Ткъош Къэбэртэе-Бэлъкъарым игъэзетхэу «Адыгэ псалъэм», «Кабардино-Балкарская правда» ыкIи «Заман» зыфиIохэрэр илъэси 100 зэрэхъугъэхэм фэгъэхьыгъэ мэфэкI Iофтхьабзэу афызэхащагъэм Адыгеим тырилIыкIоу, «Адыгэ макъэм» иредактор шъхьа­Iэу МэщлIэкъо Саидэ ти­пащэу, тигопэ дэдэу тыхэлэжьагъ.

Пстэумэ апэу Къэбэртэе-Бэлъкъар, Къэрэщэе-Черкес, Темыр Осетием—Аланием тиIофшIэгъу журналистэу ащылажьэхэрэм таIукIагъ, зимэфэкI хэзыгъэунэфыкIыхэрэм ягушIуагъо адэдгощыгъ, тиIофшIэкIэ-шIыкIэхэмкIэ тызэхъожьынэу ащ амал къытитыгъ, гъэзетхэу зэкъош шъолъырхэм къащыдэкIыхэрэм гумэкIыгъоу апэ къи­кIыхэрэм ядэгъэзыжьын зэращыдэлажьэхэрэм шъхьэихыгъэу зыщатегущыIэгъэхэ Iэнэ хъураем тыхэлэжьагъ.
МэфэкIым тыхэтэу Дунэе Адыгэ Хасэм и Тхьаматэу Сэхъурэкъо Хьаути, КъБР-м и Адыгэ Хасэ ипащэу ХьашIуцIэ Мухьамэд, Европэ Адыгэ Хасэм итхьаматэу Вэрэкъо Заати зэIукIэгъу дахэхэр адытиIагъ. Тинахьыжъхэм шъхьэкIафэ афэтшIыгъ, дгъэлъэпIагъэх.
Журналист зэдэлэжьэныгъэмкIэ тиIофшIэгъухэу Анцокъо Иринэрэ («Адыгэ макъ») Аслъаныкъо Мадинэрэ («Черкес хэку») IофшIэгъу мафэхэу мэфэкIым къыпэу КъБР-м афызэхащагъэхэр гъэшIэгъон дэдэу щыкIуа­гъэх, зыIуагъэкIэгъэ цIыф шIагъохэм тиIоф­шIэгъухэм лъытэныгъэ ин къапагъо­хыгъ, цIыфыгъэкIэ, дэхагъэкIэ къапэгъокIыгъэх. Тижурналистхэри гъэхъагъэ хэлъэу лэжьагъэх.
Анахь къыхэдгъэщымэ тшIоигъор тиIофшIэгъу лъапIэу ыкIи дгъэпшъэшъэгъоу, илъэс пчъагъэхэм зэпхыныгъэ пытэ зыдытиIэу, «Адыгэ псалъэм» ижурналистэу, Адыгеим изаслуженнэ журналистэу НэкIэпыджэ Замирэ щытхъуцIэ лъапIэу «КъБР-м изаслуженнэ журналист» зыфиIорэр мэфэкIым къызэрэщыфагъэшъошагъэр ары. А гушIуагъор зэрэдэдгощыгъэр тэркIэ лъапIэ. Ежьыми ифэшъошэ дэд! Замирэ иIофшIагъэхэмкIэ лъэпкъхэр, къошхэр, къэралхэр зэзыпхырэ цIыф!
«Адыгэ псалъэм» иредактор шъхьа­Iэу Жыласэ Заурбэч, редакцием иIофышIэхэр гуфэбэныгъэ хэлъэу къытпэгъокIыгъэх. НэкIэпыджэ Замирэ, Чэрим Марияннэ, Гугъуэт Заремэ, Къаныкъо-Фырэ Анфисэ, Уэрдокъуэ Жене, нэмыкIхэми а мэфэ заулэм редакцием тащыIукIэщтыгъ, къы­тпекIокIыщтыгъэх. IофшIэгъу зэпхыныгъэхэм, зэныбджэгъуныгъэм ялъэмыдж зэдэтIэтыгъ. Ар зымыуасэ щыIэп.
«ФыкIожьмэ, таурэ тыпсэунэу?»—тиIофшIэгъухэм къытаIуагъ. А гущыIэхэр гум къинагъэх.
«Адыгэ макъэм» иредактор шъхьаIэу МэщлIэкъо Саидэ зэкъош гъэзетхэм яредакциехэм яIофышIэхэр зэIугъэкIэгъэнхэм, шъхьадж гъэзетым щигъэцэкIэрэ IофымкIэ шIэныгъэу аIэкIэлъхэмкIэ зэхъожьынхэ, зэрэшIэнхэ алъэкIыным афэгъэхьыгъэ проектыкIэ журналист зэдэлэжьэныгъэмкIэ 2025-рэ илъэсым дгъэцэкIэнэу къыхи­лъ­хьагъ. Фэдэ зэIукIэгъухэм гукъэкI хьалэмэтхэр къахэкIых.
«Адыгэ псалъэм» иредактор шъхьа­Iэу Жыласэ Заурбэч а гукъэкIым къыдыригъэштагъ. Ащ фэдэу зэрэзэдедгъаштэрэм, тызэрэзэгурыIорэм тегъэгушIо ыкIи тегъэгушхо!
Зэрэредакциеу тыкъагъэкIотэжьыгъ. Аужыпкъэм, Жыласэ Заурбэч ежь ышъхьэкIэ хьакIэщэу тызчIэсыгъэм тыкъынигъэсыжьыгъ, гъогу тыкъызщытехьажьыщтым тыкъыгъэкIотэ-­
жьыгъ.
Мэфищым Налщык тыкъэтыфэ гуIэтыпIэу тыгъэр къыщепсыгъ. Иурам дахэхэм къащыткIухьагъ, ибжыхьэ чIыопс идэхагъэ зэхэтшIагъ, иошъо къаргъо къыщыхэIэтыкIыгъэ къушъхьэтхыхэу осыр зытелъхэр нахь благъэ къытфишIыгъэм фэдэу таIуигъэплъагъ.
Мэфэ шIагъохэр Къэбэртэе-Бэлъкъа­рым щитхыгъэх. Ахэр тиIофшIэн зэпхыныгъэхэм, зэкъош зэфыщытыкIэхэм ятарихъ къыхэнэщтых, лъэбэкъукIэхэм якъежьапIэу хъущтых.
ГущыIэуж
Журналист зэдэлэжьэныгъэмкIэ Къэбэртэе-Бэлъкъар Республикэм Анцокъо Иринэ гъэзетым пае къыщигъэхьазырыгъэхэр мы охътэ благъэм зэхэубытагъэу «Адыгэ макъэм» къыхиутыщтых.
Тэу Замир.