэмкIэ и Комитет итхьаматэу Максим Галушкиным къызэрэхигъэщыгъэмкIэ, республикэм ныбжьыкIэ политикэм хэхъоныгъэ щишIынымкIэ амалышIу ­къытыщт ныбжьыкIэ гупчэм икъызэIухын. ГупчакIэр лъэныкъо зэфэшъхьафхэм алъэныкъокIэ ныбжьыкIэхэр, общес­твеннэ зэхахьэхэр, командэ ыкIи проект куп зэмылIэужыгъохэр къыз­фэзыщэхэрэ чIыпIэу хъущт. Мы унэм квадрат метрэ 440-рэ еубыты, ащ хэтыщтых егъэблэгъапIэр, офисхэр, зэIукIэхэр зыщыкIощтхэр, зызщагъэ­псэфын, зыщызэдэгущыIэнхэ алъэ­кIыщт унэхэр. Кином щеплъынхэ амал зыщяIэщт чIыпIи щагум щагъэнэфагъ.

«Адыгеим иныбжьыкIэхэр» зыфиIорэ гупчэм ипащэу Мыгу Бислъан къызэриIуагъэмкIэ, пчэдыжьым сыхьатыр 8-м къыщыублагъэу пчыхьэм 11-м нэс ныбжьыкIэ гупчэм ипчъэхэр зэIухыгъэщтых. КIалэхэр ыкIи пшъа­шъэхэр творчествэм, общественнэ IофшIэным мыщ щапылъынхэ алъэ­кIыщт, социальнэ мэхьанэ зиIэ проектхэм япхырыщынкIэ яеплъыкIэхэр къызэфаIотэщтых, хэушъхьафыкIыгъэ дзэ операцием хэлажьэхэрэм, хабзэм икъулыкъухэм ялIыкIохэм, лъэныкъо зэфэшъхьафхэмкIэ IэпэIэсэныгъэ ин зыхэлъ цIыфхэм аIукIэнхэ алъэкIыщт, гъэсэныгъэм епхыгъэ Iофтхьабзэхэри щызэшIуахыщтых.
«Федеральнэ пащэхэм ныбжьыкIэ политикэм ылъэныкъокIэ стратегическэ мэхьанэ зиIэ пшъэрылъхэр къытфагъэуцух. КъыткIэхъухьэхэрэр зэрэтпIухэрэм елъытыгъэщт хэгъэгум инеущрэ мафэ зыфэдэщтыри. Гупчэу дгъэпсырэм мэхьанэшхо иIэщт респуб­ликэм а IофшIэныр тэрэзэу щызэшIохыгъэнымкIэ. НыбжьыкIэ пэпчъ игугъэ-гупшысэхэр къыIонхэ, амалэу иIэхэм ащигъэгъозэнхэ, кIэ горэ зэригъэшIэн, проектхэм язэхэгъэуцонкIэ ыкIи пэщэныгъэ зехьэгъэнымкIэ къулайныгъэхэр ыIэ къыригъэхьанхэ ылъэкIыщт. Мыщ къакIорэ ныбжьыкIэхэм яунэ къэкIожьыгъэхэм фэдэу гуIэтыпIэ мыр афэхъун фае», — къы­Iуагъ АР-м и ЛIышъхьэ.

Республикэм ипащэ подряднэ организацием илIыкIохэм гущыIэгъу афэхъугъ, псэолъэшIынымкIэ шапхъэу щыIэхэр укъуагъэ мыхъунхэм мэхьанэшхо зэриIэм анаIэ тыраригъэдзагъ. Ащ къызэриIуагъэмкIэ, ямышIыкIэ теплъэу унэм иIэр къэгъэнэжьыгъэн фае: 1910-рэ илъэсым ашIыгъэ псэ­уалъэм тарихъ-архитектурнэ мэхьанэ иI, республикэм а лъэныкъомкIэ икIэнэу плъытэн плъэкIыщт.
АР-м и ЛIышъхьэ ипресс-къулыкъу
къытыгъэ къэбархэмкIэ
Тхьаркъохъо Сафыет